جاڭادان پايدالانۋعا بەرىلگەن «لۋچ» نەيرووڭالتۋ ورتالىعىندا ءبىر جىل ىشىندە بەس مىڭعا جۋىق پاتسيەنت ساۋىقتىرۋدان وتە الادى دەگەن بولجام بار. مەديتسينالىق مەكەمە زاماناۋي تالاپتاردىڭ بارىنە جاۋاپ بەرەدى: مۇندا ۇزدىك ماماندار جۇمىس ىستەيدى, وزىق جابدىقتارمەن قاماتامسىز ەتىلگەن جانە بۇل جەردە حالىقارالىق ەمدەۋ ستاندارتتارى شوعىرلانعان.
«لۋچ» نەيرووڭالتۋ ورتالىعىنىڭ باس دارىگەرى گۇلنار مالىك فيليالدىڭ تاۋلىگىنە 75 پاتسيەنتكە قىزمەت كورسەتۋگە مۇمكىندىگى جەتەتىن ايتادى.
– ءبىز مۇندا ماسساج, فيزيوپروتسەدۋرا سياقتى وڭالتۋدىڭ ستاندارتتى ادىستەرىن عانا ەمەس, بالشىقپەن ەمدەۋدى, گيدروتەراپيانى دا قولدانامىز. ورتالىق الەمدىك وندىرۋشىلەردىڭ وزىق قۇرال-جابدىقتارىمەن جاراقتاندىرىلعان, – دەيدى باس دارىگەر.
ايتا كەتۋ كەرەك, جاڭا مەديتسينالىق مەكەمەدە ناۋقاستاردى ينسۋلت, نەيروحيرۋرگيالىق جانە تراۆماتولوگيالىق وتالاردان كەيىن قالپىنا كەلتىرۋ ءۇشىن بارلىق جاعداي جاسالعان. سونداي-اق مۇندا جۇرە المايتىن ناۋقاستاردىڭ سۋ پروتسەدۋرالارىنا قول جەتكىزۋىن جەڭىلدەتۋ ءۇشىن ارنايى كوتەرگىش جابدىعى بار ەكى باسسەين جۇمىس ىستەيدى.
بۇگىنگى كۇندە «لۋچ» نەيرووڭالتۋ ورتالىعىنىڭ قاراعاندى, جەزقازعان جانە تەمىرتاۋ قالالارىندا ءۇش فيليالى جۇمىس ىستەيدى. الداعى ۋاقىتتا سىرقاتىنان تولىق ايىقپاعان ادامدارعا اۋاداي قاجەت مەدمەكەمەنى بالقاش قالاسىنان دا اشۋ جوسپاردا بار ەكەن.
