سونداي-اق كەڭەستىڭ وتىرىسىنا العاش رەت وزبەكستان رەسپۋبليكاسى پرەمەر-ءمينيسترىنىڭ ورىنباسارى – ينۆەستيتسيالار جانە سىرتقى ساۋدا ءمينيسترى س. ومىرزاقوۆ باقىلاۋشى مەملەكەتتىڭ وكىلى رەتىندە قاتىستى. وتىرىس شەڭبەرىندە كەڭەس مۇشەلەرى سىرتقى ساۋدا قىزمەتى, كەدەندىك جانە تەحنيكالىق رەتتەۋ جانە حالىقارالىق ىنتىماقتاستىق سالاسىنداعى ماسەلەلەردى قاراستىردى.
اتاپ ايتقاندا, ءوز اۋماقتارىندا تاڭبالاۋدى ەنگىزگەن جانە ەنگىزبەگەن ەاەو ەلدەرى اراسىنداعى ءوزارا ءىس-قيمىل ءتارتىبى مەن قارىم-قاتىناس جاساۋ ءتاسىلىن بەلگىلەيتىن ەاەو-دا تاۋارلاردى سايكەستەندىرۋ قۇرالدارىمەن تاڭبالاۋ جۇيەسىنىڭ بازالىق مودەلى بەكىتىلدى. قابىلدانعان شارالار ءبىر ەلدە مىندەتتى تاڭبالاۋ ەنگىزىلگەن, ال باسقا ەلدە بولماعان جاعدايدا ءوزارا ساۋدا-ساتتىق كەزىندە كەدەرگىلەردىڭ تۋىنداماۋىنا مۇمكىندىك بەرەدى.
COVID-19 تارالۋىنا بايلانىستى كارانتيندىك ءىس-شارالار ەنگىزىلگەن جاعدايدا ەلەكترونيكا مەن تۇرمىستىق تەحنيكانى وندىرۋشىلەر مەن يمپورتتاۋشىلاردى قولداۋ ماقساتىندا «ەنەرگەتيكالىق قاۋىپسىزدىككە قويىلاتىن تالاپتار تۋرالى» ەاەو تەحنيكالىق رەگلامەنتىنىڭ (ەاەو تر 048/2019) كۇشىنە ەنۋ مەرزىمى 2022 جىلدىڭ 1 قىركۇيەگىنە دەيىن ۇزارتىلدى.
بۇدان باسقا, كەڭەس شەشىمىمەن ەلەكتروليز ادىسىمەن اليۋميني وندىرىسىندە قولدانىلاتىن فتورلى اليۋمينيگە قاتىستى كەدەندىك باجدىڭ «نولدىك» مولشەرلەمەسى 2023 جىلدىڭ سوڭىنا دەيىن ۇزارتىلدى. بۇل شارا اليۋميني ونەركاسىبىنىڭ باسەكەگە قابىلەتتىلىگىن قولداۋعا جانە وتاندىق ونەركاسىپتىك ءوندىرىستى دامىتۋعا باعىتتالعان.
قازاقستاندىق تاراپتىڭ باستاماسى بويىنشا 2014 جىلدىڭ 23 جەلتوقسانىنداعى ەاەو شەڭبەرىندە دارىلىك زاتتار اينالىمىنىڭ بىرىڭعاي قاعيداتتارى مەن قاعيدالارى تۋرالى كەلىسىمگە وزگەرىستەر ەنگىزۋدىڭ ورىندىلىعى تالقىلاندى.
اتاپ ايتقاندا, ۇلتتىق زاڭناماعا سايكەس ىشكى نارىقتا تۇتىنۋ ءۇشىن قاجەتتى دارىلىك زاتتاردى تىركەۋ مۇمكىندىگىن ساقتاۋ بولىگىندە وزگەرىستەر ەنگىزۋ ماسەلەسى قارالدى.
ەستەرىڭىزگە سالايىق, 2021 جىلدىڭ 1 قاڭتارىنان باستاپ قازاقستان ەاەو ورگاندارىندا توراعالىق ەتەدى.
