قازىرگى ۋاقىتتا تاۋ-كەن مەتاللۋرگيا, مۇناي-گاز جانە IT سالالارى ءۇشىن ءبىلىم بەرۋ باعدارلامالارى ازىرلەنۋدە.
قازاقستاندىق ەڭبەك نارىعى ءۇشىن ازىرلەنگەن جاڭا كاسىپتەر مەن قۇزىرەتتەردىڭ اتلاسى ەكونوميكانىڭ 9 نەگىزگى سالاسىن قامتيدى جانە جاڭا, ترانسفورماتسيالاناتىن, سونداي-اق جويىلىپ بارا جاتقان كاسىپتەر مەن قۇزىرەتتەردى بىرىكتىرەدى. اتلاس – بۇل ەكونوميكا سالالارىن دامىتۋدىڭ الەمدىك ترەندتەرىن ەسكەرە وتىرىپ, حالىقارالىق تاجىريبەگە نەگىزدەلگەن جانە فورسايت-زەرتتەۋ شەڭبەرىندە ءوندىرىس, مەملەكەتتىك ورگاندار, سالالىق قاۋىمداستىقتار جانە ت. ب. وكىلدەرى اتىنان سالالىق ساراپشىلاردىڭ قاتىسۋىمەن جۇرگىزىلگەن زەرتتەۋلەردىڭ قورىتىندىسى.
نەگىزگى سالالار ءۇشىن جۇرگىزىلگەن جۇمىستاردىڭ ارقاسىندا (مۇناي-گاز سالاسى, اۋىل شارۋاشىلىعى, كولىك جانە لوگيستيكا, ماشينا جاساۋ, اقپاراتتىق-كوممۋنيكاتسيالىق تەحنولوگيالار, ەنەرگەتيكا, تۋريزم, قۇرىلىس, تاۋ-كەن مەتاللۋرگيا سالاسى) تاياۋداعى 5-10 جىلعا كاسىپتەردەگى وزگەرىستەر بولجانىپ, سونداي-اق 239 جاڭا, 95 ترانسفورماتسيالاناتىن جانە 129 جويىلىپ بارا جاتقان كاسىپ ايقىندالدى.
وتاندىق ەڭبەك نارىعىنىڭ ترەندتەرى مەن پەرسپەكتيۆالارىنان قالىس قالماۋ ءۇشىن ەڭبەكمينى مەن بعم اتلاستى قازاقستاننىڭ جوعارى وقۋ ورىندارىمەن جانە كوللەدجدەرىمەن ينتەگراتسيالاۋ بويىنشا بەلسەندى جۇمىس جۇرگىزۋدە.
2021 جىلعى 21 قاڭتاردا بعم-ءنىڭ اتلاس ناتيجەلەرىن ەسكەرە وتىرىپ وزەكتەندىرىلگەن «تەحنيكالىق جانە كاسىپتىك, ورتا بىلىمنەن كەيىنگى ءبىلىمنىڭ ماماندىقتارى مەن بىلىكتىلىكتەرىنىڭ جىكتەۋىشىن بەكىتۋ تۋرالى» بۇيرىققا وزگەرىستەر مەن تولىقتىرۋلار ەنگىزۋ تۋرالى» بۇيرىعى قابىلداندى.
ماسەلەن, حرومتاۋ تاۋ-كەن تەحنيكالىق جوعارى كوللەدجى اتلاس نەگىزىندە «پيلوتسىز اۆياتسيالىق جۇيەلەردى تەحنيكالىق پايدالانۋ جونىندەگى تەحنيك-مەحانيك» جاڭا بىلىكتىلىگى بويىنشا ەكسپەريمەنتتىك ءبىلىم بەرۋ باعدارلاماسىن ازىرلەۋدە, ول بويىنشا دون تاۋ-كەن بايىتۋ كومبيناتى ءۇشىن كادرلار دايارلانادى.
«Astana polytechnic college» جوعارى كوللەدجى «كيبەرقاۋىپسىزدىك» باعىتى بويىنشا باعدارلاما ازىرلەۋدە, «سەمەي» كوللەدجى «وپەراتور VR AR MR» باعىتى بويىنشا, اتىراۋ مۇناي جانە گاز ۋنيۆەرسيتەتى كەلەسى باعىتتار بويىنشا ستۋدەنتتەردى وقىتۋعا دايىندالۋدا: «مۇناي-گاز سالاسىنىڭ جاڭا جاعدايلارىنداعى باسقارۋ»; «اقىلدى كەن ورنى, ۇلكەن دەرەكتەر جانە جاساندى ينتەللەكت»; «مۇناي-گاز سالاسىنداعى جاڭا ماتەريالدار تەحنولوگيالارى»; «مۇناي-گاز سالاسىنداعى تەحنيكانى قاشىقتان باسقارۋ»; «تەحنيكالىق قىزمەت كورسەتۋ مەن جوندەۋدەگى بولاشاق تەحنولوگيالارى».
بۇدان باسقا, اتىراۋ مۇناي جانە گاز ۋنيۆەرسيتەتى قازاقستان-بريتان تەحنيكالىق ۋنيۆەرسيتەتىمەن بىرلەسىپ, بيىل «جابدىقتىڭ سەنىمدىلىگى جانە بولجامدى اناليتيكاسى جونىندەگى ينجەنەر» جانە «پيلوتسىز ۇشۋ اپپاراتتارىنىڭ وپەراتورى» دەگەن 2 ماماندىقتى سىناقتان وتكىزەتىن بولادى.
جاڭا ءبىلىم بەرۋ باعدارلامالارى ەڭبەك نارىعىنىڭ ناقتى سۇرانىستارىنا جاۋاپ رەتىندە كادرلاردى دايارلاۋ جۇيەسىن وزگەرتە الادى جانە قىسقا مەرزىمدە ساپالى كاسىبي كادرلاردى دايارلاۋعا مۇمكىندىك بەرەدى.
ەلەكتروندىق ەڭبەك بيرجاسى (enbek.kz) پورتالىندا جاڭا كاسىپتەر مەن قۇزىرەتتەردىڭ اتلاسىمەن تانىسۋعا بولادى.
