«باس پروكۋراتۋرانىڭ باسشىلىعىمەن وتكەن كەڭەستە ازاماتتار مەن كاسىپكەرلەردىڭ قۇقىقتارىن قورعاۋ جونىندە بىرقاتار مىندەت قويدىم. تەرگەۋ بارىسىنداعى زاڭ بۇزۋشىلىقتاردى تۇبەگەيلى جويۋ كەرەك. قاماۋ ورىندارى مەن پوليتسيا ۋچاسكەلەرىنە تولىقتاي بەينەباقىلاۋ ورناتىلۋى قاجەت», دەدى مەملەكەت باسشىسى.
ەسكە سالايىق, بۇگىن قازاقستان پرەزيدەنتى قر باس پروكۋراتۋراسىنىڭ باسشىلىق قۇرامىمەن كەڭەس وتكىزدى. ونىڭ بارىسىندا پرەزيدەنت قىلمىستىق كودەكستى وڭتايلاندىرۋ جونىندە بەرگەن تاپسىرماسىن ەسكە سالدى. باس پروكۋراتۋرا بۇل جۇمىستى قۇقىق قورعاۋ ورگاندارىمەن, ارنايى مەملەكەتتىك ورگاندارمەن جانە ادىلەت مينيسترلىگىمەن ۇيلەستىرە وتىرىپ, اتقارۋى ءتيىس. مەملەكەت باسشىسىنىڭ پىكىرىنشە, اتالعان ماسەلەدە قوعام پىكىرىن, قوعام بەلسەندىلەرى مەن ساراپشىلاردىڭ ۇسىنىستارىن مىندەتتى تۇردە ەسكەرۋ قاجەت.
«جەدەل تەرگەۋ اپپاراتىنىڭ كۇشىن بولماشى قۇقىق بۇزۋشىلىقتارعا جۇمساۋعا بولمايدى. قىزمەتكەردىڭ جۇمىسى شاش ەتەكتەن بولعان كەزدە, وعان ءىستى راسىمدەپ, سوتقا جىبەرگەن وڭاي. ول وسىعان باسىمدىق بەرەدى. مۇنداي جاعدايدا ازاماتتاردىڭ قۇقىقتارى مەن قىلمىسقا قارسى ناقتى كۇرەس ەكىنشى ورىندا قالىپ قويادى. سوندىقتان ەلىمىزدە جابىرلەنۋشىلەر تەرگەۋشىلەردىڭ قانداي دا ءبىر جۇمىس ناتيجەسىن ايلاپ كۇتەدى. تەرگەۋ ورگاندارىنىڭ كاسىبي كادرلارمەن تولىق قامتاماسىز ەتىلمەۋى جاعدايدى ۋشىقتىرىپ جىبەرەدى. پروكۋراتۋرا بارلىق قۇقىق قورعاۋ جۇيەسىنىڭ قىزمەتىن ۇيلەستىرۋشى رەتىندە مۇنداي ماسەلەلەرگە ۋاقىتىلى ءمان بەرىپ, ارىپتەستەرىمەن بىرگە ونى شەشۋى كەرەك», دەگەن بولاتىن قاسىم-جومارت توقاەۆ.
