سونداي-اق Gallup International قاۋىمداستىعى سۇراق-جاۋاپ جۇرگىزگەن 47 ەلدە رەسپوندەنتتەردىڭ 67 پايىزى ەگەر ۆاكتسينا ساپالى ءارى ءتيىمدى بولسا, ەكپە ەگۋگە دايىن ەكەنىن ايتىپتى. ال 26 پايىزى قارسى, 7 پايىزى جاۋاپ بەرمەگەن.
دۇنيەجۇزىلىك دەنساۋلىق ساقتاۋ ۇيىمىنىڭ ماقساتى – وسى دەرتتى تۇبەگەيلى جويۋ. الەم بويىنشا 42 مەملەكەت كوروناۆيرۋسقا قارسى ۆاكتسينانى قابىلداۋعا شەشىم قابىلداپ وتىر. ال تمد مەملەكەتتەرى اراسىندا ازىرگە رەسەي مەن بەلارۋس شەشىم قابىلدادى. بۇل شاراعا قازاقستان بيىل اقپان ايىنان باستاپ قوسىلادى. ددۇ مالىمەتىنە سۇيەنسەك, وسى ۋاقىتقا دەيىن دۇنيە ءجۇزى بويىنشا 95 ملن 612 مىڭ ادام اۋىرعان, ونىڭ ىشىندە 2 ملن-نان استامى ءولىم-ءجىتىم جاعدايىمەن اياقتالعان. ۆاكتسينا ەگۋدىڭ ەڭ باستى ماقساتى – ءولىم-ءجىتىم جاعدايىنا جەتكىزبەۋ, اۋرۋدىڭ الدىن الۋ.
ەكپە 18 جاستان اسقان ادامدارعا ارنالعان. زاڭعا سايكەس, ۆاكتسينادان كەز كەلگەن ازاماتتىڭ باس تارتۋعا قۇقىعى بار. ەكپە الدىندا دارىگەر پاتسيەنتتى مىندەتتى تۇردە تەكسەرەدى. قانداي دا ءبىر اۋرۋ تۇرلەرى بايقالسا, ساۋىققانعا دەيىن شەگەرىلەدى. سونداي-اق ءار ادام ۆاكتسينانىڭ قۇرامى مەن ءوندىرۋشىسى تۋرالى اقپاراتپەن تانىسۋعا قۇقىلى. قازىر تۇرعىندارعا ەكپە سالۋدىڭ ەلەكتروندى پاسپورتى ازىرلەنگەن. دەرەكتەر دەنساۋلىق ساقتاۋ مينيسترلىگىنىڭ اقپاراتتىق جۇيەسىندە ەلەكتروندى فورماتتا جۇرگىزىلەدى. وسى ارقىلى ەكپە العان ادام تالاپ ەتىلەتىن ورىنعا اقپارات ۇسىنا الادى. ايماقتارداعى احۋالدى رەتتەۋ مەن تۇراقتاندىرۋ شارالارى جالعاسىن تابادى.
كوللاجدى جاساعان قونىسباي شەجىمباي, «ەQ»
«جىل سوڭىنا دەيىن 6 ملن ادامعا ەكپە سالۋدى جوسپارلاپ وتىرمىز. ۆاكتسينانىڭ ساپالى بولۋىن قامتاماسىز ەتۋ ەرەكشە باقىلاۋدا بولادى. وندىرۋشىدەن مەديتسينالىق مەكەمەگە دەيىن جەتكىزىپ بەرۋدى بەكىتىلگەن ادامدار باقىلاۋدا ۇستايدى. ونىڭ ءوزى 4 كەزەڭنەن تۇرادى», دەدى دەنساۋلىق ساقتاۋ ءمينيسترى الەكسەي تسوي.
ۆەدومستۆو باسشىسى بولجامدارىمەن دە ءبولىستى. ايتۋىنشا, ناۋرىزدىڭ سوڭىندا ىندەتتى جۇقتىرۋشىلار كوپ تىركەلۋى مۇمكىن. ماسەلەن, تاۋلىگىنە 3 مىڭداي ناۋقاس تىركەلسە, ەمحانالاردا 24 مىڭ توسەكتىك ورىن قاجەت بولادى.
مۇنداي جاعدايدا قاتاڭ كارانتيندىك شارالاردى ەنگىزۋ جوسپاردا جوق. ال ۆيرۋس جۇقتىرعاندار سانى 6-دان 9-مىڭعا دەيىن جەتسە, 45 مىڭ توسەكتىك ورىن قاجەت بولادى. بۇل جاعدايدا قاتاڭ كارانتيندىك شارالار ەنگىزىلەدى. بىراق 2 ملن ادامعا ەكپە سالۋ ارقىلى ىندەت جۇقتىرۋشىلار سانى 40 مىڭعا ازايا دى دەگەن ءۇمىت بار.
دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتى ۆاكتسينامەن باسقارىلاتىن ينفەكتسيالاردى باقىلاۋ باسقارماسىنىڭ باسشىسى نۋرشاي يۋسۋنتايقىزى ءبىزدىڭ ەلىمىزدە قانداي ۆاكتسينالار ازىرلەنىپ جاتقانىن جەتكىزدى.
«دۇنيەجۇزىلىك دەنساۋلىق ساقتاۋ ۇيىمى تىركەگەن كوروناۆيرۋس ينفەكتسياسىنا قارسى ۆاكتسينالار اراسىندا قازاقستان ءوندىرىسىنىڭ 5 ۇمىتكەر ۆاكتسيناسى بار. ءبىرىنشىسى – كلينيكالىق زەرتتەۋلەر كەزەڭىندە تۇرعان ءبىلىم جانە عىلىم مينيسترلىگى عىلىم كوميتەتىنىڭ بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى ازىرلەگەن يناكتيۆتى ۆاكتسينا. قالعان تورتەۋى – وگايو شتاتىنىڭ ۋنيۆەرسيتەتىمەن (اقش) بىرلەسىپ قازاق ۇلتتىق اگرارلىق ۋنيۆەرسيتەتىنىڭ, م.ايقىمباەۆ اتىنداعى اسا قاۋىپتى ينفەكتسيالار ۇلتتىق ورتالىعىنىڭ, بقپ عزي-دىڭ ازىرلەپ جاتقان جانە كلينيكاعا دەيىنگى زەرتتەۋلەر ساتىسىنداعى سۋببىرلىك ۆاكتسينا», دەدى مامان.
ايتا كەتەتىن تاعى ءبىر جايت, دۇنيەجۇزىلىك دەنساۋلىق ساقتاۋ ۇيىمى الەم «رۋحاني اپات» الدىندا تۇر دەپ مالىمدەدى. بۇعان كوۆيدكە قارسى ۆاكتسينانىڭ الەم ەلدەرى اراسىندا تەڭ بولىنبەۋى سەبەپ. وسى ۋاقىتقا دەيىن ۆاكتسينانىڭ 39 ملن دوزاسى 50-گە تارتا اۋقاتتى مەملەكەتتەرگە تاراتىلسا, كەدەي ەلدەردىڭ بىرىنە ەكپەنىڭ تەك 25 دوزاسى بەرىلگەن. ءبىر قىزىعى, جاپونيادا ەندى ۆاكتسينالاۋ ءمينيسترى بار. اتالعان قىزمەتكە اكىمشىلىك رەفورمالار ءمينيسترى تارو كونو تاعايىندالعان. ول ازاماتتاردىڭ كوروناۆيرۋسقا قارسى ەكپە الۋىن قاداعالايتىن بولادى. ەلدە اۋقىمدى ناۋقان اقپاندا باستالادى دەپ جوسپارلانىپ وتىر.
