ەلوردادا ۇيىمداستىرىلعان بايراقتى باسەكە الدىنداعى ءباسپاسوز ءماسليحاتىندا قازاقستان حوككەي فەدەراتسياسىنىڭ باس ديرەكتورى گلەب كاراتاەۆ جوسپار بويىنشا نۇر-سۇلتانعا وڭتۇستىك كورەيا كومانداسى مەن ەۋروپانىڭ تاعى ءتورت قۇراماسى قاتىسۋعا نيەت بىلدىرگەنىمەن, سول ەلدەردەگى توتەنشە جاعداي مەن كارانتين شەكتەۋلەرىنە بايلانىستى قازاقستانعا كەلە الماعانىن مالىمدەدى. ءۇش قۇرامامەن تولىققاندى جارىس وتكىزۋ قولايسىز بولعاندىقتان, ۇيىمداستىرۋشىلار قازاقستاننىڭ جاستاردان قۇرالعان ەكىنشى كومانداسىن شىعارۋعا ءماجبۇر بولعان.
– سوندىقتان مۇمكىندىگىنشە كوپ ويىنشىنىڭ دايىندىعىن تەكسەرۋ ءۇشىن ءبىز قازاقستاننىڭ فارم-قۇراماسىن جاساقتاپ شىعاردىق. وڭتايلى قۇرامدى جيناپ, بارلىق جىگىتتەردىڭ شاماسىن بايقاۋعا بۇل تاپتىرماس مۇمكىندىك بولدى. مۇنداي جاعداي بىزدە تەك الەم چەمپيوناتىنىڭ الدىنداعى جيىنداردا عانا بولاتىن ەدى. ەندى الداعى ۋاقىتتا دا وسىنداي تۋرنير ۇدايى ءوتىپ وتىرادى دەپ ۇمىتتەنەمىز. ءبىز بۇرىن مۇنداي دودالارعا قاتىسىپ جۇرگەنىمىزبەن, ءوز ەلىمىزدە ۇيىمداستىرماعان بولاتىنبىز. شايبالى حوككەيدى كەڭىنەن ناسيحاتتاۋ ءۇشىن حالىقارالىق تۋرنيرلەردى قازاقستاننىڭ وزگە دە ايماقتارىندا, اتاپ ايتار بولساق, الماتى نەمەسە قاراعاندىدا دا وتكىزە الامىز. وسىلايشا ەلىمىزدەگى ارەنالار حالىقارالىق ستاندارتتارعا ساي بولماق. تۋرنير حالىقارالىق, جولداستىق سيپاتقا يە, سوندىقتان ەكى قۇرامانىڭ باپكەرلەرى قانداي دا ءبىر ماسەلەلەردى شەشۋ ءۇشىن ويىنشىلارمەن الماسۋعا قۇقىلى بولادى, سول سەبەپتى دە ءتۋرنيردىڭ قىزىعى ارتپاق, – دەدى گلەب كاراتاەۆ.
ال باس باپكەرى يۋري ميحايليس قۇرامالاردى «بارىس» پەن «نومادتىڭ» باپكەرلەر شتابى ىرىكتەپ العانىن ايتتى. ء«بىز ەكى قۇرامانى جاساقتاپ, مۇزايدىنعا شىعۋعا دايىن دەگەن بارلىق جاس ويىنشىنى ىرىكتەپ الدىق. ياعني, الداعى ۋاقىتتا ۇلتتىق كومانداعا الۋىمىز مۇمكىن دەگەن ۇمىتپەن شاقىردىق. «بارىستىڭ» كوشباسشى ويىنشىلارىنا دەمالىس بەردىك, ويتكەنى بىلەسىزدەر ءبىزدىڭ جىگىتتەر ناۋرىز ايىندا قۇرلىقتىڭ حوككەي ليگاسىنىڭ پلەي-وفف كەزەڭىندە باق سىنايدى. سوندىقتان بۇل تۋرنيرگە قازاقستان چەمپيوناتىنداعى جانە «بارىستا» از ويىن تاجىريبەسىن الىپ جۇرگەن ويىنشىلاردى جينادىق», دەدى باس جاتتىقتىرۋشى.
تۋرنيردەگى باسەكەلەرگە توقتالار بولساق, قازاقستاننىڭ نەگىزگى قۇرامى جارىستاعى تۇساۋكەسەر كەزدەسۋىن بەلارۋس حوككەيشىلەرىمەن وتكىزىپ, ءىرى ەسەپپەن جەڭىسكە جەتتى. ماتچ باستالعان ساتتە ويىن تىزگىنىن قولعا العان جەرلەستەرىمىز ءا دەگەننەن ەسەپ اشىپ ۇلگەردى. كەزدەسۋدىڭ 8-مينۋتىندا ەگور پەتۋحوۆ نىسانانى ءدال كوزدەدى. ارادا 20 سەكۋند وتكەندە پاۆەل اكولزين ەكىنشى شايبانى قاقپاعا توعىتتى. ۇزىلىستەن كەيىن دە باسىمدىقتى ءوز قولدارىنا العان قازاقستاننىڭ حوككەيشىلەرى تاعى ەكى مارتە قاقپانى ءدال كوزدەدى. 29-مينۋتتا كيريلل پانيۋكوۆ تابلوداعى كورسەتكىشتى 3:0-گە جەتكىزسە, 38-مينۋتتا ءاليحان اسەتوۆ بەلارۋس قاقپاسىنا ءتورتىنشى گولدى سالدى. ءۇشىنشى كەزەڭدە قارسىلاستار ءبىزدىڭ قاقپاعا ەكى شايبا سوققانىمەن, ارتىنشا كيريلل پانيۋكوۆ (47-مينۋت) دۋبل اۆتورى اتانىپ, ماتچتىڭ نۇكتەسىن قويدى. ەسەپ – 5:2.
حالىقارالىق ءتۋرنيردى ءساتتى باستاعان جەرلەستەرىمىز كەيىنگى ماتچتا دا جانكۇيەرلەردى قۋانتتى. رەسەي حوككەيشىلەرىمەن وتكەن ويىندا 2:1 ناتيجەسىمەن باسىم ءتۇستى. ءبىرىنشى كەزەڭنىڭ ورتا تۇسىنا دەيىن ويىنشىلار ءبىر-ءبىرىنىڭ قاقپاسىنا گول سوعا المادى. دەگەنمەن, كەزەكتى ءبىر شابۋىلدى ءساتتى تۇيىندەگەن ايدىن يەلەرى ويىننىڭ 14-مينۋتىندا ەسەپتى اشتى. رومان ستارچەنكودان تاماشا پاس العان نيكيتا ميحايليس قازاقستان قۇراماسىن العا شىعاردى. ۇزىلىستەن كەيىن قوناقتار ەسەپتى جىلدام تەڭەستىرىپ كەتتى. ماتچتىڭ 25-مينۋتىندا يليا موروزوۆ گول سالدى. ءسويتىپ تابلوداعى كورسەتكىش ويىننىڭ 53-مينۋتىنا دەيىن ساقتالىپ تۇردى. ماتچتىڭ اياقتالۋىنا 7 مينۋت قالعاندا نيكيتا ميحايليس دۋبل جاساپ, قازاقستان قۇراماسىنا جەڭىس سىيلادى.
وسىلايشا ەكى ويىندا دا قارسىلاس شاق كەلتىرمەگەن قازاقستان قۇراماسى ەلوردا تورىندە ۇيىمداستىرىلعان حالىقارالىق جارىستا ەل مەرەيىن اسىرىپ, بايراقتى باسەكەدە توپ جاردى. تۋرنير قورىتىندىسى بويىنشا قازاقستان قۇراماسىنان ەكى بىردەي ويىنشى – كيريلل پانيۋكوۆ پەن اندرەي شۋتوۆ ۇزدىك دەپ تانىلدى.
قازاقستاننىڭ ەكىنشى قۇرامى ءبىرىنشى ويىندا بەلارۋس قۇراماسىنان وۆەرتايمدا 3:2 ناتيجەسىمەن باسىم تۇسسە, رەسەيگە قارسى وتكەن شەشۋشى باسەكەدە ءدال وسىنداي ەسەپپەن وۆەرتايمدا قارسىلاستارعا جول بەردى.
تۋرنير سوڭىندا قازاقستان قۇراماسىنىڭ باس جاتتىقتىرۋشىسى يۋري ميحايليس مۇزايدىنعا شىققان بارلىق ويىنشىنىڭ ونەرىنە جوعارى باعا بەرىپ, جارىستى ۇيىمداستىرۋشىلارعا جانە قازاقستان چەمپيوناتى قىزعان شاعىندا كوماندالاردىڭ كوشباسشى ويىنشىلارىن تۋرنيرگە جىبەرگەن كلۋب باسشىلارىنا العىسىن ايتتى.
