قازىر قىزىلوردا وبلىسى ەپيدەميولوگيالىق احۋالدى باعالاۋ ماتريتساسى بويىنشا «جاسىل» ايماقتا تۇر. دەگەنمەن سوڭعى كورسەتكىشتەر ويلاندىرادى. بۇگىنگە دەيىن وڭىردە كوروناۆيرۋس ينفەكتسياسىن جۇقتىرۋدىڭ بارلىعى 3727 دەرەگى تىركەلدى. ال وتكەن تاۋلىكتە ىندەتتىڭ قۇرساۋىنا 13 ادام ىلىكتى.
ولاردىڭ بارلىعى قىزىلوردا قالاسىندا تۇرادى. تورتەۋىندە دەنە قىزۋىنىڭ كوتەرىلۋى, ەنتىگۋ, قۇرعاق جوتەل, كەۋدە تۇسىنىڭ اۋىرسىنۋى سەكىلدى كلينيكالىق بەلگىلەر انىقتالعان. قالعان توعىز ناۋقاستا اۋرۋ سيمپتومسىز وتكەن.
«1 ناۋقاستان پتر-تالداۋ سوماتيكالىق اۋرۋى بويىنشا ستاتسيونارعا جاتۋ الدىندا پروفيلاكتيكالىق ماقساتتا الىنعان. ال 9 پاتسيەنت كوروناۆيرۋس جۇقتىرعان ادامدارمەن قارىم-قاتىناستا بولۋى سەبەپتى تەكسەرىلگەن. سونداي-اق 3 ادام اۋرۋ سيمتومىنىڭ بولۋىنا بايلانىستى مەديتسينالىق كومەككە وزدىگىنەن جۇگىنگەن. تالداۋ ناتيجەلەرى كوروناۆيرۋس ينفەكتسياسىنا وڭ ناتيجە كورسەتتى. ناۋقاستارمەن قارىم-قاتىناستا بولعان 49 ادام مەديتسينالىق باقىلاۋعا الىندى. پروفيلاكتيكالىق جانە ەپيدەمياعا قارسى شارالار جۇرگىزىلۋدە», دەپ ءمالىم ەتتى قىزىلوردا وبلىسى سانيتاريالىق-ەپيدەميولوگيالىق باقىلاۋ دەپارتامەنتىنىڭ ءباسپاسوز قىزمەتىنەن.
ۆەدومستۆو اقپاراتىنا سايكەس, جىل باسىنان بەرى تىركەلگەن جاعدايلاردىڭ باسىم بولىگى قارىم-قاتىناس ارقىلى جۇققان. ونىڭ ىشىندە ءۇي وشاعىندا جاقىن قارىم-قاتىناستاعىلار اراسىندا ءجيى انىقتالۋدا. سونداي-اق, بۇدان بۇرىن بيىل قىزىلوردا وبلىسىندا كوروناۆيرۋس جۇقتىرعان ازاماتتاردىڭ دەنى وبلىس ورتالىعىندا تۇراتىنى حابارلاندى.
