بۇل جونىندە قالا اكىمى مۇرات ايتەنوۆ ءال-فارابي اۋدانى اكىمى ع.ماۋلەنقۇلوۆتىڭ حالىق الدىندا بەرگەن جىلدىق ەسەبىندە باياندادى. ەسەپتىك جيىن كارانتيندىك شەكتەۋلەرگە بايلانىستى ونلاين فورماتتا ۇيىمداستىرىلدى.
اۋدان اكىمى الەۋمەتتىك-ەكونوميكالىق دامۋ كورسەتكىشتەرى مەن اتقارىلعان جۇمىستار تۋرالى ايتىپ ءوتتى. جىل قورىتىندىسىن تىڭداعان تۇرعىندار سۇراقتارىن «فەيسبۋك», «ينستاگرامم» جەلىسى ارقىلى جولدادى. كەلىپ تۇسكەن ساۋالداردىڭ دەنى گاز, سۋ, جول ماسەلەلەرى مەن اباتتاندىرۋ جۇمىسى توڭىرەگىندە.
تۇرعىنداردان كەلگەن سۇراققا قالا اكىمى دە بىرلەسە جاۋاپ قاتىپ وتىردى. جيىن سوڭىندا مۇرات دۇيسەنبەك ۇلى وتكەن جىلى اۋداندى ارالاپ, نەگىزگى ماسەلەسىمەن تولىق تانىسقانىن جەتكىزدى.
– قالاداعى وزەكتى ماسەلەلەردى جۇيەلى تۇردە شەشۋ ءۇشىن اۋدانداردىڭ 5 جىلدىق دامۋ جوسپارىن ازىرلەدىك. ءال-فارابي اۋدانىنا 2021 جىلى 22,3 ملرد قارجى قارالىپ وتىر. بۇل قارجى وتكەن جىلمەن سالىستىرعاندا ەكى ەسەگە ارتقان. ءبىز قالاداعى شارۋاشىلىق سالاسىنا رەفورما جاسادىق. اعىمداعى جىلدان باستاپ ورتالىق كوشەلەردى اباتتاندىرۋ جۇمىسى اۋدان اكىمدىكتەرىنە بەكىتىلدى. ەندى ەنەرگەتيكا جانە كوممۋنالدى شارۋاشىلىق باسقارماسى قالانىڭ تەك ينفراقۇرىلىمىنا جاۋاپتى, – دەدى قالا اكىمى.
وسى ورايدا, اۋداننىڭ كوگالداندىرۋ جۇمىسىنا 982,5 ملن تەڭگە بولىنسە, سانيتارلىق تازالىعىنا 1,5 ملرد تەڭگە قارالعان. ينفراقۇرىلىمدىق دامۋى نەگىزىندە سامال-1, ناۋرىز شاعىن اۋداندارىنىڭ كارىز جۇيەسىنىڭ قۇرىلىسىنا 107 ملن تەڭگە, بادام شاعىن اۋدانىن گازبەن قامتۋعا 48,ملن تەڭگە ءبولىنىپ وتىر.
