كەزدەسۋ بارىسىندا ۆەدومستۆو باسشىسى وبلىس ەكولوگياسىن جاقسارتۋ بويىنشا بەلگىلەنگەن جوسپارلاردى ءتيىمدى ىسكە اسىرۋ ءۇشىن بىرلەسكەن جۇمىستى كۇشەيتۋدىڭ ماڭىزدىلىعىنا توقتالدى.
ء«بىزدى ايماقتاعى ەكولوگيالىق جاعداي الاڭداتادى. اتىراۋ ەلىمىزدىڭ ەڭ لاستانعان قالالارىنىڭ قاتارىنا كىرەدى. ارينە, بۇل جاعدايدى جاقسارتۋ قاجەت. بۇل ماڭىزدى جۇمىستا ءسىز سياقتى بەلسەندى ازاماتتار تاراپىنان قولداۋ, كومەك قاجەت. مەن قاشاندا سىندارلى ديالوگقا اشىقپىن جانە اشىق بولا بەرەمىن», - دەپ اتاپ ءوتتى مينيستر.
ماعزۇم مىرزاعاليەۆ اتىراۋ وبلىسىنىڭ ەكولوگيالىق پروبلەمالارىن شەشۋ ءۇشىن 40 ءىس-شارادان تۇراتىن جول كارتاسى ازىرلەنگەنىن اتاپ ءوتتى. ولاردىڭ قاتارىندا جاڭا كارىزدىك تازارتۋ كەشەندەرىن سالۋ جانە ەسكىلەرىن قالپىنا كەلتىرۋ, «ساسىق ساي» جانە «شارشى» بۋلانۋ الاڭدارىن رەكۋلتيۆاتسيالاۋ, ورال وزەنىنىڭ باسسەينىن كوگالداندىرۋ, تازارتۋ, ساۋىقتىرۋ جانە باسقا دا ماڭىزدى ءىس - شارالار بار.
ء«بىز اتىراۋدىڭ ەكولوگتارىمەن, قوعام وكىلدەرىمەن بىرنەشە رەت كەزدەستىك. كەزدەسۋلەرىمىزدىڭ ناتيجەسى جول كارتاسىن قابىلداۋ بولدى. جاڭا ەكولوگيالىق كودەكس تە وسى باعىتتا پەرسپەكتيۆالى مۇمكىندىكتەر اشاتىنىن اتاپ وتكىم كەلەدى. ەڭ ماڭىزدىلارىنىڭ ءبىرى – كودەكس ءىرى لاستاعىشتاردىڭ الەۋمەتتىك جاۋاپكەرشىلىگىن ارتتىرۋعا مۇمكىندىك بەرەدى», - دەپ تولىقتىردى ەكولوگيا ءمينيسترى.
ونىڭ ايتۋىنشا, قازىردىڭ وزىندە 1-ساناتقا جاتاتىن كوپتەگەن كاسىپورىندار ەڭ وزىق قولجەتىمدى تەحنولوگيالاردى ەنگىزۋ بويىنشا دايىندىق شارالارىن جۇرگىزۋدە, دەمەك, بولاشاقتا اتموسفەراعا لاستاۋشى زاتتاردىڭ شىعارىندىلارى ايتارلىقتاي ازايادى.
سونىمەن قاتار, مينيستر اتىراۋدا ءوڭىردىڭ بارلىق نەگىزگى ەكولوگيالىق پروبلەمالارىن تىركەۋ بويىنشا فرونت-وفيس اشۋدى ۇسىندى.
«بىرلەسكەن جۇمىس ءۇشىن كوپتەگەن قۇرالدار بار. ءبىزدىڭ مينيسترلىك جاقىندا قۇرىلدى. ءبىر جارىم جىل ىشىندە اۋقىمدى جۇمىس اتقارىلدى, ەكولوگيالىق ماسەلەلەردى شەشۋدىڭ تەتىگى جاسالدى. ۋاقىت وتە كەلە ءبىز جول كارتاسىنىڭ, جاڭا ەكولوگيالىق كودەكستىڭ تارماقتارىن ىسكە اسىرۋدىڭ ءتيىمدى ناتيجەلەرىن كورەتىنىمىزگە سەنىمدىمىن», - دەپ تۇيىندەدى ماعزۇم مىرزاعاليەۆ.
