اگەنتتىكتىڭ حابارلاۋىنشا, قازاقستاننىڭ «تەرىستەن» «تۇراقتىعا» وزگەرۋى 2020 جىلعى سىرتقى جانە ىشكى شوكتاردان تۋىنداعان سىن-قاتەرلەردىڭ السىرەۋىنە بايلانىستى. 2020 جىلى قازاقستان ەكونوميكاسىنىڭ ءوسۋ قارقىنى – 2,6 پايىزدى قۇرادى. بۇل دامىعان ەلدەر توبىمەن (-5,4 پايىز) سالىستىرعاندا دا, دامۋشى ەلدەر توبىمەن (-5 پايىز) سالىستىرعاندا دا ايتارلىقتاي تۇراقتى كورسەتكىش بولىپ وتىر. اكرا 2021 جىلى ەكونوميكالىق ءوسىمنىڭ 3,8 پايىزعا دەيىن قالپىنا كەلۋىن بولجايدى.
«2021 جىلى اكرا ينفلياتسيانىڭ نىسانالى ءدالىز شەڭبەرىنە قايتا ورالۋىن كۇتۋدە (4-6 پايىز). بۇل ۇلتتىق ۆاليۋتاعا قىسىمنىڭ تومەندەۋىنە جانە 2020 جىلعى ينفلياتسيالىق سوققى اسەرىنىڭ سارقىلۋىنا بايلانىستى بولادى. بىلتىر تەڭگەنىڭ اقش دوللارىنا قاتىستى قۇنسىزدانۋى ورتا ەسەپپەن 8 پايىزدى قۇرادى جانە ول وتكەن داعدارىس كەزىندە تىركەلگەن دەڭگەيدەن ەداۋىر تومەن بولدى (2016 جىلى – 54 پايىز)» دەلىنگەن زەرتتەۋ حابارلاماسىندا.
اكرا بولجامىنشا, مەملەكەتتىك قارىزدىڭ تۇراقتى جانە ورتاشا دەڭگەيى قازاقستانعا بولاشاقتا كونترتسيكلدى بيۋدجەتتىك ساياساتتى قولدانۋعا مۇمكىندىك بەرەدى. اكرا اتاپ وتكەندەي, قوعامدىق ينستيتۋتتار دا, مەملەكەتتىك ينستيتۋتتار دا سوڭعى ۋاقىتتا وڭ وزگەرىستەردى بايقاتىپ وتىر.
وڭ اسەر ەتەتىن ۇزاق مەرزىمدى تاعى ءبىر فاكتور – ادام كاپيتالىن جاقسارتۋ. دۇنيەجۇزىلىك بانكتىڭ 2020 جىلعا ارنالعان باعالاۋى بويىنشا قازاقستاننىڭ ادام كاپيتالىنىڭ يندەكسى ورتالىق ازيا ەلدەرى بويىنشا ورتاشا دەڭگەيدەن جوعارى جانە سالىستىرىلاتىن ەلدەر توبىنىڭ رەيتينگ ساناتى بويىنشا ەڭ جوعارعىلاردىڭ ءبىرى.
ەسكە سالساق, اكرا 2015 جىلى قاراشا ايىندا رەسەي بانكىنىڭ شەشىمىمەن قۇرىلعان.
