بەلارۋس ازاماتى تۇركىستان وبلىسىنىڭ پوليتسەيلەرىنە العىس ايتتى

ايماقتار • 27 قاڭتار، 2021

بەلارۋس ازاماتى تۇركىستان وبلىسىنىڭ پوليتسەيلەرىنە العىس ايتتى

14 رەت كورسەتىلدى

تۇركىستان وبلىسىنىڭ پاترۋلدىك پوليتسەيلەرىنە بىرنەشە تۇرعىن، ونىڭ ىشىندە بەلارۋس رەسپۋبليكاسىنىڭ ازاماتى ارنايى العىسىن ايتتى، – دەپ حابارلايدى Egemen.kz Polisia.kz سايتىنا سىلتەمە جاساپ.

جانبولات كەنجەعۇل

2021 جىلدىڭ 21 قاڭتارىنان باستاپ تۇركىستان وبلىسىندا قالىڭ قار جاۋىپ، اق تۇتەك بوران باستالدى. بىرنەشە كۇن مەن ءتۇن تولاسسىز جاۋعان قار وبلىس جولدارىنىڭ بارلىعىندا كولىكتەردىڭ جۇرۋىنە كەدەرگى كەلتىرىپ، دامىلسىز سوققان اق تۇتەك بوران جولاۋشىلاردى جولدا قالدىردى. اۋىر جۇك كولىكتەرى مەن جەڭىل كولىكتەر جول جيەگىنە شىعىپ كەتىپ، ءتىپتى كەيبىرى ءبىر-بىرىنە سوقتىعىسىپ جاتتى. اۋا رايىنىڭ توسىن مىنەز تانىتىپ، ىسقىرىپ سوققان سۋىق جەلدە ازاماتتاردىڭ اماندىعى مەن قاۋىپسىزدىگىن قامتاماسىز ەتۋ ءۇشىن تۇركىستان وبلىسىنىڭ بۇكىل جەكە قۇرام قىزمەتكەرلەرى وبلىس جولدارىنا جۇمىلدىرىلدى. تاڭ اتپاستان كۇشەيتىلگەن رەجيمدە جۇمىسقا كىرىسكەن پوليتسەيلەر بارىنشا تۇرعىندارعا ساق بولۋلارى مەن ۇيدەن شىقپاۋلارىن ەسكەرتتى. ال جولدا قالعان جولاۋشىلاردى قىزمەتتىك كولىكتەرىمەن جىلى ورىنعا جەتكىزىپ، قارعا باتىپ، جۇرە الماي قالعان كولىكتەرگە قارىن كۇرەپ، قايتادان ءجۇرىپ كەتۋىنە ىقپال جاسادى. كۇرەك ۇستاپ قار كۇرەگەن، كولىك يتەرىپ كومەك كورسەتكەن پوليتسەيلەر سۋىققا قاراماستان قىزمەتتەرىن تاۋلىكتەپ اتقاردى.

ماسەلەن، جولدا تۇرالاپ قالعان اۋىر جۇك كولىكتەرىنىڭ ىشىندە بەلارۋسسيا تۇرعىنى دا بولدى. ونىڭ كولىگى جول جيەگىندەگى قارعا باتىپ قالعان. پاترۋلدىك پوليتسيا قىزمەتكەرلەرى تەز ارادا قاردى تازالاپ، جۇرگىزۋشىگە كومەك كورسەتتى. شەتەلدىك جۇرگىزۋشى تۇركىستاننىڭ عانا ەمەس، قازاقستاننىڭ پوليتسياسىن ماقتاپ، قىزمەتكەرلەردىڭ جۇمىستارىنا ريزاشىلىعىن جەتكىزدى. شىنايى العىسىن ايتىپ، ساتتىلىك تىلەدى.

سونىمەن قاتار شىمكەنت-سامارا تاس جولىندا پاترۋلدەپ كەلە جاتقان پوليتسەيلەر جولدىڭ جيەگىنە شىعىپ كەتكەن تاعى ءبىر جەڭىل كولىكتى بايقايدى. بىردەن توقتاپ، جۇرگىزۋشىنىڭ تەمىر تۇلپارىن قىزمەتتىك كولىكپەن جول بويىنا سۇيرەپ الىپ شىعادى.

ءوز كەزەگىندە جۇرگىزۋشى مەن جولاۋشىلار پاترۋلدىك پوليتسيا قىزمەتكەرلەرىنە: – راقمەت، ەڭبەكتەرىڭىز جانا بەرسىن! تۇركىستان وبلىسى پاترۋلدىك پوليتسيا قىزمەتكەرلەرىنە العىس ايتامىز، – دەپ جىلى لەبىزدەرىن جەتكىزدى. ال كۇننىڭ ىزعارىنا قاراماستان قىزمەتىن جالعاستىرىپ جاتقان پوليتسەيلەر جولاۋشىلارعا: – جول تايعاق، سوندىقتان اباي بولىڭىزدار. ۇزاق جولعا شىقپاڭىزدار!، – دەپ ەسكەرتۋ جاسادى.

ايتا كەتكەن ءجون، جىل سايىن قىس ماۋسىمىندا پاترۋلدىك پوليتسەيلەر جولداردى ۇزدىكسىز باقىلاپ، كومەككە مۇقتاج بولعان جۇرگىزۋشىلەرگە كومەك كورسەتىپ، العىستارىن الىپ كەلەدى. بۇل جولى دا بۇرىن سوڭدى بولماعان بوراندا جولدا قالعان كولىكتەردىڭ بارلىعىنا كومەكتەستى. ءالى دە جول جيەگىنە جينالىپ قالعان ومبى قار مۇزعا اينالىپ، كولىكتەرگە كەدەرگىسىن كەلتىرۋدە. سوندىقتان وبلىس پوليتسەيلەرى پاترۋلدەۋ جۇمىستارىن جالعاستىرا بەرمەك.

وبلىس پوليتسەيلەرى ەسكەرتەدى: جول ءجۇرۋ ەرەجەلەرىن ءاردايىم ۇستانىڭىزدار. جىلدامدىقتى اسىرماڭىزدار! اۋا رايى قولايسىز ساتتە ۇزاق جولعا شىعۋدىڭ قاجەتى جوق. ال ەگەر ءماجبۇر بولساڭىز ساپارعا شىعاردا كولىگىڭىزدى قاجەتتى زاتتارمەن قامداپ العانىڭىز ءجون.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز