2026 جىلعى 11 قاڭتاردا امۋر جولبارىستارى بەنتلي مەن يارگيدىڭ وتباسىندا ءۇش بىردەي كۇشىكتىڭ دۇنيەگە كەلۋى زووباق ءۇشىن ەرەكشە جاڭالىق بولدى. العاشقى اپتالاردا ولار ەنەسىنىڭ جانىندا بولىپ, كۇتىمدە ءوستى. كوكتەم تۇسە كۇشىكتەر اشىق ۆولەرگە شىعارىلىپ, جاڭا ورتاعا بەيىمدەلە باستادى. قازىر ولار انا سۇتىمەن قاتار, قاتتى ازىققا دا قىزىعۋشىلىق تانىتىپ, كۇن ساناپ بەلسەندىلىگى ارتىپ كەلەدى.
الماتى حايۋاناتتار باعى تۇرعىنداردى شىرشالارعا ەكىنشى ءومىر سىيلاۋعا شاقىردى
كوكتەمگى ماۋسىمعا بايلانىستى جىلۋدى جاقسى كورەتىن جانۋارلار جازعى اشىق الاڭدارعا كوشىرىلدى. پىلدەر, كەرىكتەر, مۇيىزتۇمسىقتار, زەبرالار, تاپيرلەر مەن پەليكاندار تابيعي ورتاعا جاقىن كەڭىستىكتە ەركىن قوزعالىپ ءجۇر.
ناۋرىز مەرەكەسى كۇندەرى زووباققا شامامەن 40 مىڭ ادام كەلىپ, بۇل كورسەتكىش رەكوردتىق دەڭگەيگە جەتتى. وتكەن جىلمەن سالىستىرعاندا كەلۋشىلەر سانى 23 پايىزدان استامعا وسكەن.
زووباق ديرەكتورى سەيىلحان اكىلبەكوۆتىڭ ايتۋىنشا, مەرەكە كۇندەرى كەلۋشىلەر اعىنى ايتارلىقتاي ارتقان. سونداي-اق ءۇش امۋر جولبارىسى كۇشىگىنىڭ دۇنيەگە كەلۋى – مەكەمە ماماندارىنىڭ ەڭبەگىنىڭ ناتيجەسى ءارى ماڭىزدى وقيعا.
قازىرگى ۋاقىتتا زووباقتا ينفراقۇرىلىمدى جاڭارتۋ, جانۋارلارعا قولايلى جاعداي جاساۋ جۇمىستارى جالعاسىپ جاتىر. سونىمەن بىرگە كەلۋشىلەرگە ارنالعان تانىمدىق باعدارلامالار دا كەڭەيتىلۋدە.
