دجون حوپكينس ۋنيۆەرسيتەتىنىڭ مالىمەتىنە سۇيەنسەك, 30 قاڭتاردا 504 مىڭنان استام ادام ۆيرۋس جۇقتىرسا, 31 قاراشادا بۇل كورسەتكىش 395 مىڭعا دەيىن ازايعان.
جالپى, بيىلعى قاڭتاردا كوروناۆيرۋس ينفەكتسياسى قايتا كۇشىنە مىنگەنىن ايتا كەتكەن ءجون. بۇعان دەيىن انتيرەكوردتىق ناتيجە 7-8 قاڭتاردا تىركەلدى. سول ۋاقىتتا ءبىر تاۋلىكتە دەرتكە شالدىققاندار سانى 840 مىڭنان اسىپ ءتۇستى.
قازىرگى تاڭدا ۆيرۋس جۇقتىرعاندار سانى بويىنشا اقش ءالى دە الدا تۇر. وندا 27 ملن-عا جۋىق ادامنان قاۋىپتى ينفەكتسيا انىقتالعان. كۇن سايىن 100 مىڭنان استام ادام دەرتكە شالدىعادى. ۆيرۋس تىركەلگەلى بەرى بۇل ەلدە 453 مىڭعا جۋىق ناۋقاس قازا تاپتى.
ۇندىستانداعى جاعداي تۇزەلىپ كەلەدى. كوروناۆيرۋس جۇقتىرعاندار سانى بۇل ەلدە 11 ملن-عا تاياپ قالدى. دەگەنمەن كۇندەلىكتى بەلگىلى بولعان ناۋقاستار سانى 10 مىڭ شاماسىندا. سوڭعى رەت ءۇندىستاندا مۇنداي ناتيجە ماۋسىمدا تىركەلگەن ەدى. قايتىس بولعاندار سانى 155 مىڭعا جۋىقتادى.
برازيلياداعى احۋال ءالى دە كۇردەلى قالپىندا قالىپ وتىر. بۇل ەلدەگى ستاتيستيكالىق كورسەتكىشتەر كوڭىل كونشىتەرلىك ەمەس. ماسەلەن, 30 قاڭتاردا 50 مىڭنان استام ادامنان ۆيرۋس تابىلعان. ال 31 قاڭتاردا جاڭا ناۋقاستار سانى 27 مىڭعا دەيىن تۇسكەن. ساراپشىلاردىڭ پايىمداۋىنشا, برازيلياداعى ستاتيستيكانىڭ بۇلاي قۇبىلۋىنا بىرنەشە فاكتور اسەر ەتەدى. بىرىنشىدەن, اتالعان ەلدەگى تەست سىناماسىن الۋ جۇيەسىنە ايتىلاتىن سىن كوپ. ەكىنشىدەن, برازيليادا بىرنەشە ۆاكتسينا سىناق رەتىندە وتكىزىلىپ جاتىر. وسىنىڭ ءبارى جيىلا كەلە جاڭا تىركەلگەن ناۋقاستاردىڭ ستاتيستيكاسى الا-قۇلا بولۋىنا اسەر ەتىپ وتىر.
كوروناۆيرۋس جۇقتىرعاندار سانى 3 ملن-نان اسقان فرانتسيا شەكاراسىن قايتا قىمتاۋعا كوشتى. وتكەن جەكسەنبىدەن باستاپ ەۋروپالىق وداققا مۇشە مەملەكەتتەردەن باسقا ەلدەرگە شىعۋعا جانە كىرۋگە تىيىم سالىندى.
سونداي-اق ەلدەگى كارانتيندىك شەكتەۋ شارالارى ودان ءارى كۇشەيتىلدى. ماسەلەن, بارلىق ساۋدا ورتالىقتارى مەن ءىرى دۇكەندەردىڭ جۇمىسى توقتاتىلدى. شاعىن دۇكەندەر مەن ساۋدا ۇيلەرى ىشىنە ءبىر ۋاقىتتا جۇرەتىن ادامداردىڭ سانى شەكتەلدى.
ەل اۋماعىندا ۆيرۋس جۇقتىرعاندار سانى كۇندەلىكتى 24 مىڭنىڭ شاماسىندا. بىراق دارىگەرلەر ۆيرۋستىڭ جاڭا شتاممدارى تارالۋىنا الاڭداۋشىلىق ءبىلدىرىپ وتىر. دەنساۋلىق ساقتاۋ مينيسترلىگىنىڭ پايىمداۋىنشا, فرانتسيادا ەنگىزىلگەن شەكتەۋ شارالارى ازىرگە جاڭا لوكداۋن ەنگىزۋگە جول بەرمەيدى.
بۇدان باسقا, ەۋروپانىڭ بىرقاتار ەلىندە كوروناۆيرۋستىڭ تارالۋىنا بايلانىستى شەكارالار جابىلىپ جاتىر. وتكەن جۇمادا ۇلىبريتانيادا ۇيدەگى ساۋىق كەشتەرىنە جينالعاندارعا ايىپپۇل سالىنا باستادى. وسىلايشا, «تۇماندى البيوندا» 15 ادامنان كوپ جينالسا, 800 فۋنت كولەمىندە ايىپپۇل سالىنادى. الدا-جالدا ءبىر رەت كارانتيندىك تالاپتى بۇزعان ادام تاعى دا ءتارتىپ بۇزسا, ايىپپۇل ەكى ەسەلەنەدى.
اعىلشىنداردىڭ مۇنداي قادامعا بارۋىنا كوروناۆيرۋستىڭ ۇلىبريتانيالىق شتاممى اسەر ەتىپ وتىر. ەستەرىڭىزدە بولسا, قاڭتاردىڭ باسىندا ۆيرۋستىڭ جاڭا ءتۇرى تەز تارالىپ, كۇنىنە ون مىڭداعان ادام قاۋىپتى دەرتكە شالدىققان ەدى. سونداي-اق جاڭا شتاممنان قازا تاپقاندار سانى دا كۇرت ارتتى. ماسەلەن, وتكەن ايدا 33 مىڭ ادام وسى دەرتتەن قازا تاپتى.
بۇگىندە ۇلىبريتانيادا 3,8 ملن-نان استام ادام ناۋقاستانعان. 106 مىڭ ادام كوز جۇمدى. ۆيرۋس جۇقتىرعاندار سانى بويىنشا «تۇماندى البيون» بەسىنشى ورىندا تۇر.
گەرمانيا بيلىگى ەلگە برازيليا, ۇلىبريتانيا, يرلانديا, پورتۋگاليا جانە وار-دان كەلەتىندەردىڭ كىرۋىنە شەكتەۋ قويدى. اتالعان مەملەكەتتەردە كوروناۆيرۋستىڭ جاڭا شتاممدارى تارالعان. بەرلين ۆيرۋستىڭ قايتا تارالۋىنا جول بەرمەۋگە بارىن سالىپ وتىر. قازىرگى تاڭدا ەلدە اۋرۋ جۇقتىرعانداردىڭ ۇلەسى 1 ملن ادامعا شاققاندا 944 ادام. بۇل – قازان ايىنان بەرى ەڭ تومەنگى كورسەتكىش.
سونىمەن قاتار گەرمانيا Pfizer كومپانياسى ازىرلەگەن ۆاكتسينانىڭ تاعى 40,2 ملن دوزاسىنا تاپسىرىس بەردى. رەيتەرس اگەنتتىگىنىڭ حابارلاۋىنشا, ەل بيلىگى ەكپەنىڭ دەر كەزىندە جەتكىزىلمەي قالۋىن دا ەسكەرگەن.
سوندىقتان شىعار, گەرمانيانىڭ دەنساۋلىق ساقتاۋ ءمينيسترى حالىققا جاپپاي ۆاكتسينا سالۋ ماقساتىندا باسقا دا شارالار قابىلداماق. اتاپ ايتقاندا, نەمىستەر رەسەيلىك جانە قىتايلىق ەكپەلەردى ساتىپ الۋدى جوسپارلاپ وتىر. قازىرگى تاڭدا بۇل ەلدە 2 ملن-نان استام ادام عانا ۆاكتسينا سالدىرتقان. بۇل – باسقا ەۋروپالىق ەلدەردەن الدەقايدا از.
نورۆەگيادا دا شەكارالار تۇمشالانا باستادى. جاڭا قاۋلىعا سايكەس, ەلدە تۇرمايتىندار نورۆەگياعا كىرە المايدى. بۇل تىزىمگە مەديتسينالىق قىزمەتكەرلەر مەن تاۋار جەتكىزۋشىلەر عانا ەنگىزىلمەيدى. بۇعان دەيىن ەل استاناسى وسلو قالاسى مەن ونىڭ ماڭىنداعى بىرنەشە اۋداندا قاتاڭ كارانتين جاريالانعان بولاتىن.
رەسەي تاراپى كوكتەمدە كوروناۆيرۋستىڭ تارالۋى باسەڭدەيتىنىنە سەنىمدى. «روسپوترەبنادزور ەپيدەميولوگيا» ورتالىق عىلىمي-زەرتتەۋ ينستيتۋتى ديرەكتورىنىڭ عىلىمي جۇمىستار جونىندەگى ورىنباسارى الەكساندر گورەلوۆ جاعداي تۇراقتالىپ كەلە جاتقانىن مالىمدەدى.
رەسەيدە كوروناۆيرۋسپەن كۇرەس جونىندەگى فەدەرالدى جەدەل شتابتىڭ مالىمەتى بويىنشا اۋرۋ جۇقتىرۋدىڭ 3,8 ملن جاعدايى تىركەلگەن. سونىڭ ىشىندە 73 182 ناۋقاس قايتىس بولعان.
دۋباي بيلىگى شەتەلدىك تۋريستەرگە ارنالعان كارانتيندىك شەكتەۋلەردى جاڭارتتى. جاڭا حاتتاماعا سايكەس, 2021 جىلدىڭ 31 قاڭتارىنان باستاپ پتر تەستىن وتكىزۋ ۋاقىتىنا قاتىستى وزگەرىس ەنگىزىلدى. بۇعان دەيىن تۋريستەردە 96 ساعاتتان اسپايتىن مەرزىم ىشىندە تاپسىرىلعان تەستىڭ ناتيجەسى بار انىقتاما بولۋى تالاپ ەتىلەتىن ەدى. ەندىگى جەردە پتر سىناعىنىڭ ۋاقىتى 72 ساعاتتان اسپاۋى كەرەك. كوروناۆيرۋس تەستىلەرى 12 جاسقا دەيىنگى بالالار ءۇشىن قاجەت ەمەس جانە ءباا ازاماتتارىنان تالاپ ەتىلمەيدى.
دۋبايدىڭ داعدارىستار مەن اپاتتاردى باسقارۋ جونىندەگى جوعارعى كوميتەتىنىڭ حابارلاۋىنشا, جەدەل تەستىلەۋ ەندى دۋبايدىڭ بارلىق اۋەجايىندا وتكىزىلەدى. وسىلايشا, پتر سىناعىن تالاپ ەتەتىن ەلدەرگە ۇشۋ ءراسىمى ءبىرشاما جەڭىلدەدى.
ۆيرۋستىڭ ءالى دە اۋىزدىقتاۋعا كونبەۋى الەم ەلدەرىن ۆاكتسينا سالدىرۋدى تەزدەتۋگە ۇمتىلدىرۋدا. قىتايدا 31 قاڭتارعا دەيىن كوروناۆيرۋسقا قارسى ۆاكتسينانىڭ 24 ملن-نان استام دوزاسى سالىنعان. بۇل تۋرالى وتكەن جەكسەنبىدە مەملەكەتتىك كەڭەستىڭ كوروناۆيرۋسقا قارسى كۇرەس جونىندەگى ءباسپاسوز جيىنىندا ۆيرۋستىق اۋرۋلاردى باقىلاۋ جانە الدىن الۋ ينستيتۋتىنىڭ ديرەكتورى سيۋي ۆەنبو مالىمدەدى.
ونىڭ ايتۋىنشا, بىلتىرعى جەلتوقساننان باستاپ قىتايدا حالىققا جاپپاي كوروناۆيرۋسقا قارسى ەكپە سالىنىپ جاتىر. «قازىرگى ۋاقىتتا ەل ىشىندەگى ەگۋ پۋنكتتەرىندە تىركەلگەن ينەكتسيالاردىڭ جالپى سانى 24 ملن دوزادان استى», دەدى ۆەنبو.
ەۋروپانىڭ ءدارى-دارمەك جونىندەگى اگەنتتىگى (ەما) AstraZeneca فارماكولوگيالىق كومپانياسى شىعارعان كوروناۆيرۋسقا قارسى ۆاكتسينانى قولدانۋعا كەڭەس بەردى.
AstraZenecا – ەۋروپالىق وداقتا قولدانۋعا رۇقسات ەتىلگەن ءۇشىنشى ۆاكتسينا. بۇعان دەيىن Pfizer/BioNTech جانە Moderna كومپانيالارىنىڭ ۆاكتسينالارى قولدانىسقا ەنگەن بولاتىن. ەۋروپانىڭ ءدارى-دارمەك جونىندەگى اگەنتتىگى كەلتىرگەن دەرەكتەرگە سۇيەنسەك, ازىرگە AstraZenecا-نىڭ 55 جاستان اسقان ادامدارداعى يممۋنيتەتتى قانشالىقتى قالىپتاستىراتىنى بەلگىسىز. ويتكەنى زەرتتەۋ قورىتىندىلارى جەتكىلىكسىز.
دەگەنمەن وكىلەتتى ورگان باسقا ۆاكتسينالاردىڭ تيىمدىلىگىن ەسكەرىپ, AstraZenecا ەكپەسىنىڭ دە ۆيرۋسقا قارسى پايداسى مول بولاتىنىنا سەنىمدى. الداعى ۋاقىتتا كومپانيا زەرتتەۋ ناتيجەلەرىن جاريالاعاننان كەيىن قازىرگى قاۋىپ مۇلدەم سەيىلمەك.
AstraZeneca ۆاكتسيناسى ادام اعزاسىنا 4-تەن 12 اپتاعا دەيىنگى ۋاقىتشا كەزەڭدە ەكى ينەكتسيامەن ەنگىزىلەدى. بۇل مەديتسينالىق پرەپارات ۇلىبريتانيادا قولدانىسقا ەنگىزىلگەن.
