قوعام • 10 اقپان، 2021

بەلگىلى جۋرناليست جۇماسەيىت قوعاباي ۇلى ومىردەن وزدى

قازاقستاننىڭ قۇرمەتتى ءجۋرناليسى، قازاقستان جۋرناليستەر وداعىنىڭ مۇشەسى، كسرو تەلەۆيزياسى جانە راديوسىنىڭ ۇزدىگى جۇماسەيىت قوعاباي ۇلى بيجان 80-نەن اسقان شاعىندا ومىردەن ءوتتى، دەپ حابارلايدى Egemen.kz.

فارحات قايرات ۇلى

ول 1940 جىلعى 24 اقپاندا پاۆلودار وبلىسى اقتوعاي اۋدانىنىڭ شۇعا اۋىلىندا تۋعان. 1966 جىلى قاراعاندى پەداگوگيكالىق ينستيتۋتىن قازاق ءتىلى مەن ادەبيەتى ءپانىنىڭ مۇعالىمى ماماندىعى بويىنشا بىتىرگەن. ەڭبەك جولىن ءوزىنىڭ تۋعان اۋىلىندا مۇعالىم بولىپ باستاعان.

جۇرتشىلىق ونى بەلگىلى جۋرناليست، ۇستاز رەتىندە جاقسى بىلەدى. ول ءار جىلدارى ەكىباستۇز اۋداندىق «ۆپەرەد-العا» گازەتى رەداكتورىنىڭ ورىنباسارى، پاۆلودار وبلىستىق تەلەراديو كومپانياسىنىڭ رەداكتورى، باس رەداكتورى، ساياسي شولۋشىسى، باس پروديۋسەرى، توراعانىڭ ورىنباسارى (1979-1997 جىلدارى)، س.تورايعىروۆ اتىنداعى ۋنيۆەرسيتەتىندەگى «بىلىك» گازەتىنىڭ رەداكتورى بولىپ قىزمەت اتقاردى. ۋنيۆەرسيتەتتىڭ اعا وقىتۋشىسى، ج.ايماۋىتوۆ اتىنداعى ەتنوپەداگوگيكا جانە يننوۆاتسيالىق تەحنولوگيالار ورتالىعىنىڭ عىلىمي قىزمەتكەرى رەتىندە بولاشاق جۋرناليستەردى دايارلاۋعا ۇلكەن ۇلەس قوستى. بۇگىندە ونىڭ ءتالىمىن العان جۋرناليستەر رەسپۋبليكانىڭ تۇكپىر-تۇكپىرىندە جەمىستى ەڭبەك ەتۋدە.

جۇماسەيىت بيجان ۇلى «زامانداستار تاعىلىمى»، «ارداقتى ەلىم – اقتوعاي»، «دالا ۋالاياتى» گازەتى (1888-1902 جىلدارى)، «وي تولقىنى:تاجىريبەلىك نۇسقاۋلىق» كىتاپتارىنىڭ، «كوزقاراس»، ء«داۋىر» سەكىلدى تەلەراديو باعدارلامالارىنىڭ اۆتورى.

جۇماسەيىت بيجان قازاقستان جۋرناليستەر وداعى سىيلىعىنىڭ، كەڭەس وداعى تەلەديدار جانە راديوسىنىڭ ۇزدىگى بەلگىسىنىڭ يەگەرى. «قۇرمەت» وردەنىمەن (2018)، «مادەنيەت سالاسىنىڭ ۇزدىگى» توسبەلگىسىمەن، س.تورايعىروۆ اتىنداعى التىن مەدالمەن (2010) ماراپاتتالعان.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز