رۋحانيات • 18 اقپان، 2021

ماۋلەن اشىمباەۆ: تاقسىرەتتى كەزەڭدى ۇلت جادىندا ساقتاۋ ماقساتىندا «ازا سارايى» مەموريال-كەشەنى بوي كوتەرەدى

384 رەت كورسەتىلدى

ءبىزدىڭ الدىمىزدا تۇرعان ەڭ نەگىزگى مىندەت – تاۋەلسىزدىكتى نىعايتۋ. ول ءۇشىن ۇلتتىڭ تاريحي ساناسىن جاڭعىرتۋ اسا ماڭىزدى. بۇل تۋرالى سەنات توراعاسى ماۋلەن اشىمباەۆ ءوزىنىڭ Facebook پاراقشاسىندا جازدى، دەپ حابارلايدى Egemen.kz

«تاريحي سانانى جاڭعىرتۋ – حالقىمىزدىڭ داۋىرلەگەن كەزەڭدەرىمەن بىرگە، «تار جول تايعاق كەشۋلەرىن» دە ۇمىتپاي، وزىق تۇستارىمىزدان ونەگە تاۋىپ، قينالعان ساتتەردەن قورىتىندى شىعارۋ دەگەن ءسوز. وسى رەتتە شەجىرەمىزگە قاسىرەتتى جىلدار رەتىندە جازىلعان اشارشىلىق تاقىرىبىن كوتەرۋ وتە ورىندى. اسىرەسە ازاتتىقتىڭ 30 جىلدىعى اياسىندا اتالعان اقتاڭداقتى زەرتتەۋگە باسىمدىق بەرىلۋىن زاڭدى دەپ قابىلدايمىز. ويتكەنى بۇل ماسەلەدە ءالى دە بولسا اشىلماعان اششى اقيقاتتار از ەمەس»، دەيدى سەنات توراعاسى.
 
وسى ورايدا ماۋلەن اشىمباەۆ الداعى ۋاقىتتا مەملەكەتتىڭ قولداۋىمەن وسى باعىتتاعى جۇيەلى جانە كەشەندى جۇمىستار جالعاسا بەرەتىنىن باسا ايتتى.
 
«بۇعان پرەزيدەنتىمىز باسا ءمان بەرىپ وتىر. سوعان سايكەس عىلىمي ينستيتۋتتاردى جۇمىلدىرۋ، ارحيۆ ماتەريالدارىنا قولجەتىمدىلىكتى قامتاماسىز ەتۋ، اقپاراتتىق قولداۋ كورسەتۋ سياقتى باعىتتار بويىنشا ءتيىستى مينيسترلىكتەرگە تاپسىرمالار بەرىلدى. وسىنداي ماسەلەلەردى تالقىلاۋ ءۇشىن پارلامەنت سەناتى مەملەكەت تاريحى جانە ش.ءۋاليحانوۆ اتىنداعى تاريح جانە ەتنولوگيا ينستيتۋتتارىمەن بىرلەسىپ، وسى اپتادا ارنايى دوڭگەلەك ۇستەل وتكىزگەنى بەلگىلى. ءىس-شارا بارىسىندا اتالعان باعىتتا اتقارىلۋعا ءتيىس شارالار جان-جاقتى ءسوز بولدى»، دەدى ماۋلەن اشىمباەۆ. 
 
سەنات توراعاسىنىڭ ايتۋىنشا، زەرتتەۋ جۇمىستارى كەزىندە، الدىمەن، اشارشىلىق قۇرباندارىن تۇگەندەۋدىڭ جانە ولاردىڭ ناقتى سانىن انىقتاۋدىڭ ماڭىزى زور.
 
«ارينە، قۇربانداردىڭ اتى-جوندەرىن انىقتاۋ وڭاي شارۋا ەمەس. ول ءۇشىن مۇمكىندىگىنشە ءار اۋلەتتىڭ شەجىرەسىن دە ءجىتى زەردەلەگەن ءجون. بۇل جۇمىسقا وڭىرلەردەگى ۋنيۆەرسيتەتتەردىڭ ۇستازدارى مەن ستۋدەنتتەرىن دە جۇمىلدىرعان دۇرىس بولار ەدى. الاپات اشتىققا ارنالعان دوڭگەلەك ۇستەل بارىسىندا عالىمدار تاراپىنان وسىنداي ويلار ايتىلدى. سونىمەن قاتار وسى ناۋبەتتى باستان وتكەرگەن كۋاگەرلەردىڭ ەستەلىكتەرىن جيناۋ دا كوپ جايتتى انىقتاۋعا سەپتىگىن تيگىزەدى. ماسەلەن، مەكەمتاس مىرزاحمەت ۇلى اعامىزدىڭ «قۇنداقتاعى قارىنداسى» جايلى ايانىشتى وقيعاسى كوپشىلىككە بەلگىلى. ەل اراسىندا ايتىلىپ جۇرگەن وسىنداي ەستەلىكتەردى جازىپ الۋىمىز كەرەك. سەبەبى، بۇل جادىمىزدى جاڭعىرتۋعا تىڭ سەرپىن بەرەتىن نەگىزگى تەتىكتەردىڭ ءبىرى»، دەدى سەنات توراعاسى ماۋلەن اشىمباەۆ.
 
وتكىزىلگەن ءىس-شارا قورىتىندىسى بويىنشا عالىمدارىمىز بەن زيالى قاۋىم وكىلدەرى ايتقان پىكىرلەردىڭ نەگىزىندە ارنايى ۇسىنىمدار دايىندالدى جانە ول ءتيىستى مەملەكەتتىك ورگاندارعا جولدانادى. وندا جوعارىدا ايتىلعان ماسەلەلەرمەن بىرگە، بىرقاتار ۇسىنىستار كورسەتىلگەن. اتاپ ايتقاندا، اشتىق سالدارىن انىقتاۋ، قۇربانداردىڭ تسيفرلىق بازاسىن جاساۋ، شەتەل ارحيۆتەرىندەگى قۇجاتتاردى زەردەلەۋ، ەلدەن بوسىپ كەتۋگە ءماجبۇر بولعانداردىڭ كەيىنگى تاعدىرلارىنا نازار اۋدارۋ جانە ناقتى دەرەكتەرگە سۇيەنگەن كىتاپتار شىعارۋ، فيلمدەر ءتۇسىرۋ، تەاترلىق قويىلىمداردى ساحنالاۋ سياقتى باستامالار بار.
 
«تاقسىرەتتى كەزەڭنىڭ تاۋقىمەتىن ۇلت جادىندا ساقتاۋ، اسىرەسە، جاستارىمىزدىڭ ساناسىنا ءسىڭىرۋ ماقساتىمەن «ازا سارايى» مەموريال-كەشەنىن سالۋ جۇمىستارى دا نازاردان تىس قالمادى. مۇنىڭ ءبارىن اشارشىلىق جىلدارىندا قۇربان بولعان بابالار رۋحىنا تاعزىم ەتۋگە ارنالعان شارالار دەپ قابىلدايمىز. الداعى ۋاقىتتا وسى باعىتتار بويىنشا جۇيەلى جۇمىستار قولعا الىنادى دەپ سەنەمىز. بارلىق ءىس-ارەكەت سەناتتىڭ قولداۋىمەن جانە سەناتورلاردىڭ باقىلاۋىمەن ىسكە اسىرىلاتىنىن اتاپ وتكىم كەلەدى. شىن مانىندە، بۇل باستامالار ەلدىگىمىزدىڭ ەڭسەلى، ەگەمەندىگىمىزدىڭ ماڭگىلىك بولۋىنا ءوز ۇلەسىن قوساتىن ماڭىزدى دۇنيە ەكەنى ءسوزسىز. وسى جازباعا سول دوڭگەلەك ۇستەلدە سويلەگەن قورىتىندى ءسوزىمنىڭ ۆيدەو نۇسقاسىن قوسىپ وتىرمىن. وندا اشارشىلىق تاقىرىبىن زەرتتەۋ كەزىندە ەسكەرىلۋى كەرەك شارالار قامتىلعان»، دەپ تۇيىندەدى سەنات توراعاسى.
سوڭعى جاڭالىقتار

نار نارىمبەتوۆ ەدى...

قازاقستان • كەشە

«وميكرون» شتامى وقشاۋلايدى

كوروناۆيرۋس • كەشە

پورترەتتەگى پاراسات

ەلباسى • كەشە

ۇقساس جاڭالىقتار