وقيعا • 25 قاڭتار، 2021

«مەن قازىر 80 جاستامىن. وسكەندە نە ىستەيتىنىمدى ءالى بىلمەيمىن» (ايگىلى تەلەجۇرگىزۋشى لارري كينگ دۇنيەدەن ءوتتى)

73 رەت كورسەتىلدى

ايگىلى تەلەجۇرگىزۋشى لارري كينگ 87 جاسقا قاراعان شاعىندا قايتىس بولدى. قايعىلى حابار تۋرالى ەڭ العاش Ora Media حابارلادى. CNN اگەنتتىگىنىڭ حابارلاۋىنشا، ونشاقتى كۇن بۇرىن جۋرناليست كوروناۆيرۋس جۇقتىرعانى انىقتالىپ، لوس-اندجەلەستەگى Cedars Sinai مەديتسينالىق ورتالىعىنا تۇسكەن.

 

لارري كينگ ءوز مانسابىنىڭ 60 جىلدان استام ۋاقىتىن راديو مەن تەلەۆيزيا سالاسىنا ارناپ، الەم­نىڭ كوپتەگەن مەملەكەتى­نىڭ باسشىلارىنان، تانىمال تۇلعا­لار­دان سۇحبات الدى. ول جۇرگىزگەن CNN ارناسىنداعى Larry King Live باع­دارلاماسىن شارتاراپتىڭ تۇكپىر-تۇكپىرىندەگى ميلليونداعان كورەرمەن تاماشالادى. 1985 جىلدان 2010 جىلعا دەيىن جالعاسقان تەلەشوۋ جەر-جاھانداعى ەڭ ۇزدىك جوبانىڭ ءبىرى سانالدى.

كينگتىڭ ءومىرى – جۋرناليستيكانى سەرىك ەتكەندەردىڭ بارىنە ۇلگى. ول 1933 جىلى نيۋ-يوركتە ءدىندار ەۆرەيلەردىڭ وتباسىندا دۇنيەگە كەلگەن. شىن اتى – لورەنس حارۆەي زەيگەر.

لارري 8 جاسقا تولعاندا اكەسى ەدۋارد جۇرەك تالماسىنان دۇنيە سالعان. ءسويتىپ، قارشاداي كينگ اناسىنا كومەكتەسىپ، وتباسىن اسىراۋعا ءماجبۇر بولعان. ول بالا كەزىنەن راديودا جۇمىس ىستەۋدى ارماندايدى. ايتكەنمەن، مەكتەپتى اياقتاعان سوڭ ەڭبەككە ەرتە ارالاسۋىنا تۋرا كەلگەن. ءسويتىپ، 20 جاستاعى لارري پوشتا قىزمەتىمەن اينالىساتىن UPS كومپانياسىنا جۇمىسقا تۇرادى. بىراق ارمانىنان كۇدەر ۇزبەيدى.

ونىڭ تاعدىرىن وزگەرتۋگە ءبىر وقيعا قاتتى اسەر ەتەدى. بىردە ول CBS ارناسىنىڭ جۋرنالي­سى­مەن جولىعىپ قالادى. تاجى­ري­بەلى مامانمەن قۇمارى تارقا­عانشا اڭگىمەلەسەدى. ءسويتىپ، ءجۋر­نا­ليستىڭ اقىلىن تىڭداپ، فلو­ريدا شتاتىنا تارتىپ كەتەدى. ءساتى ءتۇسىپ، ماياميدەگى راديو­ستان­­­سالاردىڭ بىرىنە ديدجەي قىزمەتىنە ىلىگەدى.

ءسويتىپ جۇرگەندە راديوداعى تىلشىلەردىڭ ءبىرى كەنەتتەن جۇمىس­تان كەتەدى. كينگتىڭ تالابىن اڭ­عارعان باسشىلىق وعان باع­دارلاما جۇرگىزۋگە رۇقسات ەتەدى. لارري ديدجەيلىكپەن قاتار جاڭا­لىقتار مەن سپورت اقپاراتىن تىڭدارمانعا جەتكىزىپ وتىرعان. سول كەزدە ونىڭ جالاقىسى اپتاسىنا نەبارى 50 دوللار عانا بولعان ەكەن.

لارري كينگتىڭ ومىرىندەگى تاعى ءبىر ەرەكشە وقيعا مىناۋ. العاشقىدا ول راديوعا شىن اتى-جونىمەن لورەنس حارۆەي زەيگەر بولىپ شىعىپ جۇرەدى. بىردە باسشىلارى ءدال تىكەلەي ەفير الدىندا زەيگەر ەسىمى جۇرتتىڭ ەسىندە قالمايتىنىن ايتىپ، تەز ارادا تەگىن ۇلتىنان حابار بەرمەيتىن اتاۋعا اۋىستىرۋدى سۇرايدى. لارري (لورەنستى ەركەلەتىپ وسىلاي اتاعان) ۇزاق ويلانباستان، ەسىنە تۇسكەن العاشقى تىركەستى – King’s Wholesale Liquor جارناماسىنداعى كينگ ءسوزىن تاڭدايدى. جاڭا ەسىم جۇرتشىلىقتىڭ نازارىن بىردەن اۋدارادى. ءسويتىپ، ول ەكى جىلدان كەيىن اتى-ءجونىن تولىقتاي لارري كينگ دەپ وزگەرتەدى.

كەيىنىرەك ەڭبەكقورلىعى مەن تاپقىرلىعىنىڭ ارقاسىندا ونىڭ جۇرگىزگەن راديو شوۋلارى تىڭدارماننىڭ ىقىلاسىنا بولەنەدى. وسىلايشا، ايماققا تانىمال جۋرناليسكە اينالادى. 1970-ءشى جىلدارى اتاعى تىپتەن اسپانداپ، بۇكىل اقش-قا تانىلدى. 1978 جىلى لارري Mutual Broadcasting System (MBS) راديو­­سىنا اۋىسادى. وسىندا ول Larry King Show توكشوۋىن جۇرگىزەدى.

اتالعان باعدارلاما كينگتىڭ داڭقىن شارتاراپقا جايدى. MBS-تە بىرنەشە جىل جۇمىس ىستەگەننەن كەيىن CNN ارناسى ونى اتتاي قالاپ شاقىرتادى. ءسويتىپ، لارري Larry King Live توكشوۋىنىڭ نەگىزىن قالادى. بۇل باعدارلامانى 2010 جىلعا دەيىن تۇراقتى جۇرگىزدى.

وسى ۋاقىت ىشىندە ول كوپتەگەن تانىمال تۇلعالاردان ينتەرۆيۋ العان. CNN ارناسىنىڭ مالىمەتىنە سۇيەنسەك، جۋرناليستىك مانسابىندا كينگ 50 مىڭنان استام ادامنان سۇحبات العان ەكەن. ولاردىڭ قاتارىندا مارتين ليۋتەر كينگ، دالاي لاما، بيلل گەيتس، مارگارەت تەتچەر، ميحايل گورباچەۆ سەكىلدى الەمگە ايگىلى تۇلعالار بار. سونداي-اق اقش-تىڭ 38-ءشى پرەزيدەنتى دجەرالد فورد تا قوناقتارىنىڭ ءبىرى بولعان. لارري كينگ سودان بەرى باراك وباماعا دەيىنگى اقش-تىڭ پرەزيدەنتتەرىنىڭ بارىنەن ينتەرۆيۋ الىپ شىققان.

ونىڭ 1993 جىلعى توكشوۋىن ءبىر ساتتە 16،3 ميلليون ادام كورىپ، رەكورد ورناتتى. كينگتىڭ 1995 جىلى پالەستينا باسشىسى ياسير ارافاتپەن، يزرايل پرەمەر-ءمينيسترى يتسحاك رابينمەن جانە يوردانيا پاتشاسى حۋسەينمەن جۇر­گىزگەن ينتەرۆيۋلەرى دە شار­تاراپتىڭ قىزىعۋشىلىعىن وياتتى.

ءلارريدىڭ جۋرناليستيكا سالا­سىنداعى ماراپاتتارى مىڭ­داپ سانالادى. سولاردىڭ ىشىندە Peabody سىيلىعى مەن ەممي سىي­لىعىنىڭ شوقتىعى بيىك. سونداي-اق Cable ACE ماراپاتىن 10 مارتە يەلەنگەن.

لارري كينگ – جۋرناليستيكادا ءوز قولتاڭباسىن قالدىرعان تۇلعا. ول ەشقاشان ينتەرۆيۋ الىپ وتىرعان قوناعىنىڭ ۇستانىمى­نا قارسى كەلەتىن سۇراق قويماعان ەكەن. سوندىقتان شىعار، كەيبىرەۋ­لەر ونى تىم جەڭىل ساۋالدىڭ يەسى دەپ ايىپتاعان. الايدا ونىڭ وسىنداي ءتاسىلى كورەرمەندەر مەن تىڭدارماندارعا قاتتى ۇناي­­تىن. سول سەبەپتى، جۇرتقا ءوز ويىن ايتۋ­عا قۇمار تانىمال تۇلعالار لارري كينگتىڭ ينتەرۆيۋىنە قۋانا-قۋانا كەلىسەتىن.

كينگتىڭ تاعى ءبىر ەرەكشەلىگى – ەش­قاشان سۇحبات الاتىن ادا­مى­نىڭ كىتاپتارىن وقى­ماي­تىندىعى. ءتىپتى، ينتەرۆيۋگە الدىن الا دايىندالمايدى ەكەن. ويتكەنى ول سۇحباتتاسى تۋرا­لى كورەرمەندەر مەن تىڭدار­مان­داردان ارتىق ءبىلۋدى ۇناتپا­عان. ونىڭ قويعان ساۋالدارى كەيىپ­كەرىنىڭ بولمىسىن اشۋعا باعىتتالعان.

ءتىپتى كەيدە ەشكىم كۇتپەگەن ماسەلەگە توقتالادى. ماسەلەن، كينگ ءبىر سۇحباتىندا اقش پرە­زي­دەنتى لاۋازىمىن اتقارعان ريچ­ارد نيكسوننان «ۋوتورگەيتتىڭ تۇسى­نان ءوتىپ بارا جاتقاندا ءوزىڭىزدى ءبىر­تۇرلى سەزىنبەيسىز بە؟» دەپ سۇراپت­ى. ەستەرىڭىزدە بولسا، اق ءۇيدى باس­قارىپ تۇرعان ر.نيكسون «ۋوتەر­گەيت شۋى» دەپ اتالعان وقيعا­دان كەيىن قىزمەتىنەن كەتكەن ەدى. ەندى بىردە رونالد رەيگانعا «ەش­تەڭەنى ەسكە تۇسىرە الماساڭىز، ىزا­لا­ن­اسىز با؟» دەگەن ساۋال قويىپتى.

لارري كينگتىڭ جۋرناليستيكا­داعى ۇستانىمدارى دا وزگەشە. ول بىلاي دەيدى: «كۇن سايىن تاڭەر­تەڭ بۇگىن ايتاتىندارىم ماعان ەشتەڭە ۇيرەتپەيتىنىن ەسىمە سالىپ وتىرامىن. ەگەر ءبىر نارسەنى بىل­گىم كەلسە، تىڭداپ ۇيرەنۋىم كە­رەك. سويلەپ جاتقانىمدا ەشقا­شان ەشتەڭە ۇيرەنگەن ەمەسپىن».

«مەن ءبارىن بىلەتىن سەكىلدى كورىنگىم كەلمەيدى»، دەيدى ول. سوندىقتان ول سۇحبات بەرگەن پرەزيدەنتتەردەن وتە كۇردەلى ساياسي ماسەلەلەردى سۇرامايتىن. «ونىڭ ورنىنا «پرەزيدەنت مىرزا، بۇل قىزمەتتە سىزگە نە ۇنايدى؟» نەمەسە «ومىرىڭىزدەگى ەڭ ۇلكەن قاتەلىگىڭىز قانداي؟» دەپ ايتامىن»، دەپ اعىنان جارىلادى لارري.

بىرەۋدەن سۇحبات الۋدىڭ ورنىنا، ءوزى ينتەرۆيۋ بەرگەندە كينگ اعىنان جارىلادى. «بىردە ءتىلشى مەنەن ءوزىمدى قانشالىقتى جۋرناليست سانايتىنىمدى سۇرا­دى. «بىلمەيمىن»، دەپ جاۋاپ بەر­دىم. ويتكەنى مەن ءتىلشى بولىپ يراكقا بارعىم كەلمەيدى، بىراق وندا بارعاندارمەن اڭگىمەلەسكەن ۇنايدى»، دەيدى ول.

«نەگە دەگەن سۇراقتى قويعان ءجون. «نەگە مۇنى ىستەدىڭىز؟» نەگە دەگەن سۇراققا ءبىر عانا سوزبەن جاۋاپ بەرىلمەيدى».

«تابىسقا جەتكەن ادام باق تۋرالى ايتپاسا، ءوز-ءوزىن الداپ ءجۇر».

«سپورت – ماعان قاتتى ۇنايدى. ەڭ اۋەلى سونىڭ جاڭالىقتارىن قارايمىن».

«كەدەي كەزىمدى ەشقاشان ۇمىت­پايمىن. جولىم بولىپ كەتكەنى تۋرالى دا ويلاۋدى توقتات­قان ەمەسپىن».

«باستاپقىدا ءبارىن ىستەي بەرە­تىنمىن. ماياميدە جاڭالىق جۇرگىزدىم، اۋا رايىن حابارلادىم، سپورت تۋرالى ايتتىم، ديدجەي بولدىم».

ء«بىر نارسە ىستەسەڭ، ونىڭ ناتي­جەسىن كۇت».

«مەن United Parcel Service جۇك كولىگىنە ءمىنىپ، ۇيلەردى ارالاپ ءسۇت ساتتىم. بىراق ءاردايىم راديودا جۇمىس ىستەۋدى ارماندايتىنمىن».

مۇنىڭ ءبارى – لارري كينگتىڭ ءار جىلدارى ايتقان سوزدەرى. وسىدان بىرنەشە جىل بۇرىن ول بىلاي دەگەن ەكەن: «مەن قازىر 80 جاستامىن. وسكەندە نە ىستەيتىنىمدى ءالى بىلمەيمىن».

 

سوڭعى جاڭالىقتار

قازاقستاندا جاڭا كەن ورنى تابىلدى

ەكونوميكا • بۇگىن، 16:21

ەڭ سۇلۋ ۆولەيبولشى كىم؟

سپورت • بۇگىن، 16:15

ەل قورعاعان ەردىڭ ەسىمى جاڭعىردى

رۋحانيات • بۇگىن، 14:49

كورشىنىڭ كوپ-كورىم كومەگى

قوعام • بۇگىن، 14:23

ۇقساس جاڭالىقتار