ايماقتار • 26 قاڭتار، 2021

جەتىسۋ «جاسىل ايماققا» قايتا ورالدى

13 رەت كورسەتىلدى

الماتى وبلىسى بۇعان دەيىن جۇقپالى ىندەتتىڭ تارالۋ قاۋپى جونىنەن «سارى ايماق» ساناتىنا كىرگەن ەدى. ال بۇگىننەن باستاپ وڭىردەگى ەپيدەميالىق احۋال وڭالىپ، ەل ىشىندەگى تىنىس-تىرشىلىك «جاسىل ايماق» دەڭگەيىنە قايتا ورالدى، دەپ حابارلايدى Egemen.kz

جالپى، پاندەميا باستالعان كەزەڭنەن بەرى وبلىستا كوروناۆيرۋس جۇقتىرعان تۇرعىن سانى 8 861 ناۋقاسقا دەيىن جەتكەن. كەيىنگى كەزەڭدە ىندەتتىڭ تارالۋ قارقىنى ەكپىندەپ، جۇعۋ كورسەتكىشى 1،0 پايىزدى قۇرادى. ىندەتتىڭ تارالۋ سوڭعى تاۋلىكتە تەكەلى مەن تالدىقورعان قالالارىندا ءجيى بايقالعان ەكەن. ياعني، وتكەن ءبىر اپتانىڭ ەسەبى بويىنشا جەتىسۋداعى جۇقپالى ىندەتكە شالدىققان ناۋقاس سانى 1430 ادامعا دەيىن جەتىپ، تاۋلىگىنە  71 ناۋقاس انىقتالعان بولاتىن. الايدا، ءوڭىردىڭ ەپيدەميولوگتارى جاعداي قالىپتى دەڭگەيگە ءتۇستى دەگەن پىكىردە.

– ينفەكتسيالىق سىرقاتقا شالدىعۋشىلار ءالى دە ازايعان جوق. بىراق، ىندەتتىڭ تارالۋى باسەڭدەدى. سوندىقتان وبلىستاعى احۋال «سارى ايماقتان» ءوتىپ، «جاسىل ايماققا» تۇراقتادى. ياعني، ايماقتاعى الدىن الۋ مەن كۇرەس شاراسى ءوز ناتيجەسىن بەردى دەۋگە بولادى. ءارى وبلىس دارىگەرلەرى ۆيرۋستى ينفەكتسيانى ەمدەۋ بويىنشا جوعارى دەڭگەيدە كاسىبيلىك كورسەتىپ وتىر. ونىڭ دالەلى رەتىندە ءبىر تاۋلىكتە 104 ناۋقاستىڭ دەرتىنەن ايىققانىن ايتا الامىز، – دەيدى الماتى وبلىستىق سانيتارلىق ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسحات شاراپيەۆ.

ال وبلىستىڭ مەديتسينا مەكەمەلەرى كۇشەيتىلگەن رەجيمدە جۇمىس ىستەپ جاتىر ەكەن. بارلىق اۋرۋحانالارداعى توسەك سانى 1138 ورىننان 1300 ورىنعا دەيىن كوبەيتىلگەن. ونىڭ ىشىندە جەدەل كومەكتى قاجەت ەتەتىن ناۋقاستارعا ارنالعان جانساقتاۋ بولىمدەرىنەدەگى ورىن سانى 124 توسەكتەن 135 توسەككە دەيىن ارتقان. قازىر دارگەرلەردىڭ جالپى جۇمىس جۇكتەمەسى 40 پايىز شاماسىندا كورىنەدى.

ارينە، ايماقتا ىندەتپەن كۇرەسكە قماقتى قارجى ءبولىنىپ وتىر. كوروناۆيرۋستىڭ العاشقى كەزەڭىندەگى ءىس-شارالار ءۇشىن وبلىس  بيۋدجەتىنەن 13،8 ملرد تەڭگە قارجى بولىنگەن بولاتىن. بۇل قارجىنىڭ ءبىر بولىگى، انىعىندا 8،8 ملرد تەڭگەسى ىندەتتىڭ ەكىنشى تولقىنىنا جۇمسالۋدا. ءوڭىر بويىنشا جۇقپالى يفەكتسيامەن كۇرەس جۇمىسىنا ءجىتى كوڭىل بولىنگەندىكتەن، قازىر ەمحانالار مەن اۋرۋحانالاردىڭ دايىندى جوعارى دەڭگەيگە جەتتى. دەرەك بويىنشا قازىر  مەديتسينالىق ۇيىمداردا 17 كومپيۋتەرلىك توموگراف، 53 رەنتگەن اپپاراتى، 534 وكپەنى جاساندى جەلدەتۋ قوندىرعىسى جۇمىس ىستەيدى. ونىڭ ىشىندە بالالاردىڭ دەنساۋلىعىنا قاجەتتى 70 اپپارت جانە  ەرەسەكتەر ادامدار قولدانۋعا ارنالعان 464 قوندىرعى ورناتىلعان.

– وبلىستاعى 17 اۋداندىق اۋرۋحانا وتتەگى ستانتسيالارىمەن قامتاماسىز ەتىلدى.. بۇل ماقساتقا جەرگىلىكتى بيۋدجەتتەن 818،2 ملنتەڭگە ءبولىندى. سونداي-اق، وتتەگى كونتسەنتراتتارىنىڭ سانى 1350 داناعا جەتتى. تاپسىرماعا سايكەس اشىلعان 26 رەانيماتسيالىق بولىمشە دە  قاجەتتى قۇرالدارمەن جابدىقتالدى. جالپى، وبلىس بويىنشا مەديتسينالىق جابدىقپەن قامتاماسىز ەتۋ 79 پايىزدان 89 پايىزعا دەيىن ارتتى. دەنساۋلىق كۇزەتى ءۇشىن 180 «جەدەل جاردەم» كولىگى، سونداي-اق، 12 جىلجىمالى مەديتسينالىق كەشەن ساتىپ الىندى. بۇگىندە جەدەل كومەك كورسەتتىن بريگادالار سانى 205 توپقا دەيىن كوبەيدى، – دەيدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى ارمان جانسەڭگىروۆ.

ايتپاقشى، وبلىستا ىندەت بەلگىسىن انىقتايتىن 10 زەرتحانا جۇمىس ىستەيدى، وندا تاۋلىگىنە 6،3 مىڭعا دەيىن زەرتحانالىق زەرتتەۋ جۇرگىزىلەدى ەكەن. سونداي-اق، تۇرعىنداردىڭ دەنساۋلىعىن قورعاۋ كۇزەتىندە 3 455 مەديتسينا قىزمەتكەرى، ونىڭ ىشىندە 851 دارىگەر جۇمىلدىرىىپ وتىر. سونداي-اق، وبلىس اۋرۋحانالارىندا جەكە قورعانۋ قۇرالدارى مەن دارىلىك زاتتاردىڭ ەكى ايلىق قورى بار. مۇنان بولەك، الەۋمەتتىك جاعىنان قورعالماعان ادامدار ءۇشىن جەرگىلىكتى بيۋدجەت ەسەبىنەن 92،1 ملن تەڭگەگە ۆيرۋسقا قارسى پرەپاراتتار ساتىپ الىنىپتى.  

سوڭعى جاڭالىقتار

ۇقساس جاڭالىقتار