ءمينيستردىڭ ايتۋىنشا, بۇگىنگى تاڭدا 7 نەگىزگى باعىت ايقىندالعان. بۇل — ەكونوميكالىق بەلسەندىلىكتى قولداۋ, جۇمىس ورىندارىمەن قامتاماسىز ەتۋ, جۇيەلىك جانە سالالىق ساياساتتى قايتا رەتتەۋ, تۇرعىن ۇيگە قولجەتىمدىلىكتى ارتتىرۋ, دەنساۋلىق ساقتاۋ جانە ءبىلىم بەرۋ جۇيەسىن دامىتۋ. بارلىعى 68 تاپسىرما بەرىلدى. وسى تاپسىرمالاردى ىسكە اسىرۋ شەڭبەرىندە 3 زاڭنامالىق اكتى قابىلداناتىن بولادى. بۇل – دەربەس دەرەكتەر جانە ولاردى قورعاۋ تۋرالى, باسەكەلەستىك ماسەلەلەرى جونىندەگى زاڭدار, سونداي-اق جەر كودەكسىنە ەنگىزىلەتىن وزگەرىستەر.
سونىمەن قاتار 3 ۇلتتىق جوبانى بەكىتۋ كوزدەلۋدە, ولار – اگروونەركاسىپ كەشەنىن دامىتۋ, سۋ رەسۋرستارىن باسقارۋ جانە «2021-2025 جىلدارعا ارنالعان جاسىل قازاقستان» جوبالارى.
«5 كەشەندى جوسپار ازىرلەنەدى. بۇل – شەكارالارداعى زاڭسىز ساۋدا اينالىمىنا قارسى ءىس-قيمىل, وففتەيك-كەلىسىمشارتتار مەن رەتتەلەتىن ساتىپ الۋلار ارقىلى وندىرىستەردى قۇرۋ جانە كەڭەيتۋ, ەكىباستۇز قالاسىن 2025 جىلعا دەيىن دامىتۋ, ازاماتتارعا ۆاكتسيناتسيا جۇرگىزۋ جانە مەكتەپكە دەيىنگى ءبىلىم بەرۋدى دامىتۋ شارالارى», — دەدى ءا. ەرعاليەۆ.
ۇلتتىق ەكونوميكا مينيسترلىگى مەملەكەت باسشىسىنىڭ ءاربىر تاپسىرماسىن ءىس جۇزىندە ورىنداۋ بويىنشا ناقتى شارالار ازىرلەدى. ءبىرىنشى. وسى جىلعى مامىردىڭ سوڭىنا دەيىن سالىق-بيۋدجەت ساياساتىن جەتىلدىرۋ بويىنشا ۇسىنىستار ەنگىزىلەدى. ۇسىنىستاردى ازىرلەۋ ءۇشىن «اتامەكەن» ۇلتتىق كاسىپكەرلەر پالاتاسى جانە سالىق زاڭناماسىن جەتىلدىرۋ جونىندەگى ساراپشىلار قاۋىمداستىعىنىڭ قاتىسۋىمەن جۇمىس توبى قۇرىلادى. ناتيجەسىندە باسەكەگە قابىلەتتى شيكىزاتتىق ەمەس سەكتورعا نەگىزدەلگەن ەكونوميكانىڭ جاڭا قۇرىلىمىن قالىپتاستىرۋدى ىنتالاندىرۋ ءۇشىن سالىقتىق شارالار توپتاماسى دايىندالاتىن بولادى.
«مەملەكەتتىك قارجى تەڭگەرىمدىلىگىن قامتاماسىز ەتۋ, ولاردىڭ ورنىقتىلىعىن, سونداي-اق قابىلداناتىن بيۋدجەتتىك شەشىمدەردىڭ تيىمدىلىگىن ارتتىرۋ بويىنشا شارالاردى كوزدەيتىن 2030 جىلعا دەيىنگى جاڭا بيۋدجەت ساياساتى تۇجىرىمداماسىنىڭ جوباسى قالىپتاستىرىلاتىن بولادى», — دەدى ۆەدومستۆو باسشىسى.
ەكىنشى. شاعىن جانە ورتا بيزنەستى قولداۋ جونىندە شارالاردى ازىرلەۋ ءۇشىن «اتامەكەن» ۇلتتىق كاسىپكەرلەر پالاتاسى مەن ساراپشىلار قاۋىمداستىعىنىڭ قاتىسۋىمەن جۇمىس توبى قۇرىلادى. ءبىر اي ىشىندە ازىرلەنگەن شوعىرلاندىرىلعان ۇسىنىستار ەكونوميكالىق ءوسىمدى قالپىنا كەلتىرۋ جونىندەگى مەملەكەتتىك كوميسسيانىڭ قاراۋىنا ەنگىزىلەتىن بولادى.
ءۇشىنشى. مەملەكەتتىك قولداۋدىڭ تيىمدىلىگىن ارتتىرۋ ماقساتىندا مەملەكەتتىك قولداۋ العان بيزنەس سۋبەكتىلەرىنىڭ ارقايسىسى بويىنشا مونيتورينگتىڭ بىرىڭعاي قاعيدالارى ازىرلەنەتىن بولادى.
سونداي-اق سۋبەكتىلەردىڭ كوپ ولشەمدى جانە سەرپىندى مونيتورينگ جۇيەسى قالىپتاستىرىلادى. بۇل مەملەكەتتىك قولداۋ شارالارىنىڭ ەكونوميكالىق جانە الەۋمەتتىك قايتارىمىن باعالاۋعا مۇمكىندىك بەرەدى.
ءتورتىنشى. وسى جىلى وڭىرلىك ساياسات سالاسىندا قىزىلوردا وبلىسىنىڭ ەكونوميكاسىن ءارتاراپتاندىرۋ بويىنشا شارالار قابىلداناتىن بولادى.
ءمينيستردىڭ ايتۋىنشا, قىزىلوردا وبلىسىنىڭ الەۋمەتتىك-ەكونوميكالىق دامۋىنىڭ كەشەندى جوسپارى وزەكتەندىرىلەدى. جوسپارعا ءوڭىر ەكونوميكاسىنىڭ جاڭا قۇرىلىمىن قالىپتاستىرۋ جونىندەگى شارالار ەنگىزىلەدى.
بەسىنشى. مۇددەلى مەملەكەتتىك ورگاندار مەن پاۆلودار وبلىسى اكىمدىگىنىڭ قاتىسۋىمەن ەكىباستۇز قالاسىنىڭ الەۋمەتتىك-ەكونوميكالىق دامۋىنىڭ كەشەندى جوسپارى ازىرلەنەدى. كەشەندى جوسپاردى پاۆلودار وبلىستىق ءماسليحاتى بيىلعى قىركۇيەكتە بەكىتەدى.
التىنشى. بيۋدجەت قاراجاتىن ۇنەمدەۋ ماقساتىندا بيىلعى جىلى مەملەكەتتىك اپپاراتتىڭ قوسالقى قىزمەتتەرىن ورتالىقتاندىرۋ جانە وڭتايلاندىرۋ جۇرگىزىلەتىن بولادى. بۇل – كادر, قارجى جانە اكىمشىلىك-شارۋاشىلىق قىزمەتتەرىن, سونداي-اق اT-مەن قامتاماسىز ەتۋ سالالارىن قامتيدى.
«وسىعان بايلانىستى, ناقتى مەرزىمدەرىن كورسەتە وتىرىپ, قوسالقى قىزمەتتەردى ورتالىقتاندىرۋ جانە وڭتايلاندىرۋ جونىندەگى شارالاردى ىسكە اسىرۋدىڭ جول كارتاسى ازىرلەنەدى», — دەدى ءا. ەرعاليەۆ.
جەتىنشى. وسى ايدىڭ سوڭىنا دەيىن «مەملەكەتتىك جانە جەكە مەنشىك وپەراتورلاردى قۇرۋعا موراتوري ەنگىزۋ تۋرالى» پرەزيدەنت جارلىعىنىڭ جوباسى ازىرلەنەتىن بولادى.
