ەلىمىز تاۋەلسىزدىگى كۇنىنە ارنالعان سالتاناتتى شارا اقش استاناسى ۆاشينگتوندا اتالىپ ءوتتى. بۇل تۋرالى «حابار» تەلەارناسى حابارلادى.
قازاقستان رەسپۋبليكاسى تاۋەلسىزدىگى كۇنىمەن ەڭ ءبىرىنشى بولىپ اقش مەملەكەتتىك حاتشى دجون كەرري قۇتتىقتادى. ودان ءارى ءسوز مەملەكەتتىك حاتشىسىنىڭ كومەكشىسى نيشا دەساي بيسۆالعا بەرىلدى: «قازاقستان ءوزىن تۇراقتىلىق, قاۋىپسىزدىك جانە ەكونوميكالىق دامۋ كورسەتكىشى بويىنشا وڭىردەگى كوشباسشى رەتىندە تانىتتى. قازاقستاننىڭ باستامالارى ايماقتاعى عانا ەمەس, الەمدىك دەڭگەيدەگى پروبلەمالاردى شەشۋگە وڭ اسەر ەتۋدە. جالپى, نۇرسۇلتان نازارباەۆتىڭ «جاسىل ەكونوميكا» باستاماسى – تەك ءبىر عانا مەملەكەت ءۇشىن ەمەس, حالىقارالىق قاۋىمداستىققا ۇلگى بولارلىق يدەيا»,-دەدى ول.
بۇل رەتتە نيشا دەساي بيسۆال اقش پەن قازاقستاننىڭ بەرىك بايلانىسى جىل ساناپ ارتىپ كەلە جاتقانىن ايتىپ, قازىر اۋعانستانداعى تۇراقتىلىقتى قامتاماسىز ەتۋدە ەكى ەل قايتادان بىلەك تىرەسە جۇمىس جاساپ جاتقانىن تىلگە تيەك ەتتى. ال كەلەسى كەزەكتە ىقىلاس پەيىلدەرىن بىلدىرگەن ازاماتتاردىڭ پىكىرلەرى بىلايشا ءوربىدى.
ستيۆ ستوكمان, تەحاس شتاتىنان كونگرەسسمەن:
«قازاقستاندى يادرولىق قارۋسىزدانۋ مەن الەمدەگى بەيبىتشىلىكتى ورناتۋعا ەرەكشە ۇلەس قوسقان ەل رەتىندە جاقسى بىلەمىز. ءبىز تەحاس استاناسى حيۋستون مەن قازاقستان اراسىنداعى اۋە بايلانىسىنىڭ ورناۋىن اسىعا كۇتۋدەمىز. بۇل ەكى تاراپتىڭ مۇناي جانە گاز سالاسىنداعى بايلانىسىن وڭ جولعا قويار ەدى».
بيلل كيتينگ, ماسساچۋسەتس شتاتىنان كونگرەسسمەن:
«قازاقستاننىڭ «جاڭا ۇلى جىبەك جولى» جوباسىنا اقش ۇلكەن قىزىعۋشىلىق تانىتىپ وتىر. سونداي-اق, ءبىز قازاقستاننىڭ «جاسىل ەكونوميكا» باستاماسىن قولدايمىز. بۇل ەلدەرىڭىزدىڭ ەنەرگەتيكالىق رەسۋرستاردى ۇنەمدەۋگە دەن قويىپ وتىرعانىن كورسەتەدى».
اقش ەلىمىزدى تەك ستراتەگيالىق سەرىكتەس رەتىندە عانا قاراستىرمايدى. ساراپشىلاردىڭ دالەلىنە جۇگىنسەك, قازاقستان – ازيا مەن ەۋروپانى بايلانىستىرىپ تۇرعان نەگىزگى مەملەكەت.
باقىتبەك كەنەش ۇلى.
دەرەككوز: «حابار» تەلەارناسى.
