قازاقستان • 23 اقپان، 2021

ماعزۇم مىرزاعاليەۆ «ارسەلورميتتال تەمىرتاۋ» باسشىلىعىنا ءوندىرىستى تولىق جاڭعىرتۋ تۋرالى شارت قويدى

6 رەت كورسەتىلدى

قازاقستاننىڭ ەكولوگيا مينيسترلىگىنىڭ باسشىسى «ارسەلورميتتال تەمىرتاۋ» باسشىلىعىنىڭ الدىنا ءوندىرىستى تولىق جاڭعىرتۋ تۋرالى شارت قويدى، دەپ حابارلايدى Egemen.kz.

قازاقستاننىڭ ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ سەيسەنبى كۇنى «ارسەلورميتتال» كومپانياسىنىڭ ۆيتسە-پرەزيدەنتى ۆيجاي گويال مىرزامەن كەزدەستى.

كەزدەسۋ بارىسىندا تاراپتار كومپانيا وتكىزەتىن تابيعاتتى قورعاۋ ءىس-شارالارىن، سونداي-اق ەميسسيالاردىڭ اسىپ كەتۋى بويىنشا جاقىندا ورىن العان وقيعانى تالقىلادى.

اڭگىمە بارىسىندا مينيستر تەمىرتاۋ اتموسفەراسىنىڭ لاستانۋ دەڭگەيى بۇگىنگى تاڭدا ەلدىڭ باستى ەكولوگيالىق پروبلەمالارىنىڭ ءبىرى بولىپ تابىلاتىنىن اتاپ ءوتتى.

م.مىرزاعاليەۆتىڭ مالىمەتىنشە، جىل سايىن «ارسەلور ميتتال تەمىرتاۋ» اق مەتاللۋرگيالىق كەشەنىنەن اتموسفەرالىق اۋاعا 230 مىڭ توننادان استام لاستاۋشى زاتتار شىعارىلادى، بۇل قالانىڭ ءاربىر تۇرعىنىنا (بالالار مەن ايەلدەردى قوسا العاندا) شامامەن 11 توننا لاستاۋشى زاتتاردان كەلەدى.

ەكولوگيا مينيسترلىگىنىڭ باسشىسى كومپانيا جۇزەگە اسىرىپ جاتقان تابيعاتتى قورعاۋ ءىس-شارالارىن ءتيىمسىز دەپ اتادى.

«كاسىپورىندا تەك قاعاز جۇزىندە جانە «كوز بوياۋشىلىق» ءۇشىن جۇمىس ىستەيتىن تيىمدىلىگى از تابيعات قورعاۋ شارالارى ەنگىزىلدى»، - دەپ اتاپ ءوتتى مينيستر.

سوڭعى 5 جىلدا كاسىپورىن تابيعاتتى قورعاۋ ءىس-شارالارىنا 28 ملرد.تەڭگە (67 ملن. دوللار) جۇمسادى، ال ەكولوگيالىق تيىمدىلىك شىعارىندىلاردىڭ 190 توننا نەمەسە «ارسەلور ميتتال تەمىرتاۋ» ناقتى شىعارىندىلارىنىڭ 0،08% - نا تومەندەۋىن عانا قۇرادى.

2019 جىلى كومپانيا 2019-2024 جىلدار ىشىندە شىعارىندىلار كولەمىن 60 مىڭ تونناعا ازايتۋ مىندەتىن وزىنە الدى.

«الايدا، كاسىپورىن ءالى كۇنگە دەيىن وزىنە العان مىندەتتەمەلەردى ورىنداۋ بويىنشا شارالار قابىلدامادى»، - دەپ اتاپ ءوتتى م.مىرزاعاليەۆ.

تەمىرتاۋدىڭ ەكولوگيالىق احۋالىن ەسكەرە وتىرىپ، ەكولوگيا مينيسترلىگىنىڭ باسشىسى كومپانيا باسشىلىعىنىڭ الدىنا ەڭ وزىق قولجەتىمدى تەحنولوگيالارعا كوشە وتىرىپ، شىعارىندىلار كولەمىن تاياۋداعى 4 جىلدا كەمىندە 30%-عا تومەندەتە وتىرىپ، ءوندىرىستى تولىق رەكونسترۋكتسيالاۋ جانە جاڭعىرتۋ تۋرالى ماسەلە قويدى.

سونداي-اق، مينيستر ناقتى ۋاقىت رەجيمىندە دەرەكتەردى بەرە وتىرىپ، ەميسسيالار مونيتورينگىنىڭ اۆتوماتتاندىرىلعان جۇيەسىن ەنگىزۋ قاجەتتىگىن اتاپ ءوتتى.

قالا ەكولوگياسىنىڭ جاي-كۇيىن جاقسارتۋ شارالارىنىڭ قاتارىندا م.مىرزاعاليەۆ كومپانيانىڭ تەمىرتاۋ مەن وعان ىرگەلەس اۋماقتا (500 مىڭ اعاش وتىرعىزۋ) «جاسىل بەلدەۋ» قۇرۋ جونىندەگى مىندەتتەمەسىن ەسكە سالدى.

سوڭعى جاڭالىقتار

قازاقستاندا جاڭا كەن ورنى تابىلدى

ەكونوميكا • بۇگىن، 16:21

ەڭ سۇلۋ ۆولەيبولشى كىم؟

سپورت • بۇگىن، 16:15

ەل قورعاعان ەردىڭ ەسىمى جاڭعىردى

رۋحانيات • بۇگىن، 14:49

كورشىنىڭ كوپ-كورىم كومەگى

قوعام • بۇگىن، 14:23

ۇقساس جاڭالىقتار