قازاقستان • 26 قاڭتار، 2021

سەناتورلار ەاەو اياسىندا بىرقاتار قۇجاتتاردى راتيفيكاتسيالاۋ تۋرالى زاڭ جوبالارىن قارادى

2 رەت كورسەتىلدى

بۇگىن سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسى بولدى. وندا دەپۋتاتتار ەۋرازيالىق ەكونوميكالىق وداق اياسىندا قولدانىستاعى بىرقاتار حاتتامالار مەن كەلىسىمدەردى راتيفيكاتسيالاۋدى تالقىلادى.

زاڭ جوبالارىنىڭ بىرىندە قۇپيا اقپاراتتى قورعاۋ ءتارتىبى جانە ونى جاريا ەتكەنى ءۇشىن جاۋاپكەرشىلىك تۋرالى كەلىسىمگە ارمەنيا رەسپۋبليكاسىنىڭ قوسىلۋىن زاڭدى رەسىمدەۋ كوزدەلىپ وتىر. بۇل ەۋرازيالىق ەكونوميكالىق كوميسسيانىڭ باسەكەلەستىكتىڭ بىرىڭعاي قاعيدالارىنىڭ ساقتالۋىن باقىلاۋدى جۇزەگە اسىرۋى كەزىندە ەرەكشە ماڭىزدى.

«ارمەنيا رەسپۋبليكاسىنىڭ كەلىسىمگە قوسىلۋى ترانسشەكارالىق نارىقتارداعى باسەكەلەستىكتىڭ جالپى قاعيدالارىنىڭ بۇزىلۋى تۋرالى وتىنىشتەردى قاراۋ، تەرگەۋ جۇرگىزۋ جانە ىستەردى قاراۋ بارىسىندا ەۋرازيالىق ەكونوميكالىق كوميسسيانىڭ جانە ەۋرازيالىق ەكونوميكالىق وداققا مۇشە مەملەكەتتەردىڭ مونوپولياعا قارسى ورگاندارىنىڭ بارلىق لاۋازىمدى تۇلعالارى مەن قىزمەتكەرلەرىنە قۇپيا اقپاراتتى جاريا ەتكەنى ءۇشىن جاۋاپكەرشىلىكتى تەڭ دارەجەدە قاراستىرۋعا مۇمكىندىك بەرەدى»،-دەپ اتاپ ءوتتى كوميتەت توراعاسى، سەناتور داۋرەن ادىلبەكوۆ.

وتىرىستا سونداي-اق ەاەو مەن سەربيا رەسپۋبليكاسى اراسىنداعى ەركىن ساۋدا تۋرالى كەلىسىمدى راتيفيكاتسيالاۋعا قاتىستى زاڭ جوباسى قارالدى. ول قابىلدانعاننان كەيىن سەربيادان ەاەو ەلدەرىنە جانە كەرىسىنشە كەيبىر تاۋارلاردى اكەلۋگە كەدەندىك باجدار الىنىپ تاستالادى، سونداي-اق بىرقاتار جۇكتەردى باجسىز اكەلۋگە كۆوتالار بەرىلەدى.

سەناتورلار وتىرىستىڭ قاراۋىنا "2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى" زاڭ جوباسىن دا ەنگىزدى.

«وندا ەاەو شارتىنىڭ تەرمينولوگياسى ناقتىلانادى، سونداي-اق اۆانس تولەمدەردى كەدەندىك اكەلۋ، ارنايى، دەمپينگكە قارسى، وتەماقى باجدارىن تولەۋ ەسەبىنە ەسەپكە الۋ مۇمكىندىگىنە قاتىستى ولقىلىقتار جويىلادى»، - دەپ اتاپ ءوتتى سەنات دەپۋتاتى ءلاززات رىسبەكوۆا.

سوڭعى جاڭالىقتار

ۇقساس جاڭالىقتار