اباي • 22 اقپان، 2021

ۇلى ابايدى قازاقشا سويلەتكەن مارات اعاي

47 رەت كورسەتىلدى

تەاتر – كۇردەلى ينتەللەكتۋالدىق گارمونيادان تۇراتىن، ءۇش جاقتان بىردەي قيىننان قيىسقان ساحنالىق ونەر. وسىناۋ كيەلى ساحنا تورىندە، ۇلى تۇلعانىڭ بولمىسىنا ەنىپ ءومىرىن سومداۋ، كورەرمەن جۇرەگىنەن ورىن الۋ  ۇلكەن ونەردى قاجەت ەتەتىنى انىق. شىمكەنت قالالىق وپەرا جانە بالەت تەاترى ساحناسىندا «اباي» وپەراسىنىڭ باستى كەيىپكەرى ورازمەتوۆ مارات ءومىرحان ۇلى جايلى بىلەسىز بە؟ ەندەشە ايتايىق!

مارات ءومىرحان ۇلى «دراما اكتەرى جانە ەسترادالىق ءان ورىنداۋشى» ماماندىعى بويىنشا بىلىكتىلىك الىپ، ەڭبەك جولىن 2000 جىلى «تۇركىستان سازدى دراما تەاترىندا» اكتەرلىك قىزمەتىن اتقارۋدان باستادى. اتالمىش تەاتردا رەسپۋبليكامىزعا تانىمال بولعان ب.ۆاحاپزادەنىڭ «كوك تۇرىكتەر» تاريحي دراماسىندا – قارا قاعان، ر.سەيتمەتوۆتىڭ «حان كەنە» دراماسىندا – كەنەسارى حان، ر.سەيتمەتوۆتىڭ «پرەزيدەنتتىڭ جۇرەگى» دراماسىندا – پرەزيدەنت ءرولىن، ج.شانين اتىنداعى وبلىستىق قازاق دراما تەاترىنىڭ ساحناسىندا م.قاسەنوۆتىڭ «پاي-پاي جاس جۇبايلار-اي» كومەديسىندا – ەسەتتىڭ، ە.قويباعاروۆتىڭ «بالا مەن قايىرشى» دراماسىندا – قايىرشى مەن اكەنىڭ جانە د.كينوسيتونىڭ «تىرنا ۇلپالارى» جاپون دراماسىندا – ۋندزۋ، ب.ەسەناليەۆتىڭ «مۇحاممەد حايدار دۋلاتي» تاريحي دراماسىندا – مۇحاممەد حايداردىڭ، د.يسابەكوۆتىڭ «مۇڭلىق-زارلىق» دراماسىندا – باس ءۋازىر بارىن، 2012 جىلدان باستاپ وڭتۇستىك قازاقستان وبلىستىق ءازىل-سىقاق جانە ساتيرا تەاترىندا  س.احمادتىڭ «كەلىندەر كوتەرىلىسىندە» - ماحكام، د.يسابەكوۆتىڭ «بوناپارتتىڭ ۇيلەنۋىندە» - ءرات اقساقال، ن.قاديروۆتىڭ «كارىلىگىمدى ساعىندىم» كومەدياسىندا – رايىم، ۋ.ابدرايموۆتىڭ «ۇستازىم مەنىڭ» اتتى سازدى – دۋماندى قويىلىمىندا – فيزيكا مۇعالىمى، ر.وتارباەۆتىڭ «قاراشا قازدار قايتقاندا» تاريحي دراماسىندا – داۋلەت بولىس، ۋ.ابدرايموۆتىڭ «ىنتىماق اۋەندەرى» اتتى قويىلىمىندا – گاجدانبەك، ي.سوديكوۆتىڭ «اپەندىنىڭ بەس قاتىنى» كومەدياسىندا – قادىر، ە.برۋسيلوۆسكي مەن ل.ءحاميديدىڭ «قىز جىبەك» - بەكەجان، ۋ.گادجيبەكوۆتىڭ «ارشىن مال الان»  - سۇلتانبەك، س.مۇحامەدجانوۆتىڭ «ايسۇلۋ» - سەركە، ە.راحماديەۆتىڭ «قامار سۇلۋ» - نۇرىم، ر.لەونكوۆاللو «پاياتسى» - سيلۆيو، دج.ۆەرديدىڭ «ريگولەتتو» - مونتەرونە  سەكىلدى ءبىراز رولدەردى سومدادى.

وسىناۋ ساحنالىق قويىلىمدار اراسىندا جانىنا جاقىنى ل.حاميدي، ا.جۇبانوۆتىڭ «اباي» وپەراسى. نەگە دەسەڭىز؟ «ابايشا سويلەۋ، ويلاۋ، ءبىر ساتكە بولسا دا ۇلى تۇلعانى جۇرەكپەن ءتۇسىنىپ، جۇرەككە جەتكىزۋ ءبىر باقىت»  دەيدى مارات ءومىرحان ۇلى.

جىلدار بويى اتقارعان قاجىرلى ەڭبەگىنىڭ ارقاسىندا 1997 جىلى قازىعۇرت اۋدانىندا وتكەن وبلىستىق «كۇلكى جارمەڭكەسى» بايقاۋىندا ءىى ورىندى، 1999 جىلى استانا قالاسىندا وتكەن و.بوكەي اتىنداعى رەسپۋبليكالىق «كوركەم ءسوز وقۋ شەبەرلەرىنىڭ» بايقاۋىندا ءى ورىندى يەمدەنسە، 2015 جىلى وتكەن قازاق حاندىعىنىڭ 550، ۇلى جەڭىستىڭ 70 جىلدىعىنا ارنالعان «تەاتر كوكتەمى - 2015» وبلىستىق تەاتر فەستيۆالىندە جوعارى دەڭگەيدە ونەر كورسەتكەنى ءۇشىن «ەڭ ۇزدىك ەر ادام ءرولى» نوميناتسياسىن قانجىعاسىنا بايلاعان.

5

مارات ءومىرحان ۇلى بۇگىندە «شىمكەنت قالالىق مادەنيەت ءۇيى» كونتسەرتتىك ۇيىمى» مكقك ديرەكتورىنىڭ شىعارماشىلىق جونىندەگى ورىنباسارى قىزمەتىن اتقارىپ كەلەدى.

ەگەر ءسىز، ساحناداعى ابايدى كورگىڭىز كەلسە، مىندەتتى تۇردە شىمكەنت قالالىق وپەرا جانە بالەت تەاترىنىڭ قويىلىمدارىن نازاردا ۇستاڭىز. ناعىز تالانتتى كوزبەن كورۋ، «اباي» وپەراسىن سەزىنۋ ەرەكشە سەزىم. 

سوڭعى جاڭالىقتار

75،7 ملن ادام ايتۆ جۇقتىردى

مەديتسينا • كەشە

2021 جىلعى ورازا كەستەسى

رۋحانيات • كەشە

ۇقساس جاڭالىقتار