قازاقستان ءوزىنىڭ بىرەگەي رەكرەاتسيالىق رەسۋرستارىمەن پوست-كوۆيد وڭالتۋ ماقساتىندا ساناتوريالىق-كۋرورتتىق دەمالىستى ۇيىمداستىرۋ بويىنشا تمد كوشباسشىسى بولا الادى. قولايلى كليماتتىق جاعدايلار, مينەرالدى سۋ كوزدەرىنىڭ جانە شيپا بالشىق كەن ورىندارىنىڭ بولۋى قازاقستاننىڭ بارلىق وڭىرلەرىندە ەمدەۋ-ساۋىقتىرۋ ايماقتارىنىڭ دامۋىنا ىقپال ەتەدى.
كورونوۆيرۋستان كەيىنگى وڭالتۋدىڭ سۇرانىسى ارتىپ جاتقانىنا بايلانىستى قازاقستاننىڭ ۇلتتىق كۋرورتتىق قاۋىمداستىعى ساناتوريالىق-كۋرورتتىق وبەكتىلەردى زەرتتەۋ قورىتىندىسىن شىعارىپ, COVID-19-عا شالدىققان ادامداردى وڭالتۋ بويىنشا باعدارلامالارى بار 10 ۇزدىك ساناتوري انىقتادى. ماسەلەن, «سارىاعاش» كۋرورتتىق ايماعىنداعى ساناتوريلەردىڭ ىشىندەگى كوروناۆيرۋستان كەيىنگى وڭالتۋ باعدارلامالارىن ۇسىناتىن ەڭ ۇزدىگى جانە ءتيىمدىسى – «التىناي» جانە «قازاقستان KZ» ەكەنى بەلگىلى بولدى. سونداي-اق بۇل تىزىمگە تۇركىستان وبلىسىنداعى «مانكەنت» شيپاجايى دا كىردى.
جامبىل وبلىسىندا Merke Radon ءساناتوريى جانە جامبىل وبلىسى اكىمدىگىنىڭ دەنساۋلىق ساقتاۋ شجق «ايشا-ءبيبى» مكك ءساناتوريىنىڭ وڭالتۋ ورتالىعى اتالدى. بۇدان باسقا, ۇلتتىق كۋرورتتىق قاۋىمداستىقپەن كورونوۆيرۋستان كەيىنگى وڭالتۋ باعدارلامالارى بار مىناداي ساناتوريالىق-كۋرورتتىق وبەكتىلەر اتالعىن: الماتىدا – «قازاقستان» ءساناتوريى جانە Altyn Kargaly قوناق ءۇي-ءساناتوريى; الماتىدان ءۇش شاقىرىم جەردە, ىلە الاتاۋىنىڭ ەتەگىندەگى – Almaty Resort ءساناتوريى; اقمولا وبلىسىندا – «وقجەتپەس» ەمدەۋ ساۋىقتىرۋ كەشەنى; باتىس قازاقستان وبلىسىندا – Nurbergen Health Resort ءساناتوريى جانە اقتوبە وبلىسىندا – «شيپاگەر» ساناتوري – پروفيلاكتوريى.
ەستەرىڭىزگە سالا كەتەيىك, Kazakh Tourism ۇلتتىق كومپانياسى قازاقستاننىڭ ۇلتتىق كۋرورتتىق قاۋىمداستىعىمەن بىرلەسە كۋرورتتىق ايماقتاردىڭ اينالاسىنداعى ينفراقۇرىلىمنىڭ بار-جوعىن جانە ماتەريالدىق-تەحنيكالىق جاراقتاندىرىلۋىن زەردەلەي وتىرىپ, ساناتوريالىق-كۋرورتتىق وبەكتىلەرگە زەرتتەۋ جۇرگىزدى. وندا 173 ساناتوريالىق-كۋرورتتىق وبەكتىگە ينسپەكتسيا جۇرگىزىلىپ, ناتيجەسىندە جاڭارتىلعان ءتىزىلىم, ساناتوريلەر كاتالوگى ۇسىنىلدى. www.kazakhstan.travel پورتالىندا جۇمىس ىستەپ تۇرعان ساناتوريلەر تۋرالى وزەكتى اقپارات ورنالاستىرىلدى, سونداي-اق بەينەروليك شىعارىلدى.
