قوقىستى قايتا وڭدەۋ لاستانۋدى ەداۋىر ازايتادى. مىسالى, پلاستيك بوتەلكەنىڭ تابيعي ىدىراۋى ونداعان جىلدارعا سوزىلسا, ونى قايتا وڭدەۋ ارقىلى قورشاعان ورتاعا پايدالى ماتەريال شىعارۋعا بولادى. وسىلايشا 1 توننا قايتا وڭدەلگەن ماكۋلاتۋرا 17 اعاشتى ساقتايدى, ال 1 توننا قايتا وڭدەلگەن پلاستيك بوتەلكەلەر 1,8 توننا مۇنايدى ۇنەمدەيدى.
ەكولوگيانىڭ ناشارلاۋىنا جول بەرمەۋ ءۇشىن قالدىقتاردى بولەك جيناۋ وتە ماڭىزدى ءرول اتقارادى. وسى ماقساتتا قالادا جەكە كونتەينەرلەر ورناتىلعان. تۇرمىستىق قاتتى قالدىقتاردى وڭدەۋ دەڭگەيى 75 پايىز, قايتالاما شيكىزاتتى الۋ 17 پايىز كورسەتكىشكە جەتتى. بۇل كورسەتكىشتەردى جوسپارلى تۇردە ارتتىرۋ قاجەت. قۇرامىندا سىنابى بار شامداردى جيناۋ ءۇشىن قالا بويىنشا 530-دان استام ارنايى كونتەينەر ورناتىلدى. بۇگىنگى تاڭدا 500 مىڭنان استام داناسى جينالىپ, كادەگە جاراتىلدى.
بۇدان باسقا, قوقىس وڭدەۋ زاۋىتىن جاڭعىرتۋ جۇرگىزىلۋدە. بۇل كاسىپورىننىڭ قۋاتىن ەكى ەسەگە جۋىق, ياعني جىلىنا 250 مىڭ توننادان 450 مىڭ تونناعا دەيىن ارتتىرۋعا مۇمكىندىك بەرەدى. قالدىقتاردى سۇرىپتاۋ جارتىلاي اۆتوماتتى تۇرگە اۋىستىرىلادى.
تۇرمىستىق قالدىقتاردان باسقا, قۇرىلىس قالدىقتارىن قايتا وڭدەۋ وتە ماڭىزدى.
وتكەن جىلى ەلوردادا «سولتۇستىك جوتاسى» كارەرىن ودان ءارى قالپىنا كەلتىرە وتىرىپ, قۇرىلىس قالدىقتارىن جيناۋعا جانە وڭدەۋگە ارنالعان الاڭ قۇرىلىسى باستالعان. بۇل قالاداعى ەكولوگيا مەن سانيتارلىق-ەپيدەميولوگيالىق جاعدايدى ايتارلىقتاي جاقسارتادى.
«قوقىستى قايتا وڭدەۋ ارقىلى قورشاعان ورتاعا كەلتىرىلگەن زياندى ازايتامىز. قاتتى تۇرمىستىق قالدىقتاردى ەكىنشى رەت پايدالانا وتىرىپ, قوقىس پوليگوندارىنىڭ كولەمىن ازايتىپ قانا قويماي, تابيعي رەسۋرستاردى دا ساقتايمىز. قايتا وڭدەۋ ىسىنە قالانىڭ ءاربىر تۇرعىنى اتسالىسۋى ماڭىزدى. سوندا عانا وڭ ناتيجەگە قول جەتكىزۋگە بولادى» دەپ اتاپ ءوتتى قورشاعان ورتانى قورعاۋ جانە تابيعاتتى پايدالانۋ باسقارماسىنىڭ باسشىسى ءاليا قوجاباەۆا.
