ناۋرىزدىڭ التىسى مەن جەتىسى كۇندەرى كورەرمەن قاۋىم ەلىمىزدىڭ ۇزدىك بالەت تەاترلارى سوليستتەرىنىڭ ورىنداۋىندا كلاسسيكالىق حورەوگرافيا جاۋھارلارىمەن قاتار, قازىرگى زامانعى وزەكتى ەكسپەريمەنتتەرمەن دە تانىسا الادى.
«استانا بالەت» تەاترىنىڭ ساحناسىندا ونەر كورسەتەتىندەر: فارحاد بوريەۆ, قازبەك احمەدياروۆ, تاتيانا تەن, ايجان مۇقاتوۆا, سۇندەت سۇلتانوۆ («استانا بالەت» تەاترىنىڭ جەتەكشى سوليستتەرى), باحتيار ادامجان («استانا وپەرا» تەاترىنىڭ پرەمەرى), جانەل توكەەۆا, ماليكا ەلشىباەۆا, راحىم دايىروۆ (ۇاوبت جەتەكشى سوليستتەرى) جانە ت.ب.
«گالا-كونتسەرتتىڭ باعدارلاماسى, قاتىساتىن ارتىستەرىڭ قۇرامى وتە مۇقيات تاڭدالادى. بۇل ۇزدىكسىز شىعارماشىلىق ءۇردىس بولعاندىقتان, باعدارلامانىڭ مازمۇنىن, وعان قاتىساتىن ارتىستەردىڭ ەسىمىن سوڭعى ساتكە دەيىن قۇپيا ۇستايمىز. ارينە, تەاترىمىزدىڭ ساحناسىندا ەلىمىزدەگى بالەت ونەرىنىڭ ساڭلاقتارى ونەر كورسەتەتىنى ءبىز ءۇشىن زور ماقتانىش. كورەرمەنىمىز ءۇشىن, بۇل — دارىندى جۇلدىزداردى كوزبەن كورۋ مۇمكىندىگى عانا ەمەس, سان-الۋان سپەكتاكلدەردىڭ ۇزىندىلەرىن تاماشالاۋ باقىتى, دەر ەدىم», دەپ اتاپ ءوتتى, «استانا بالەت» تەاترىنىڭ كوركەمدىك جەتەكشىسى نۇرلان كانەتوۆ.
اتالعان ءىس-شارا مادەنيەت جانە سپورت مينيسترلىگىنىڭ قولداۋىمەن, ەل تاۋەلسىزدىگىنىڭ 30 جىلدىعى اياسىندا وتەدى. ەستەرىڭىزگە سالا كەتەيىك, ناۋرىز ايىندا ەلوردالىق تەاتر تاعى ەكى باعدارلامانى ۇسىنباقشى: 12-13 ناۋرىزدا «ۆالپۋرگيەۆ ءتۇنى» جانە «GAIA» ءبىر اكتىلى سپەكتاكلدەرى, ال, ناۋرىز مەيرامىنا وراي, 20-ناۋرىزدا «ۇلتتىق بالەت كەشى» وتەدى.
