قازاقستان • 23 اقپان، 2021

سەنات توراعاسى فرانتسيا ەلشىسىمەن كەزدەستى

10 رەت كورسەتىلدى

سەنات توراعاسى ماۋلەن اشىمباەۆ فرانتسيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ديدە كانەسسپەن كەزدەستى.

كەزدەسۋ بارىسىندا ەكى ەل اراسىنداعى ىنتىماقتاستىقتى ودان ءارى نىعايتۋ، ونىڭ ىشىندە پارلامەنتارالىق بايلانىستى ارتتىرۋ ماسەلەلەرى ءسوز بولدى.

«قازاقستان پارلامەنتىنىڭ ەكى پالاتاسىندا دا فرانتسيا پارلامەنتىمەن ىنتىماقتاستىق بويىنشا توپ جۇمىس ىستەيدى. ءبىز پارلامەنتارالىق بايلانىسىمىزدىڭ سەرپىندى قارقىنىن ساقتاۋعا جانە فرانتسۋز پارلامەنتاريىمەن سىندارلى جۇمىس ىستەۋگە مۇددەلىمىز»، – دەدى ماۋلەن اشىمباەۆ.

سونىمەن قاتار سەنات توراعاسى ەلدەرىمىز اراسىنداعى مادەني-گۋمانيتارلىق بايلانىستىڭ تابىستى دامىپ كەلە جاتقانىن اتاپ ءوتتى. ەكى مەملەكەتتىڭ قولداۋىمەن 2018 جىلى «اباي-ۆەرن» حالىقارالىق ءبىلىم باعدارلاماسى قولعا الىنعان ەدى. بۇگىندە وسى باستاما بويىنشا العاشقى ستيپەندياتتار فرانتسيادا وقۋلارىن اياقتاپ ۇلگەردى.

«قازاقستاندىق ستۋدەنتتەر فرانتسيادا «بولاشاق» باعدارلاماسى بويىنشا دا ءبىلىم الۋدا. قازىرگى تاڭدا بۇل باعدارلامانىڭ تۇلەكتەرى ەلىمىزدە مەملەكەتتىك قىزمەتتە جانە جەكە سەكتوردا لايىقتى ەڭبەك ەتىپ ءجۇر. سونداي-اق، الماتىدا «سوربوننا-قازاقستان» ينستيتۋتىنىڭ جەمىستى جۇمىسىن اتاپ وتكەن ءجون. قازاقستاننىڭ بىرنەشە قالاسىندا «اليانس-فرانسەز» مادەني-ءبىلىم بەرۋ اگەنتتىگىنىڭ وكىلدىكتەرى جۇمىس ىستەيدى. مۇنىڭ ءبارى ەلدەرىمىزدىڭ مادەني-گۋمانيتارلىق سالاداعى ىنتىماقتاستىعىنىڭ ناقتى ناتيجەسى ەكەنى ءسوزسىز»، – دەدى سەنات توراعاسى.

ودان بولەك، ماۋلەن اشىمباەۆ قازاقستان پارلامەنتىنىڭ سەناتى ەكىجاقتى ىنتىماقتاستىققا قاتىستى وسى جانە باسقا دا ماسەلەلەر بويىنشا ءتيىستى جۇمىستاردى اتقارىپ، قازاقستان مەن فرانتسيا اراسىنداعى قارىم-قاتىناستى ءارى قاراي نىعايتۋعا ىقپال ەتۋدى جالعاستىرا بەرەتىنىن جەتكىزدى.

سوڭعى جاڭالىقتار

قازاقستاندا جاڭا كەن ورنى تابىلدى

ەكونوميكا • بۇگىن، 16:21

ەڭ سۇلۋ ۆولەيبولشى كىم؟

سپورت • بۇگىن، 16:15

ەل قورعاعان ەردىڭ ەسىمى جاڭعىردى

رۋحانيات • بۇگىن، 14:49

كورشىنىڭ كوپ-كورىم كومەگى

قوعام • بۇگىن، 14:23

ۇقساس جاڭالىقتار