لاتىن گرافيكاسىنا نەگىزدەلگەن قازاق ءتىلى ءالىپبيىن جەتىلدىرۋ بويىنشا اتقارىلعان جۇمىستار تۋرالى مادەنيەت جانە سپورت ءمينيسترى اقتوتى رايىمقۇلوۆا مەن ا. بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى انار فازىلجانوۆا, قازاق ءتىلى ارىپتەرىنىڭ پەرنەتاقتادا ورنالاسۋ ءتارتىبىنىڭ جوباسى تۋرالى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين, لاتىن قارپىنە نەگىزدەلگەن الىپبيگە كوشۋ جونىندەگى الداعى جۇمىستار تۋرالى ءبىلىم جانە عىلىم ءمينيسترى اسحات ايماعامبەتوۆ باياندادى. سونداي-اق قر ۇلتتىق عىلىم اكادەمياسىنىڭ اكادەميگى, فيلولوگيا عىلىمدارىنىڭ دوكتورى, پروفەسسور زەينەپ بازارباەۆا, قر پارلامەنتى ءماجىلىسىنىڭ دەپۋتاتى ساۋىتبەك ءابدىراحمانوۆ, قر پارلامەنتى سەناتىنىڭ دەپۋتاتى مۇرات باقتيار ۇلى, ل. گۋميلەۆ اتىنداعى ەۇۋ رەكتورى ەرلان سىدىقوۆ, تاريح عىلىمدارىنىڭ دوكتورى, پروفەسسور حانگەلدى ءابجانوۆ, قر پرەمەر-ءمينيسترىنىڭ ورىنباسارى ەرالى توعجانوۆ تۇسىنىكتەمە بەردى.
قر تۇڭعىش پرەزيدەنتى – ەلباسى نۇرسۇلتان نازارباەۆتىڭ باستاماسىمەن 2017 جىلى قازاق ءتىلى ءالىپبيىن لاتىن گرافيكاسىنا كوشىرۋ جۇمىستارى باستالدى. مەملەكەت باسشىسى قاسىم-جومارت توقاەۆتىڭ 2019 جىلعى 21 قازانداعى لاتىن گرافيكاسى نەگىزىندە قازاق ءتىلى ءالىپبيىن جەتىلدىرۋ جونىندەگى تاپسىرماسىن ورىنداۋ اياسىندا ءالىپبيدىڭ 40-تان استام نۇسقاسى, سونداي-اق قازاق ءتىلىنىڭ ەملە ەرەجەلەرىنىڭ جوبالارى مەن پەرنەتاقتاداعى ارىپتەردىڭ ورنالاسۋ ءتارتىبى قارالدى.
ءبىلىم بەرۋ مەكەمەلەرىندە جەتىلدىرىلگەن ءالىپبي بەلگىلەرىن جازۋ جانە وقۋ بويىنشا ساۋالناما جۇرگىزىلدى. قوعامدىق پىكىردى ەسكەرۋ ماقساتىندا اشىق تالقىلاۋلار ۇيىمداستىرىلدى.
جەتىلدىرىلگەن الىپبيدە ءارىپ سانى – 31, ءالىپبي تەك لاتىن ءالىپبيى بازالىق جۇيەسى تاڭبالارىنان قۇرالعان. بۇل الىپبيدە قازاق ءتىلىنىڭ 28 دىبىسى تولىق قامتىلعان.
قازىرگى ءا(ä), ءو(ö), ءۇ(ü), ۇ(ū) جانە ع(ğ), ش(ş) قازاق ارىپتەرى دياكريتيكالىق تاڭبالارمەن بەرىلگەن. الىپبيدە حالىقارالىق تاجىريبەدە قولدانىستا بار ۋملياۋت ( ̈ ), ماكرون ( ˉ ), سەديل ( ̧), برەۆيس ( ̌ ) دياكريتيكالىق تاڭبالارى قولدانىلعان.
ءالىپبي قازاق ءتىلىنىڭ جازۋ داستۇرىندە ورنىققان ء«بىر دىبىس – ءبىر ءارىپ» پرينتسيپىنە تولىق سايكەس كەلەدى. جاڭا الىپبيگە كەزەڭ-كەزەڭىمەن كوشۋ 2023 جىلدان باستاپ 2031 جىل ارالىعىندا جوسپارلانىپ وتىر.
«جەتىلدىرىلگەن ءالىپبي نۇسقاسى قازاق ءتىلىنىڭ دامۋىنا جاڭا سەرپىن بەرىپ, ونىڭ زاماناۋي ۇردىستەرگە ساي جاڭعىرۋىنا ىقپال ەتەدى. الداعى ۋاقىتتا قازاق ءتىلىن لاتىن گرافيكالى الىپبيگە كەزەڭ-كەزەڭىمەن كوشىرۋ باعىتىندا قارقىندى جۇمىس جۇرگىزۋ كەرەك», — دەدى ا. مامين.
ۇكىمەت باسشىسى لاتىن گرافيكاسى نەگىزىندەگى قازاق ءتىلى ءالىپبيىن جەتىلدىرۋ بويىنشا حالىق اراسىندا كەڭ اۋقىمدى اقپاراتتىق-ءتۇسىندىرۋ جۇمىستارىن جۇرگىزۋدى تاپسىردى.
