وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى ۇلانتاي ۇسەنوۆ جاڭعىرمالى ەنەرگيا كوزدەرىن دامىتۋ – كەلەشەكتەگى ماڭىزدى مىندەتتەردىڭ ءبىرى ەكەنىن ايتتى.
– قازىر قاراعاندى وبلىسىنداعى ساران قالاسىندا, اقتوعاي اۋدانىنىڭ گۇلشات اۋىلىندا, شەت اۋدانىنداعى اقادىر كەنتىندە, جەزقازعاننىڭ جانىنداعى كەڭگىر ەلدى مەكەنىندە جالپى قۋاتى 200 مۆت بولاتىن ءتورت كۇن ەلەكتر ستانساسى جۇمىس ىستەپ تۇر. سونىمەن قاتار اباي جانە بۇقار جىراۋ اۋداندارىندا ەكى بيوگاز ستانساسى جانە ىنتىماق سۋ قويماسىندا شاعىن سۋ ەلەكتر ستانساسى قۋات كوزىن وندىرەدى. وبلىس بويىنشا جاڭارتىلعان جانە بالامالى ەنەرگيانىڭ جالپى قۋاتى 227,97 مۆت قۇرايدى, – دەگەن مالىمەت بەردى ول.
قازىرگى تاڭدا شەتەلدىك جانە وتاندىق ينۆەستورلار «جاسىل» ەنەرگەتيكانى دامىتۋعا مۇددەلى. مىسالى, جوعارىدا ايتىلعان ءتورت كۇن ستانساسى جوباسىنا ينۆەستورلار 102 ملرد تەڭگە قارجى سالعان. سوعان قاراعاندا بۇل جوبالار ينۆەستور ءۇشىن ەكونوميكالىق جاعىنان قايتارىمى اسا ءتيىمدى شارۋا بولسا كەرەك.
الداعى ۋاقىتتا وبلىستا جاڭعىرمالى ەنەرگيا كوزدەرىنىڭ قۋاتىن ارتتىرۋ بويىنشا اۋقىمدى جوسپار قاراستىرىلعان. مىسالى, بالقاش قالاسىنىڭ ماڭىنداعى قوڭىرات ەلدى مەكەنىنە جاقىن جەردە قۋاتى 100 مۆت بولاتىن كۇن ەلەكتر ستانساسىنىڭ قۇرىلىسى بيىل اياقتالىپ, ىسكە قوسىلادى دەگەن بولجام بار.
سونداي-اق ساران قالاسىندا تاعى ءبىر بالامالى ەنەرگيا كوزىن وندىرەتىن نىسان سالىنباقشى. بۇل – قۋاتى 100 مۆت جانە ودان جوعارى جيناقتاۋىشتارى بار گيبريدتى كۇن ەلەكتر ستانساسىنىڭ جوباسىن چەح ينۆەستورى جۇزەگە اسىرۋدى جوسپارلاعان. ايتا كەتەتىن ءبىر جايت, جەرگىلىكتى اتقارۋشى بيلىكتىڭ شەتەلدىك ينۆەستورلارعا قۇشاعى اشىق. مىسالى, سارانداعى جوبا ءۇشىن كۇن ەلەكتر ستانساسىن سالۋعا 18 گا جەر تەلىمى بولىنگەن.
