ول ۇرلىقتىڭ الدىن الۋ مەن تەرگەۋ جۇمىستارىنىڭ قورىتىندىسىن ايتتى. «وتكەن جىلى ءبىز, جالپى قىلمىستاردىڭ سانىن 31,1 پايىزعا ازايتتىق. ماسەلەن, 2019 جىلى وڭىردە 8246 قىلمىس بولسا, ونى 2020 جىلى 5684-كە تومەندەتتىك. ال, اشىلۋ كورسەتكىشىن 58,3 پايىزدان 61,9 پايىزعا دەيىن جاقسارتتىق», دەدى ول ءوز سوزىندە.
ارداق ماديماروۆتىڭ ايتۋىنشا, وبلىستاعى ءاربىر ءۇشىنشى قىلمىس – بوتەننىڭ مۇلكىن ۇرلاۋ دەرەگى ەكەن. الايدا, قازىرگى كەزدە ءتارتىپ ساقشىلارىنىڭ جۇمىسىنىڭ ناتيجەسىندە وزگەنىڭ ماتەريالدىق مۇلكىنە قول سالاتىنداردىڭ قاراسى ازايعان. ماسەلەن, جالپى ۇرلىقتار سانى 47,5 پايىزعا دەيىن تومەندەپ, ال قىلمىستىڭ اشىلۋى 46,7 پايىزعا دەيىن ارتقان. سونداي-اق ارداق ماديماروۆ ۇرلىقتىڭ ەڭ كوپ بولىگى وبلىس ورتالىعىندا جاسالاتىنىن اتاپ ءوتتى. وتكەن جىلى ۇرلىق دەرەگى بويىنشا 546 پاتەر تونالسا, 758 ۇيالى تەلەفونداردى ۇرلاۋ دەرەگى تىركەلىپتى. قوعامدىق ورىندار مەن كولىكتەردە قالتا ۇرىلارى كوپ كەزدەسەتىنى بەلگىلى. بۇل رەتتە بىلتىر كىسى قالتاسىنا قول سالعان 127 ۇرىنىڭ 53-ءى قاماۋعا الىنعان. پوليتسيا پولكوۆنيگى ءوز سوزىندە ءتارتىپ ساقشىلارىنا ەرىكتىلەردىڭ دە كوپ كومەك تيگىزگەنىن اتاپ ءوتتى. اسىرەسە حابار-وشارسىز كەتكەن ادامداردى تابۋ جۇمىسىندا ەرىكتى جاستاردىڭ جاردەمى كوپ بولعان. ولار پوليتسەيلەرمەن بىرلەسە وتىرىپ دەرەكسىز كەتكەن 130 ادامنىڭ ورنالاسقان جەرىن انىقتاعان.
جامبىل وبلىسى
