ەكونوميكا • 16 اقپان، 2021

جەرگىلىكتى بيۋدجەتكە تۇسەتىن كىرىستەر بويىنشا جوسپارلار رەسپۋبليكانىڭ بارلىق وڭىرىندە اسىرا ورىندالدى

25 رەت كورسەتىلدى

قارجى ءمينيسترى ەرۇلان جاماۋباەۆ پرەمەر-مينيستر ا. ءماميننىڭ توراعالىعىمەن وتكەن ۇكىمەت وتىرىسىندا بيىلعى قاڭتاردا مەملەكەتتىك بيۋدجەتتىڭ اتقارىلۋ كورسەتكىشتەرى قالاي قالىپتاسقانى تۋرالى باياندادى، دەپ حابارلايدى Egemen.kz.

قارجى مينيسترلىگىنىڭ دەرەكتەرى بويىنشا، مەملەكەتتىك بيۋدجەتكە 526 ملرد تەڭگە سوماسىندا كىرىستەر ءتۇستى نەمەسە جوسپار 116،1%-كە اتقارىلدى. رەسپۋبليكالىق بيۋدجەتكە 288 ملرد تەڭگە سوماسىندا كىرىس ءتۇستى نەمەسە جوسپار 90%-كە اتقارىلدى. 

كىرىستەر بويىنشا جوسپار 32 ملرد تەڭگەگە، ونىڭ ىشىندە سالىقتار 37 ملرد تەڭگەگە اتقارىلمادى. ۆەدومستۆو باسشىسىنىڭ ايتۋىنشا، سالىقتار بويىنشا ورىندالماۋدىڭ نەگىزگى سوماسى قوسىلعان قۇن سالىعىنا جانە كورپوراتيۆتىك تابىس سالىعىنا تيەسىلى.

قوسىلعان قۇن سالىعى بويىنشا جوسپاردىڭ ورىندالماۋ سەبەپتەرى: 2020 جىلعى قاڭتارمەن سالىستىرعاندا قوسىلعان قۇن سالىعى قايتارىلۋىنىڭ 2،3 ەسەگە ءوسۋى; «ەلەكتروندىق شوت-فاكتۋرالار» اقپاراتتىق جۇيەسى دەرەكتەرىنە سايكەس ساتۋ بويىنشا اينالىمداردىڭ 14%-كە ازايۋى; نەگىزگى تومەندەۋ تاۋ-كەن ءوندىرىسى ونەركاسىبى سالاسىنا تيەسىلى، وندا اينالىمدار وتكەن جىلعى قاڭتارمەن سالىستىرعاندا 29%-كە نەمەسە 373 ملرد تەڭگەگە ازايعان; 2020 جىلعى قاڭتارمەن سالىستىرعاندا قازاقستان رەسپۋبليكاسىنىڭ ءۇشىنشى ەلدەرمەن تاۋار اينالىمىنىڭ 22%-عا تومەندەۋى. «كورپوراتيۆتىك تابىس سالىعى بويىنشا جوسپاردىڭ ورىندالماۋى 2021 جىلعى قاڭتاردا 743 ءىرى سالىق تولەۋشى بويىنشا مالىمدەلگەن اۆانستىق تولەمدەر سوماسىنىڭ وتكەن جىلدىڭ ۇقساس كەزەڭىمەن سالىستىرعاندا 38%-كە نەمەسە 28،6 ملرد تەڭگەگە ازايۋىنا بايلانىستى»، — دەدى ەرۇلان جاماۋباەۆ. قارجى مينيسترلىگىنىڭ اقپاراتىنا سايكەس، جەرگىلىكتى بيۋدجەتتەردىڭ كىرىستەرى 178،6%-كە اتقارىلدى جانە 239 ملرد تەڭگەنى قۇرادى.

بارلىق وڭىرلەردە كىرىستەر بويىنشا جوسپارلار اسىرا ورىندالدى. مەملەكەتتىك بيۋدجەتتىڭ شىعىستارى 91%-كە، رەسپۋبليكالىق بيۋدجەتتىڭ شىعىستارى 94،4%-كە، جەرگىلىكتى بيۋدجەتتەردىڭ شىعىستارى 80،6%-كە اتقارىلدى.

رەسپۋبليكالىق بيۋدجەت بويىنشا 1 ترلن 212 ملرد تەڭگە سوماسىنا شىعىستار جۇرگىزىلدى. ورىندالماۋ 72 ملرد تەڭگەنى قۇرادى، ونىڭ ىشىندە ۇنەمدەۋ – 7 ملرد تەڭگە، يگەرىلمەۋ سوماسى – 65 ملرد تەڭگە. يگەرىلمەۋدىڭ نەعۇرلىم ءىرى سومالارى كەلەسى ورتالىق مەملەكەتتىك ورگانداردا قالىپتاستى: قارجى، تسيفرلىق دامۋ، يننوۆاتسيالار جانە اەروعارىش ونەركاسىبى، توتەنشە جاعدايلار، ءبىلىم جانە عىلىم جانە مادەنيەت جانە سپورت مينيسترلىكتەرى. يگەرىلمەۋدىڭ نەگىزگى سەبەپتەرى:  تولەم جونىندەگى قۇجاتتاردى ۇزاق كەلىسۋ;  ورىندالعان جۇمىستار اكتىلەرىن ۋاقىتىلى ۇسىنباۋ;  ناقتى كورسەتىلگەن قىزمەتتەر كولەمى ءۇشىن اقى تولەۋ;  شارتتار مەن قوسىمشا كەلىسىمدەردى قازىناشىلىق ورگاندارىنا تىركەۋگە كەش ۇسىنۋ. جەرگىلىكتى بيۋدجەتتەردىڭ شىعىستارى 203 ملرد تەڭگەنى قۇرادى. اتقارىلماعانى — 49 ملرد تەڭگە. بيىل وڭىرلەرگە 1،9 ترلن تەڭگە سوماسىندا نىسانالى ترانسفەرتتەر كوزدەلگەن. ولارعا 1 اقپانداعى جاعداي بويىنشا 32 ملرد تەڭگە بولىنگەن. ولاردىڭ 79،3%-ءى يگەرىلگەن. اتقارىلماعانى – 6 ملرد تەڭگە، ونىڭ ىشىندە 2 ملرد تەڭگە – ۇنەمدەۋ، 4 ملرد تەڭگە يگەرىلمەدى. نەعۇرلىم كوپ يگەرىلمەۋ كەلەسى وڭىرلەردە: باتىس قازاقستان، جامبىل وبلىستارىندا، نۇر-سۇلتان قالاسىندا، اقمولا جانە اتىراۋ وبلىستارىندا قالىپتاستى.

«2021 جىلعى قاڭتاردا كامەرالدىق باقىلاۋمەن سوماسى 1،1 ترلن تەڭگەگە 71،5 مىڭنان استام مەملەكەتتىك ساتىپ الۋ راسىمدەرى قامتىلدى»، دەدى ۆەدومستۆو باسشىسى ە. جاماۋباەۆ. 

تەكسەرۋ قورىتىندىلارى بويىنشا سوماسى 38 ملرد تەڭگەگە بۇزۋشىلىقتار ەسكەرتىلدى. 219 اۋديتورلىق ءىس-شارالار وتكىزىلدى. اۋديتپەن 120 ملرد تەڭگە بيۋدجەت قاراجاتى قامتىلدى. سوماسى 17 ملرد تەڭگەگە قارجىلىق بۇزۋشىلىقتار انىقتالدى. تاۋارلاردى جەتكىزۋدى، قىزمەت كورسەتۋدى جانە جۇمىستاردى ورىنداۋدى قالپىنا كەلتىرۋ، بيۋدجەتكە وتەۋ جانە ەسەپكە الۋ بويىنشا كورسەتۋ جولىمەن 10 ملرد تەڭگەگە بۇزۋشىلىقتار جويىلدى. اۋديت وبەكتىلەرى قىزمەتىنىڭ تيىمدىلىگىن جەتىلدىرۋ جانە ارتتىرۋ ءۇشىن 198 ۇسىنىم بەرىلدى.

«جەكەشەلەندىرۋدىڭ 2021-2025 جىلدارعا ارنالعان كەشەندى جوسپارىندا مەملەكەتتىك مەنشىك پەن كۆازيمەملەكەتتىك سەكتوردىڭ 674 وبەكتىسىن وتكىزۋ كوزدەلگەن. ونىڭ ىشىندە رەسپۋبليكالىق مەنشىكتىڭ 8 وبەكتىسى، كوممۋنالدىق مەنشىكتىڭ 448، ۇلتتىق حولدينگتەر مەن ۇلتتىق كومپانيالاردىڭ 65 جانە الەۋمەتتىك كاسىپكەرلىك كورپوراتسياسىنا تيەسىلى 153 وبەكتى بار»، دەدى مينيستر.

الايدا، باس كومپانيالاردىڭ قۇرامىندا ەنشىلەس ۇيىمدار دا ىسكە اسىرىلاتىنىن ەسكەرە وتىرىپ، وبەكتىلەردىڭ جالپى سانى 736 قۇرادى. 1 اقپانداعى جاعداي بويىنشا 384 وبەكت بويىنشا وتكىزۋدىڭ جول كارتالارى ازىرلەندى جانە بەكىتىلدى.

رەسپۋبليكالىق مەنشىكتىڭ 8 وبەكتىسىن وتكىزۋ بويىنشا دايىندىق ءىس-شارالارى بەلسەندى جۇرگىزىلۋدە، ونىڭ ىشىندە 7 وبەكت 2021 جىلى، 1 وبەكت 2022 جىلى ساتىلىمعا شىعارىلادى. بۇگىنگى كۇنى 290 وبەكت بويىنشا جول كارتالارى ءالى بەكىتىلمەگەن. ولاردىڭ كوممۋنالدىق مەنشىكتەگىسى – 183، ۇلتتىق حولدينگتەر مەن كومپانيالاردىكى – 39 جانە الەۋمەتتىك كاسىپكەرلەر كورپوراتسيانىكى – 68 وبەكت.

«مەملەكەت باسشىسىنىڭ بەرگەن تاپسىرمالارىنا بايلانىستى كەشەندى جوسپاردىڭ ىسكە اسىرىلۋىن جەدەلدەتۋ قاجەت. ول ءۇشىن جەرگىلىكتى اتقارۋشى ورگاندارعا، الەۋمەتتىك كاسىپكەرلىك كورپوراتسيالارعا، ۇلتتىق باسقارۋشى حولدينگتەرگە جانە ۇلتتىق كومپانيالارعا وبەكتىلەردى وتكىزۋدىڭ جول كارتالارىن شۇعىل تۇردە ازىرلەۋدى جانە بەكىتۋدى تاپسىرۋدى سۇرايمىن. بۇل رەتتە وبەكتىلەردىڭ باسىم بولىگىن وتكىزۋ مەرزىمدەرى 2021 جىلعا كوزدەلسىن»، دەدى قارجى ءمينيسترى.

سوڭعى جاڭالىقتار

Atmaca زىمىرانى سىناقتان ءساتتى ءوتتى

تەحنولوگيا • بۇگىن، 18:35

دوللار قايتادان قىمباتتادى

قارجى • بۇگىن، 15:00

ۇقساس جاڭالىقتار