ەل نازارىن وزىنە اۋدارعان, جاس ۇرپاقتىڭ تاربيەسىنە ءتاپ-ءتاۋىر اسەر ەتەتىن قايىرىمدىلىق شاراسىنا ىسكەر ايەلدەر قاۋىمداستىعى جۇمىلا كىرىستى. شاعىن اۋىل تۇرعىندارى بۇل باستاماعا تۇسىنىستىكپەن قارادى. ەشكىم ىشەرگە اس تاپپاي وتىرماسا دا, جانىڭدا جاناشىر ادامداردىڭ بولعانى قانداي جاقسى. كوڭىل دەمەيدى, سەنىمدى ارتتىرادى. ال قۇراقتاي جەلكىلدەپ ءوسىپ كەلە جاتقان جاس بالالار بۇرىننان ساباقتاسىپ كەلە جاتقان اتا ءداستۇردىڭ ارتىقشىلىعىن, عاجايىپ مازمۇنىن زەرەك كوڭىلدەرىنە توقيدى. وسە كەلە ءوز اتا-اناسى عانا ەمەس, وزگە دە ادامدارعا قايىرىمدى بولىپ جۇرەدى. سايىپ كەلگەندە, بىرلىك بەكىپ, بەرەكە ارتا تۇسپەك.
– وسى مەكتەپتە ءتورت جىل جۇمىس ىستەدىم, تاربيە جۇمىسىمەن اينالىستىم, – دەيدى ىسكەر ايەلدەر قاۋىمداستىعىنىڭ مۇشەسى كۇلبارشىن سەيپىنوۆا. بۇل اراداعى باستى مىندەت – ادامداردىڭ قوعام ىزگىلىگىن سەزىنۋى. ونكۇندىك اياسىندا كوپ بالالى, جالعىزىلىكتى ون شاقتى وتباسىعا ازىق-ت ۇلىك سەبەتتەرى بەرىلدى. ارقايسىسىنىڭ قۇنى 30-35 مىڭ تەڭگە كولەمىندە. ماڭىزدىسى ول دا ەمەس, ىزگىلىكتى شارانى ۇيىمداستىرۋ ارقىلى مەكتەپتە ءبىلىم الىپ جاتقان 137 وقۋشىنىڭ ارقايسىسى حالقىمىزدىڭ قايىرىمدىلىق دەگەن قاستەرلى قاسيەتىنىڭ ءمانىن تۇسىنەتىن بولدى.
كوڭىل ەلجىرەتەتىن ىسكە دەمەۋشى بولعاندار وزدەرىنىڭ اتى-جوندەرىن جارنامالاعاندى قالامايدى. «جاقسىلىق جاساساڭ ايعايلاپ ايتۋ مىندەتتى ەمەس» دەيدى ولار. ءبىز دە سول پىكىرگە قوسىلدىق. ەڭ باستىسى, قازىرگى كۇنى شەت جايلاپ شالعايدا جۇرسە دە تۋعان اۋىلدارىنىڭ ءتۇتىنىن ءتۇزۋ ۇشىرسام دەگەن پەرزەنتتىك پەيىلدىڭ مولدىعىن كوردىك. «ساباقتى ينە ساتىمەن» دەگەندەي, ەلجاندى ازاماتتاردىڭ بولمىسىن كەيىنگىلەر ۇقسا بولعانى.
اقمولا وبلىسى,
زەرەندى اۋدانى
