سارقان اۋدانى اكىمدىگىنىڭ مالىمەتىنە قاراعاندا, لەپسى اۋىلدىق وكرۋگىنە قاراستى ايماقتا «اباي 2» جشس قۋاتتىلىعى 50 مۆت بولاتىن جەل ەلەكتر ستانساسىن سالماق. جوبانىڭ ينۆەستيتسيالىق كولەمى 19 ملرد 400 ملن تەڭگەنى قۇراپ وتىر, وندا 50 تۇراقتى جاڭا جۇمىس ورنىن اشۋ جوسپارلانعان.
سونىمەن قاتار «باسقان پاۋەر» جشس قۋاتتىلىعى 4,2 مۆت جانە 4,8 مۆت بولاتىن سۋ ەلەكتر ستانسالارى قۇرىلىسىنىڭ جوباسىن ىسكە اسىرا باستادى. ونى جۇزەگە اسىرۋ ءۇشىن جەكە قاراجاتى ەسەبىنەن 11 ملرد. تەڭگە كولەمىندە ينۆەستيتسيا تارتىلعان.
سارقان اۋدانىنىڭ 2021 جىلعا ارنالعان جوسپارلارى مۇنىمەن شەكتەلمەيدى. چەركاسسك ا/و قارعالى اۋىلىندا «AZIA GOLD» جشس دارىلىك ءشوپ ءوندىرۋ كاسىپورنىن اشۋدى كوزدەپ وتىر. جوبالىق قۇنى – 442 ملن تەڭگە. كاسىپورىن 35 ادامدى تۇراقتى جۇمىس ورنىمەن قامتيدى.
اۋىل شارۋاشىلىعى بويىنشا امانگەلدى اۋىلدىق وكرۋگىندە «BASKAN RIV» جشس جوبالىق قۇنى 1 ملرد تەڭگە بولاتىن 10 مىڭ انالىق باسقا ارنالعان قوي شارۋاشىلىعى كەشەنىن سالۋدى جوسپارلاپ وتىر.
اۋدان ءتۋريزمدى دامىتۋعا دا باسىمدىق بەرمەك. وسى ورايدا بالقاش كولى جاعالاۋىنىڭ ينجەنەرلىك كوممۋنيكاتسيالار جەلىسىنە جوبالىق-سمەتالىق قۇجاتتاما جاسالىپ جاتىر.
«بۇگىنگى كۇنگە بالقاش كولىنىڭ جولدارىنىڭ جوندەۋ جۇمىستارىنا 200,0 ملن تەڭگە ءبولىندى. قۇرىلىس-مونتاج جۇمىستارى اياقتالعاننان كەيىن 13 ملرد تەڭگە ينۆەستيتسيا تارتۋ جانە 7 مىڭ ادامعا جاڭا ماۋسىمدىق جۇمىس ورىندارى اشىلادى دەگەن جوسپارىمىز بار», دەدى سارقان اۋدانىنىڭ باسشىسى تالعات قايناربەكوۆ.
ايتا كەتسەك, 2020 جىلى نەگىزگى كاپيتالعا 10 ملرد 934 ملن تەڭگە كولەمىندە ينۆەستيتسيا تارتىلعان.
