– وسىدان وتىز التى جىلداي بۇرىن عوي. ول دا ءبىر, شىركىن, قىزىق ۋاقىت ەدى-اۋ! – دەپ ەسكە الادى قازاقستان جانە حالىقارالىق جۋرناليستەر وداعىنىڭ مۇشەسى, كەزىندە رەسپۋبليكالىق بارلىق باسىلىمداردا (ىشىندە قازىرگى «ەگەمەن قازاقستان» دا بار) ءجيى كورىنىپ جۇرگەن, بىرنەشە رەت جەكە كورمەسى وتكەن, قازتاگ پەن وداقتىق اپن اقپارات اگەنتتىگىمەن دە تىعىز بايلانىستا بولعان, سەزىمىڭدى سەلت ەتكىزەر تالاي تاماشا فوتوسۋرەتتىڭ اۆتورى, بۇگىندە جاسى سەكسەننەن اسقان قاليعۇمار اعا قابدەشەۆ. – فەستيۆال الدىندا ەلىمىزدەگى «لەنينسكايا سمەنا» گازەتىنىڭ رەداكتسياسى فوتوسۋرەتتەرگە بايقاۋ جاريالاعان ەدى, سونىڭ جەڭىمپازى رەتىندە ماعان دا ماسكەۋگە (ول جاقتا تۇسىرگەن كوپ فوتوسۋرەتىم بار) بارۋعا جولداما بەرىلدى عوي. ەندى مىنا سۋرەتتىڭ جاي-جاپسارىنا كەلەيىك. بۇل قالا ورتالىعىنىڭ كورىكتى جەرىنىڭ بىرىندە جينالا قالعان قازاقستاندىق جاستاردىڭ ءبىر توبى. سول جاقتان تۇرەگەپ تۇرعانداردىڭ ءۇشىنشىسى قازىرگى كەزدە جانىڭدى الديلەپ, جۇرەگىڭدى شىم ەتكىزەتىن كەرەمەت ءان-اۋەندەردىڭ اۆتورى, كومپوزيتور تولەگەن مۇحامەدجانوۆ, وڭ جاقتان العاندا ءبىرىنشى تۇرعان مەن, مەنەن كەيىنگى ايگىلى اكتەر, رەجيسسەرىمىز, مەملەكەتتىك سىيلىقتىڭ لاۋرەاتى دوسحان جولجاقسىنوۆ. ال وتىرعانداردىڭ ىشىندە وڭ جاقتان ءبىرىنشى ارىپتەسىم, بەلگىلى ءفوتوتىلشى, مارقۇم راقىمباي حاناليەۆ.
باسقالارىن, شىنىمدى ايتسام, ۇمىتىپپىن, قازىر ەسىمدە جوق...
بەرىكباي قادىقوۆ,
جۋرناليست
الماتى وبلىسى,
قاراساي اۋدانى
