قازاقتىڭ بەلگىلى اقىنى, قازاقستان جازۋشىلار وداعىنىڭ مۇشەسى قايرات جۇماعاليەۆ 77-گە قاراعان شاعىندا قايتىس بولدى. بۇل تۋرالى «قازاقستان» تەلەارناسى حابارلادى.
قايرات جۇماعاليەۆ 1937 جىلى 16 قىركۇيەكتە ورال وبلىسى وردا اۋدانى قوسشى اۋىلىندا تۋعان. 1959 جىلى قازاق مەملكەتتىك ۋنيۆەرسيتەتىنىڭ فيلولوگيا فاكۋلتەتىن بىتىرگەن.
ق.جۇماعاليەۆ 1959-1984 جىلدارى «جازۋشى» باسپاسىندا كىشى رەداكتور, رەداكتور, اعا رەداكتور, رەداكتسيا مەڭگەرۋشىسى, باس رەداكتوردىڭ ورىنباسارى, 1985-1992 جىلى «قازاقتەلەراديو» كوميتەتىندە اعا رەداكتور, كوممەنتاتور, رەداكتسيا مەڭگەرۋشىسى, باس رەداكتور, 1992-1996 جىلدارى قازاقستان پارلامەنتى سەناتىنىڭ اۋدارما-رەداكتسيالىق بولىمىندە سەكتور مەڭگەرۋشىسى, كەڭەسشى بولدى. كەيىنگى كەزدەرى «سارىارقا» جۋرنالىندا رەداكتور بولىپ قىزمەت ەتتى.
اقىننىڭ العاشقى شىعارمالارى 60-جىلداردىڭ باسىندا جاريالانا باستادى.العاشقى ولەڭدەر جيناعى «تۇڭعىش» 1964 جىلى جارىق كورگەن. وسى كەزگە دەيىن ونىڭ قالامىنان تۋعان ولەڭدەر 30 كىتاپقا جيناقتالدى. بىرقاتار شىعارمالارى ورىس تىلىنە ءتارجىمالانىپ, كىتاپ بولىپ باسىلعان. جەكە ولەڭدەرى اعىلشىن, فرانتسۋز, اراب, نەمىس, قىتاي, حيندي, يسپان, پولياك جانە بولگار تىلدەرىنە اۋدارىلعان. ءوزى فرانتسۋز, موڭعول اقىن-جازۋشىلارىنىڭ روماندارىن قازاق تىلىنە اۋدارعان. اقىن ولەڭدەرىنە كوپتەگەن اندەر جازىلعان.
قالامگەر بەلارۋس رەسپۋبليكاسىنىڭ قۇرمەت گراموتاسىمەن, قازاقستان جوعارى كەڭەسىنىڭ قۇرمەت گراموتاسىمەن, «تىڭ جانە تىڭايعان جەرلەردى يگەرگەنى ءۇشىن», «ەڭبەكتەگى ەرلىگى ءۇشىن» مەدالدارىمەن, كسرو جانە قازاقستان جازۋشىلار وداعىنىڭ گراموتالارىمەن ماراپاتتالعان.
قايرات جۇماعاليەۆتى اقىرعى ساپارعا شىعارىپ سالۋ 20 جەلتوقسان كۇنى الماتىدا وتەدى.
ساكەن مايلىباي.
دەرەككوز: قازاقستان تەلەارناسى.
