«شاكارىم وسيەتى – ادالدىق ايناسى» اتتى ادالدىق ساعاتى ءوتتى

قازاقستان • 22 قاڭتار، 2021

«شاكارىم وسيەتى – ادالدىق ايناسى» اتتى ادالدىق ساعاتى ءوتتى

544 رەت كورسەتىلدى

سىبايلاس جەمقورلىققا قارسى ءىس-قيمىل اگەنتتىگىنىڭ باستاماسىمەن «شاكارىم وسيەتى – ادالدىق ايناسى» تاقىرىبىندا كەزەكتى ونلاين ادالدىق ساعاتى ءوتتى.

اقمارال اعزامقىزى

ۇلتىمىزدىڭ كورنەكتى وكىلدەرىنىڭ ءبىرى، دالا ويشىلى اتانعان فيلوسوف اقىن شاكارىم قۇدايبەردى ۇلى قازىرگى شىعىس قازاقستان وبلىسىنىڭ اباي اۋدانىندا دۇنيەگە كەلگەن. اباي نەگىزىن سالعان جاڭا سيپاتتاعى قازاق ادەبيەتىنىڭ اسا كورنەكتى وكىلى.

شاكارىم – جارتى عاسىردان استام شىعارماشىلىق ومىرىندە ادەبيەتتىڭ بارلىق جانرىندا جەمىستى ەڭبەك ەتكەن قايراتكەر. ول ادام بويىنداعى ادامگەرشىلىك قاسيەتتەردى ەرەكشە جىرلادى. قازاق قاۋىمىنا ادال ەڭبەك ەتىپ، بويىنا ءبىلىم نۇرىن ءسىڭىرىپ، سول ارقىلى بيىك جەتىستىككە جەتسىن دەگەن وي تاستايدى.

ونلاين-ءدارىس بارىسىندا جاستار اقىننىڭ ادامي قۇندىلىقتار تۋرالى فيلوسوفيالىق ويلارىمەن تانىستى.

اقىن «ماقتان ءۇشىن مال جيما، جان ءۇشىن جي، عيبادات پەن ادالدىق ار ءۇشىن جي»، – دەپ، باقىتتىڭ ءوزى ادالدىققا نەگىزدەلەتىنىن ايتا كەلىپ، پاراساتتى تۇلعا بولىپ قالىپتاسۋ ءۇشىن ادام بويىنداعى اسىل قاسيەتتەردىڭ بىرلىكتە بولۋى كەرەكتىگىن اشىپ كورسەتكەن.

شاكارىمنىڭ اسىل ويلارى ادالدىق، ادىلدىك، ىنساپ، ادىلەت، مەيىرىم سياقتى اسىل قاسيەتتەردى كىرلەتپەۋگە نەگىزدەلگەن.

اقىن جاستارعا بىلىمدىدەن عيبرات الۋعا، اقىلمەن ويلاپ ءىس قىلۋعا، «قۇلقىننىڭ ق ۇلى بولماي»، «ادامدىق بورىش – ار ءۇشىن قىزمەت ەت»، – دەپ وسيەت ەتكەن.

شاكارىم وسيەتى قازىرگى وركەنيەتتى زاماندا دا ءوز قۇندىلىعىن جويمادى، ول بارشا ادامزاتتىڭ جان دۇنيەسىنىڭ ايناسى بولۋى قاجەت. زامانداس جاستاردىڭ مىندەتى – دالا ويشىلىنىڭ جىرلاپ وتكەن ار، بورىش، ادالدىق سىندىق قاسيەتتەرىن بويىندا قالىپتاستىرا ءبىلۋى.

اقپارات جانە قوعامدىق دامۋ مينيسترلىگىنىڭ قولداۋىمەن بەينە-ساباق رەسپۋبليكالىق جانە وڭىرلىك تەلەارنالار ەفيرىندە كورسەتىلىپ، سونداي-اق اگەنتتىكتىڭ Youtube-ارناسىندا جانە الەۋمەتتىك جەلىلەردە ورنالاستىرىلدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز