ساپاردا مەملەكەتتىك حاتشىمەن بىرگە الماتى وبلىسىنىڭ اكىمى اماندىق باتالوۆ, الماتى قالاسىنىڭ اكىمى باقىتجان ساعىنتاەۆ, قر مادەنيەت جانە سپورت ءمينيسترى اقتوتى رايىمقۇلوۆا, جازۋشىلار وداعىنىڭ توراعاسى ۇلىقبەك ەسداۋلەت بىرگە ءجۇرىپ, قاراساي جانە جامبىل اۋداندارىنداعى بىرقاتار الەۋمەتتىك-مادەني نىسانداردا بولدى.
رەسمي وكىلدەر الدىمەن ۇشقوڭىر اۋىلىندا اشىلعان قازاقستان رەسپۋبليكاسى تۇڭعىش پرەزيدەنتى – ەلباسىنىڭ «اتامەكەن» تاريحي-مادەني ورتالىعىنا اتباسىن تىرەدى. مۇندا ەلباسى نۇرسۇلتان ءابىش ۇلى نازارباەۆتىڭ قازاقستاننىڭ تاۋەلسىزدىككە قول جەتكىزۋىندەگى, تاۋەلسىزدىكتى قالىپتاستىرۋداعى, ىشكى-سىرتقى ساياساتتى بەكەمدەۋدەگى تاريحي ءرولىن ايشىقتايتىن مۋزەيلىك ەكسپوزيتسيالارمەن تانىستى. مۋزەيدىڭ ارنايى تىلەك كىتاپشاسىنا مەملەكەتتىك حاتشى ءوز قولتاڭباسىن قالدىردى.
سول سياقتى مەملەكەتتىك حاتشى «رۋحاني جاڭعىرۋ» باعدارلاماسى بويىنشا «تۋعان جەر» جوباسىنىڭ اياسىندا سالىنعان «ۇشقوڭىر» دەنە شىنىقتىرۋ-ساۋىقتىرۋ كەشەنىندە بولدى. كەشەن ىشىندەگى باسسەيندى, سپورت زالدارىن ارالاپ, دالاداعى فۋتبول الاڭىن كورىپ, سپورتتىق جاتتىعۋلار مەن ويىنداردىڭ بارىسىنا كۋا بولدى.
وسى كۇنى ق. كوشەرباەۆ ج.جاباەۆتىڭ ادەبي-مەموريالدى مۋزەيىنە دە ارنايى باردى. الدىمەن مۋزەي الدىنا قويىلعان اقىننىڭ ەسكەرتكىشىنە گۇل شوقتارىن قويىپ, تاعزىم ەتتى. جىر الىبىنىڭ ءوزى تۇرعان ءۇي مۋزەي رەتىندە جابدىقتالعان. ونىڭ ىشكى بولمەلەرىن, اقىننىڭ تۇتىنعان بۇيىمدارىن, مۋزەي قابىرعاسىنا جاعالاي ىلىنگەن ءومىرى مەن تۆورچەستۆوسى تۋرالى جادىگەرلەردى تاماشالادى. وبلىس اكىم اماندىق باتالوۆتىڭ ايتۋىنشا, ادەبي مۋزەي كەيىنگى جىلدارى كەڭەيتىلىپ, قوسالقى عيماراتپەن تولىقتىرىلعان. وسى ارادا وبلىس باسشىسى بيىلعى مەرەيتويلارىنا بايلانىستى جەتىسۋ ءوڭىرى ارنايى شىعارعان جامبىل مەن مۇقاعالي اقىنداردىڭ كىتاپتارىن قوناقتارعا سىيعا تارتتى.
جينالعاندار ج. جاباەۆتىڭ جانە ونەردەگى ءپىرى, رۋحاني ۇستازى ءسۇيىنباي ارون ۇلىنىڭ, كومپوزيتور ءارى ديريجەر نۇرعيسا تىلەنديەۆتىڭ زيراتتارىنا ءتاۋ ەتتى.
ساپار قورىتىندىسىندا قر مەملەكەتتىك حاتشىسى قىرىمبەك كوشەرباەۆ ەپيك اقىننىڭ 175 جىلدىق مەرەيتويلىق ءىس-شارالارىن ۇيىمداستىرۋ ءۇشىن ارنايى مەملەكەتتىك كوميسسيا قۇرىلعانىن, كەلەسى اپتادا كوميسسيانىڭ ءبىرىنشى وتىرىسى وتەتىنىن ايتتى.
- بارىمىزگە بەلگىلى, 28 اقپان – الىپ اقىننىڭ تۋعان كۇنى. سونىڭ قارساڭىندا مەرەيتويلىق ءىس-شارالار نۇر-سۇلتان قالاسىندا باستالىپ, قازاقستاننىڭ بارلىق وڭىرلەرىندە جانە شەت ەلدەردە جاپپاي وتكىزىلەتىن بولادى. بۇگىن ءبىز ەلباسىنىڭ جانە پرەزيدەنتتىڭ تاپسىرمالارىمەن الماتى وبلىسىنا ارنايى كەلىپ, جامبىل اتامىزدىڭ باسىنا ءتاۋ ەتىپ, ءىس-شارالاردىڭ العاشقى قادامىن باستاپ وتىرمىز. وتكەن جىلى حاكىم ابايدىڭ 170 جىلدىعىن اتاپ وتسەك, بيىل جامبىل بابامىزدىڭ مەرەيلى جىلى. ەكەۋى دە ءبىر داۋىردە, ءبىر زاماندا ءومىر سۇرگەن – الىپتار. جامبىل اقىندى ايتىس ونەرىنىڭ شىڭىندا تۇر دەسەك, ونىڭ سونداي بيىككە ورلەۋىنە ىقپال ەتكەن, ءوزى ء«پىرىم» دەيتىن - ءسۇيىنباي ارون ۇلى. سوندىقتان XXI عاسىردىڭ ءتۇرلى ءۇن قاتۋلارىنا لايىقتى جاۋاپ بەرۋ ءۇشىن ءبىز وسىنداي ۇلكەن رۋحاني ساباقتاستىق پەن يگى ءداستۇردى جالعاستىرا وتىرىپ, ءوزىمىزدىڭ رۋحاني باستاۋلارىمىزدى, ۇلى تۇلعالارىمىزدى تانىپ-ءبىلۋىمىز كەرەك, - دەدى قىرىمبەك كوشەرباەۆ.
اتاپ وتسەك, الماتى وبلىسىندا جامبىل جاباەۆتىڭ مەرەيتويىنا بايلانىستى ءىس-شارالار جوسپارى ازىرلەنگەن. وندا اقىن تۋرالى بيوگرافيالىق ءفيلمنىڭ ءتۇسىرىلىمى, ءومىرى مەن شىعارماشىلىعىنا قاتىستى كىتاپتار شىعارۋ, اقىندار ايتىسىن وتكىزۋ, مادەني ەسكەرتكىشتەر ورناتۋ, سۋرەتشىلەردىڭ حالىقارالىق پلەنەرىن وتكىزۋ جانە ت.ب. شارالار قاراستىرىلعان.
