گرەتسياداعى قارجى داعدارىسىنا بايلانىستى افينا قالاسىنىڭ مىڭداعان تۇرعىنى ۇيلەرىن وتىنمەن جىلىتۋدا. بۇل تۋرالى يتار-تاسس حابارلادى.
تۇنگى مەزگىلدە گرەتسيا استاناسىنىڭ اسپانىن قويۋ ءتۇتىن باسادى. مىڭداعان قالا تۇرعىنى كوممۋنالدىق قىزمەت اقىسىنىڭ قىمباتتاۋىنا بايلانىستى ۇيلەرىندە پەش جاعا باستاعان. سەبەبى تۇرعىندار ءۇشىن تابيعي گازدىڭ ورنىنا وتىن پايدالانۋ الدەقايدا ءتيىمدى بولماق. اسىرەسە, جالاقىسى تومەن نەمەسە داعدارىس سالدارىنان جۇمىسىنان ايىرىلعان ازاماتتار ۇيلەرىندەگى ەلەكتر قۋاتىنىڭ اقىسىن تولەي الماي جارىقسىز قالۋىنا بايلانىستى وتىنمەن جىلىنۋدان باسقا امالدارى جوق ەكەنىن ايتىپ قىنجىلادى.
گرەتسيا ۇلتتىق مەتەورولوگيا قىزمەتى افينادا اۋانىڭ قاتتى لاستانىپ, سونىڭ اسەرىنەن جەلسىز سۋىق اۋا رايى تۋىنداعانىن ەسكەرتتى. قورشاعان ورتا, ەنەرگەتيكا جانە كليماتتىق وزگەرىستەردى قورعاۋ مينيسترلىگى زەرتتەۋ جۇرگىزۋ ناتيجەسىندە افينادا اۋا لاستانۋىنىڭ دەڭگەيى ءبىر كۋبومەترگە شاققاندا 110 ميكروگراممدى قۇراعانىن مالىمدەدى. مامانداردىڭ ايتۋىنشا, بۇل كورسەتكىش ونداعى اۋانىڭ ادام دەنساۋلىعىنا زيان كەلتىرىپ, ونكولوگيالىق, تىنىس پەن جۇرەك اۋرۋلارىنىڭ پايدا بولۋىنا ىقپال ەتۋ مۇمكىندىگىن كورسەتەدى.
ايدار ورىسباەۆ.
دەرەككوز: Itar-tass.com
