ءاليحان بوكەيحاننىڭ ەسىمىن ماڭگى ەستە قالدىرۋ, تاريحي-مادەني مۇراسىن ساقتاۋ ماقساتىندا قازاقستاننىڭ «اق جول» دەموكراتيالىق پارتياسى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «الاش» مادەنيەت جانە رۋحاني دامۋ ينستيتۋتىمەن جانە «اۋىل شارۋاشىلىعى ارداگەرلەرىنىڭ كەڭەسى» قوعامدىق بىرلەستىگىمەن بىرلەسە وتىرىپ, بىرقاتار ءىس-شارانى جۇزەگە اسىرۋدا.
اتاپ ايتقاندا, ءا.بوكەيحاننىڭ 155 جىلدىق مەرەيتويى قارساڭىندا بۋراباي كۋرورتتىق ايماعىندا ورنالاسقان قازاقستانداعى جالعىز ورمان شارۋاشىلىعى جانە اگروورمان شارۋاشىلىعى عىلىمي-زەرتتەۋ ينستيتۋتىنا العاشقى ۇلتتىق عالىم-ورمانشىنىڭ ەسىمى بەرىلدى.
بۇگىنگى تاڭدا بۇرىنعى يمپەراتورلىق ورمان ينستيتۋتىنىڭ باس وقۋ كورپۋسىنىڭ – بۇگىنگى سانكت-پەتەربۋرگ مەملەكەتتىك ورمان تەحنيكالىق ۋنيۆەرسيتەتى عيماراتىنىڭ قابىرعاسىنا ونىڭ ۇزدىك تۇلەكتەرىنىڭ ءبىرى – ءاليحان بوكەيحانعا ارنالعان مەموريالدىق تاقتا ورناتۋ ماسەلەسى قولعا الىندى.
اتالعان جوعارى وقۋ ورنىنىڭ باي كىتاپحاناسىنا ءاليحان بوكەيحاننىڭ 15 تومدىق شىعارمالار جيناعى سىيعا تارتىلدى. ول «الەۋمەتتىك ماڭىزدى ادەبيەت» مەملەكەتتىك باعدارلاماسى اياسىندا جارىق كورگەن.
سونىمەن قاتار ءاليحان بوكەيحاننىڭ تاريحي-مادەني مۇراسىن ساقتاۋدا اۋقىمدى ىستەر اتقارىلعانىمەن, ونىڭ عىلىمي مۇراسىن زەرتتەۋ ماسەلەسى, قازىرگى جەتەكشى اۋىل شارۋاشىلىعى عالىمدارىنىڭ پىكىرىنشە, جەتە ەسكەرىلمەي وتىر. ويتكەنى كورنەكتى قايراتكەردىڭ قازاقتاردىڭ ەگىن جانە مال شارۋاشىلىعى بويىنشا, ونىڭ ىشىندە قوي شارۋاشىلىعى مەن جىلقى شارۋاشىلىعى تۋرالى ستاتيست-عالىمدار ف.ششەربينا (1897-1901 جج.) مەن س.شۆەتسوۆتىڭ (1902-1903 جج.) باسشىلىعىمەن بىرقاتار عىلىمي ەكسپەديتسيا قۇرامىندا جۇرگىزگەن ىرگەلى زەرتتەۋلەرى بار. سونداي-اق 1926 جىلى قازاق اسسر-ءىنىڭ اداي اۋدانىن (قازىرگى اتىراۋ, ماڭعىستاۋ, باتىس قازاقستان جانە اقتوبە وبلىستارى) زەرتتەگەن كسرو عىلىم اكادەمياسىنىڭ انتروپولوگيالىق ەكسپەديتسياسىنا قاتىسقان.
ءاليحان بوكەيحاننىڭ كەيىنگى ۇرپاققا قالدىرعان باي مۇراسى, اسىرەسە ىرگەلى زەرتتەۋلەرى قازاقستان رەسپۋبليكاسىنىڭ زياتكەرلىك مەنشىگىن قۇرايتىنى ءسوزسىز. سوندىقتان ونىڭ عىلىمي ەڭبەكتەرىن جان-جاقتى تالداۋ ەگەمەن ەلىمىزدىڭ اۋىل شارۋاشىلىعى سالاسىن دامىتۋ ىسىندە پايداسى ءتيۋى ابدەن مۇمكىن.
ءوزىنىڭ بۇكىل سانالى ءومىرىن حالقىمىزدىڭ بوستاندىعى, قازاق ۇلتتىق مەملەكەتىنىڭ قايتا وركەندەۋى مەن تاۋەلسىزدىگى ءۇشىن كۇرەسكە ارناعان ءاليحان بوكەيحاننىڭ باي مۇراسىن ەل يگىلىگىنە, وسكەلەڭ ۇرپاققا پاتريوتتىق تاربيە بەرۋ ىسىندە بارىنشا پايدالانا بىلگەنىمىز ءجون.
مايكەن ازەنوۆ,
اۋىل شارۋاشىلىعى عىلىمدارىنىڭ كانديداتى
