ۇلتىمىزدىڭ كورنەكتى وكىلدەرىنىڭ ءبىرى, دالا ويشىلى, فيلوسوف, اقىن شاكارىم قۇدايبەردى ۇلى – ادەبيەتتىڭ بارلىق جانرىندا جەمىستى ەڭبەك ەتكەن قايراتكەر. ول ادام بويىنداعى ادامگەرشىلىك قاسيەتتەردى ەرەكشە جىرلادى. قازاق قاۋىمىنا ادال ەڭبەك ەتىپ, بويىنا ءبىلىم نۇرىن ءسىڭىرىپ, سول ارقىلى بيىك جەتىستىككە جەتسىن دەگەن وي تاستايدى.
ونلاين-ءدارىس بارىسىندا جاستار اقىننىڭ ادامي قۇندىلىقتار تۋرالى فيلوسوفيالىق ويلارىمەن تانىستى.
اقىن «ماقتان ءۇشىن مال جيما, جان ءۇشىن جي, عيبادات پەن ادالدىق ار ءۇشىن جي», دەپ باقىتتىڭ ءوزى ادالدىققا نەگىزدەلەتىنىن ايتا كەلىپ, پاراساتتى تۇلعا بولىپ قالىپتاسۋ ءۇشىن ادام بويىندا اسىل قاسيەتتەردىڭ بولۋى كەرەكتىگىن اشىپ كورسەتكەن.
شاكارىمنىڭ اسىل ويلارى ادالدىق, ادىلدىك, ىنساپ, ادىلەت, مەيىرىم سياقتى اسىل قاسيەتتەردى كىرلەتپەۋگە نەگىزدەلگەن.
اقىن جاستارعا:
«ماقتان ءۇشىن مال جيما, جان ءۇشىن جي,
قازاققا كوز سۇزبەستىڭ قامى ءۇشىن جي.
ارىڭ ساتپا, تەرىڭ سات, ادالدى ىزدە,
عيبادات پەن ادالدىق, ار ءۇشىن جي», دەپ وسيەت ەتكەن.
شاكارىم وسيەتى قازىرگى وركەنيەتتى زاماندا دا ءوز قۇندىلىعىن جويمايدى, ول بارشا ادامزاتتىڭ جان دۇنيەسىنىڭ ايناسى بولۋى قاجەت. زامانداس جاستاردىڭ مىندەتى – دالا ويشىلى جىرلاپ وتكەن ار, بورىش, ادالدىق سىندى قاسيەتتەردى ءوز بويلارىنا دارىتا ءبىلۋ.
اقپارات جانە قوعامدىق دامۋ مينيسترلىگىنىڭ قولداۋىمەن بەينەساباق رەسپۋبليكالىق جانە وڭىرلىك تەلەارنالار ەفيرىندە كورسەتىلدى, سونداي-اق اگەنتتىكتىڭ Youtube ارناسىندا جانە الەۋمەتتىك جەلىدە ورنالاستىرىلدى.
