وڭىردە كوروناۆيرۋس ىندەتىنە قارسى ەكپە سالۋ جۇمىستارى 20 ەمحانادا جۇرگىزىلۋدە. ۆاكتسينالارعا ارنالعان مۇزداتقىش كامەرالارى جەتكىلىكتى. بۇگىندە ۆاكتسينا ەگىلگەن ازاماتتاردىڭ دەنساۋلىعى جاقسى. ەكپەدەن كەيىن اۋرۋحاناعا تۇسكەن جاعدايلار تىركەلمەگەن. پاندەميا باستالعالى بەرى وڭىردە ىندەت جۇقتىرۋدىڭ 4 176 جاعدايى تىركەلسە, ونىڭ 2 682-ءسى سيمپتومسىز, 1 671-ءى ستاتسيونارلىق ەم قابىلدادى. بۇگىندە 103 ادام ينفەكتسيالىق جانە كارانتيندىك جاعدايدا ەمدەلۋدە. وتكەن تاۋلىك ىشىندە وبلىس بويىنشا كوروناۆيرۋس ينفەكتسياسىن جۇقتىرۋدىڭ 12 جاعدايى راستالدى. COVID-19 ينفەكتسياسىنىڭ كۇندەلىكتى ءوسۋ دەڭگەيى 0,28% توڭىرەگىندە. ايتا كەتەيىك, «جاسىل ايماقتاعى» وبلىس اۋماعىندا 610 ينفەكتسيالىق جانە 340 كارانتيندىك ورىن دايىن. ۆيرۋستىڭ ءورشۋى ورىن العان جاعدايدا, ونىڭ سانىن 6 مىڭعا دەيىن كوبەيتۋگە مۇمكىندىك بار.
ەپيدەميالىق احۋالدى باعالاۋ كورسەتكىشى بويىنشا «جاسىل ايماقتا» تۇرعان وبلىستا ماماندار مەن جاۋاپتى مەكەمەلەر تاراپىنان وسى تۇستە قالۋدىڭ بارلىق امالى جاسالۋدا. ارينە, «جاسىلدا» قالۋ ءۇشىن جۇرت بولىپ كارانتين تالاپتارىن ساقتاۋ قاجەت. الايدا اۋىلداردا «باتا كوكپار» ۇيىمداستىرىپ, قۇدالىق وتكىزۋ تىيىلماي تۇر. مەيرامحانالاردىڭ ەسىگى جابىق بولعانىمەن, بۇگىندە «قىز ۇزاتۋ», «بەتاشار» سىندى تويلار «ۇيىشىلىك» جانە «اۋلالىق» دەڭگەيگە كوشكەن. قازىرگى تاڭدا وبلىس بويىنشا 104 ءموبيلدى مونيتورينگتىك توپ جۇمىس ىستەۋدە. ءموبيلدى توپ قۇرامىمەن جۇمىس ىستەۋىنە رۇقسات ەتىلگەن 13 812 نىساننىڭ 998-ىندە كارانتين تالاپتارىن بۇزۋشىلىق انىقتالىپ, حاتتاما تولتىرىلعان. ونىڭ ىشىندە, 969 جەكە تۇلعاعا – 30 اەك, 3 لاۋازىمدى تۇلعا مەن 25 جەكە كاسىپكەرگە – 230 اەك, 1 زاڭدى تۇلعاعا 1600 اەك مولشەرىندە ايىپپۇل سالىندى.
تۇركىستان وبلىسى سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى نۇربەك نىشانوۆتىڭ مالىمدەۋىنشە, اۋرۋشاڭدىق وتكەن قاراشا, جەلتوقسان جانە قاڭتار ايلارىندا تيىسىنشە 65, 192 جانە 427 جاعدايدان تىركەلىپ, ءوسۋ ءۇردىسى بايقالعانىمەن, سوڭعى 2 اپتا كولەمىندە ەپيدەميالىق جاعداي ەداۋىر تۇراقتالعان. ىندەتتىڭ تىركەلۋى سالىستىرمالى تۇردە 28 پايىزعا تومەندەدى. «ەپيدەميالىق كورسەتكىشتەر بويىنشا تاپسىرعان سىنامالار ىشىندە 279 ناۋقاستان COVID انىقتالعان. ونىڭ ىشىندە جرۆي/پنەۆمونيا دياگنوزدارىمەن 76 ناۋقاستان جانە 201 جاعداي ءوزارا قاتىناستا بولعاندار اراسىنان انىقتالىپ وتىر. پروفيلاكتيكالىق ماقساتتا تاپسىرعاندار ىشىندە 240 ناۋقاس انىقتالدى, ولار: مەملەكەتتىك شەكاراداعى كەدەن بەكەتتەرىنەن ءوتۋ كەزىندە – 7, ۆاحتالىق جۇمىسشىلار اراسىنان – 167, اسكەرگە شاقىرتىلعاندار – 3, جوسپارلى جانە شۇعىل جاتقىزۋ كەزىندە – 44, جۇكتى ايەلدەر اراسىنان – 11, اقىلى تۇردە تەكسەرىلگەندەر اراسىنان 5 جاعداي انىقتالعان», دەيدى ن.نىشانوۆ.
وبلىس تۇرعىندارىن پتر ادىسىمەن تەكسەرۋ ماقساتىندا 9 مەملەكەتتىك زەرتحانا جۇمىس ىستەۋدە. بۇگىنگە دەيىن پوليمەرازدى تىزبەكتى رەاكتسياسى ادىسىمەن 469 426 ادام تەكسەرۋدەن وتكىزىلدى, ۆيرۋس انىقتالعانى – 4 196. ماماندار بارلىق جاعداي ۆەب-قوسىمشاعا ەنگىزىلىپ, باقىلاۋعا الىنعانىن ايتادى. ەپيدەميالىق احۋالدىڭ تۇراقتى بولۋى ءاربىر ازاماتتىڭ كارانتيندىك تالاپتى ساقتاۋىنا بايلانىستى ەكەنىن جۇرت جاقسى بىلەدى. بۇل ورايدا ءتيىستى مەكەمەلەر دە «قۇداي ساقتاسىن» دەپ بەيعام جۇرەتىن جۇرتقا ءجيى ەسكەرتۋ جاساپ, تالاپتى بۇزعاندارىنا ءتيىستى شارا قولدانۋدا. ياعني «جاسىلدا» قالۋدىڭ جولى جالعىز – بارلىق كارانتين تالاپتارىن ساقتاپ, ۆاكتسينا سالدىرۋ ەكەنى ايتىلۋدا.
تۇركىستان وبلىسى
