قوعام • 28 قاڭتار، 2021

جالعان اقپارات تاراتقان ءجاسوسپىرىمنىڭ اتا-اناسى جاۋاپقا تارتىلادى

23 رەت كورسەتىلدى

اقتوبە قالاسىنداعى №51 مەكتەپكە بومبا قويىلعانى تۋرالى ەكى حابارلاما بويىنشا تەكسەرىس جۇرگىزىلۋدە، – دەپ حابارلايدى Egemen.kz Polisia.kz سايتىنا سىلتەمە جاساپ.

تەلەفوندىق تەرروريزم – بۇل تەرروريستىك اكت نەمەسە قىلمىس دايىندالىپ جاتقانى تۋرالى كورىنەۋ جالعان حابارلاۋ. جەدەل ارەكەت ەتۋ كۇشتەرىنىڭ جالعان شاقىرۋىمەن كوپتەگەن ۇقساستىقتارى بار. ادەتتە، تەلەفون تەرروريزمى تەرمينى قوعامدىق جەردە جارىلعىش زاتتىڭ بولۋى تۋرالى جالعان حابارلاما دەپ تۇسىندىرىلەدى.

وسى فاكتىنى تەكسەرۋ كوپ ۋاقىت پەن ماتەريالدىق قۇرالداردى قاجەت ەتەدى.

بولجالدى تەررورلىق شابۋىلدىڭ ورنىنا پوليتسيا، قۇتقارۋشىلار، كينولوگتار، ءورت سوندىرۋشىلەر، تەرگەۋشىلەر، ارنايى قىزمەت ماماندارى جانە ت.ب. بارادى. سودان كەيىن بۇل ءىستىڭ سوڭى تەلەفون “ازىلكەشتەردىڭ” اتا-انالارىن جاۋاپقا تارتۋعا اكەلىپ سوقتىرادى.

مىسالى، اعىمداعى جىلدىڭ ءبىر ايىندا اقتوبە قالاسىنداعى №51 مەكتەپكە بومبا قويىلعانى تۋرالى ەكى حابارلاما كەلىپ ءتۇستى. ەكى جاعدايدا دا حاتتار ءبىر ەلەكتروندىق مەكەن-جايدان كەلگەن. حابارلاما جازعان ادامدى انىقتاۋعا جانە ۇستاۋعا باعىتتالعان جەدەل ءىس-شارالار جۇرگىزىلۋدە.

– تەرروريزم اكتىسى تۋرالى كورىنەۋ جالعان حابارلاعانى ءۇشىن قازاقستان رەسپۋبليكاسى قىلمىستىق كودەكسىنىڭ 273-بابىندا قىلمىستىق جاۋاپتىلىق بەلگىلەنگەن. قر قك-ءنىڭ 273-بابىندا كوزدەلگەن جاۋاپكەرشىلىك 14 جاسقا تولعان ادامعا قاتىستى قاراستىرىلعان، – دەيدى اقتوبە وبلىسى پد باستىعى اتىعاي ارىستانوۆ.

وسى باپتىڭ سانكتسياسى بەس مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋ نە سول مولشەردە تۇزەۋ جۇمىستارى نە بەس جىلعا دەيىنگى مەرزىمگە باس بوستاندىعىن شەكتەۋ نە سول مەرزىمگە باس بوستاندىعىنان ايىرۋ تۇرىندەگى قىلمىستىق جاۋاپتىلىقتى كوزدەيدى.

ا. ارىستانوۆتىڭ ايتۋىنشا، ءبىلىم بەرۋ مەكەمەلەرىنىڭ وقۋشىلارى اراسىندا مۇنداي قوڭىراۋلار ءجيى كەزدەسەدى. وقۋشىنىڭ جاسىنا قاراماستان، (ونىڭ جەكە مۇلكى مەن تابىسىنىڭ بولماۋىنا بايلانىستى) كەلىپ تۇسكەن حابارلامانى تەكسەرۋ جونىندەگى ارنايى ءىس-شارالاردى ۇيىمداستىرۋعا جانە وتكىزۋگە بايلانىستى ماتەريالدىق زالال ونىڭ اتا-اناسىنا جۇكتەلەدى.

وسىلايشا، ءبىر قاراعاندا “زيانسىز دەگەن حابارلاما” باس بوستاندىعىنان ايىرۋعا دەيىن اكەلۋى مۇمكىن.

وتكەن 2020 جىلى تەرروريزم اكتىسى تۋرالى وسىنداي جالعان حابارلامالاردىڭ ەكى فاكتىسى تىركەلدى، قوڭىراۋ شالۋشىلار انىقتالىپ، قىلمىستىق جاۋاپكەرشىلىككە تارتىلدى.

سوڭعى جاڭالىقتار

ۇقساس جاڭالىقتار