اتالعان بريفينگتە الەۋمەتتىك مەديتسينالىق ساقتاندىرۋ قورىنىڭ باسقارما توراعاسى بولات توكەجانوۆ قوردىڭ 2020 جىلعى جۇمىسىن قورىتىندىلاپ, وسى جىلعا بەلگىلەنگەن نەگىزگى مىندەتتەردەن حاباردار ەتتى.
– مەديتسينالىق ساقتاندىرۋ جۇيەسىن جۇزەگە اسىرۋ كەزەڭى كوروناۆيرۋس پاندەمياسىمەن تۇسپا-تۇس كەلدى. قوردىڭ نەگىزگى مىندەتى – مەديتسينالىق ۇيىمداردى ۇزدىكسىز قارجىلاندىرۋ جانە كۆي-مەن كۇرەسكە جۇمىلدىرىلعان مەديتسينا قىزمەتكەرلەرىن ماتەريالدىق قولداۋ. قور بۇل مىندەتتى تولىق ورىندادى. ىندەتتىڭ تارالۋى جاعدايىنا دايىن بولۋ ءۇشىن بىرنەشە ماڭىزدى قادام جاسالدى. پاندەميا كەزىندە العاشقى مەديتسينالىق-سانيتارلىق كومەكتىڭ ءرولى كۇشەيتىلدى, ءموبيلدى توپتار قۇرىلىپ, ۇيدەگى كۇندىزگى ستاتسيونارلار ۇيىمداستىرىلدى جانە مەديتسينالىق قىزمەت قاشىقتان كورسەتىلە باستادى. سونىمەن قاتار پتر دياگنوستيكاسى بويىنشا زەرتحانالىق قىزمەتتىڭ مۇمكىندىگى ارتتى. قور مەديتسينالىق ساقتاندىرۋ جۇيەسىنە قاتىسۋ-قاتىسپاۋىنا قاراماستان بۇكىل حالىقتىڭ وسى كومەككە قولجەتىمدىلىگىن قامتاماسىز ەتتى. فورس-ماجور جاعدايلارعا قاراماستان, ءمامس-ءتى ەنگىزۋدىڭ ءبىرىنشى جىلىنىڭ ناتيجەسى مەديتسينالىق ساقتاندىرۋ جۇيەسىنىڭ تولىق جۇمىس ىستەيتىنىن كورسەتتى. بۇل دەنساۋلىق ساقتاۋ جۇيەسىنە 500 ملرد تەڭگەدەن اسا قارجى قۇيۋعا مۇمكىندىك بەردى. وسى قاراجات ەسەبىنەن مەديتسينالىق قىزمەتتەردىڭ – سيرەك كەزدەسەتىن سالا ماماندارىنىڭ كەڭەستەرى, دياگنوستيكا, تەكسەرۋلەر, كۇندىزگى ستاتسيونار قىزمەتىنىڭ كولەمى ەداۋىر ءوستى. ەندى بىزدە جوعارى تەحنولوگيالىق وپەراتسيالاردى قارجىلاندىرۋعا جانە مەديتسينالىق قىزمەتتىڭ وسى تۇرىنە كەزەكتى ازايتۋعا مۇمكىندىك بار, – دەدى ب.توكەجانوۆ.
وتكەن جىلدىڭ قورىتىندىسى بويىنشا امبۋلاتورلىق-ەمحانالىق دەڭگەيدە حالىققا 215 ملن-عا جۋىق قىزمەت كورسەتىلدى. امبۋلاتورلىق-ەمحانالىق كومەكتى قارجىلاندىرۋدى ۇلعايتۋ – امسق باسىمدىقتارىنىڭ ءبىرى. 110 ملن قابىلداۋ, بۇل قاتاردا 33 ملن-عا جۋىق بەيىندى مامانداردىڭ قابىلداۋى, 65 ملن زەرتحانالىق دياگنوستيكا قىزمەتى, شامامەن 28 ملن پروتسەدۋرا مەن مانيپۋلياتسيا, 11 ملن دياگنوستيكالىق قىزمەت, ونىڭ ىشىندە 454 مىڭ كت/مرت, 2,8 ملن ۋدز, 13,5 مىڭ پەت دياگنوستيكاسى كىرەدى.
ەمحانالار ارقىلى كورسەتىلگەن بارلىق كونسۋلتاتسيالىق-دياگنوستيكالىق قىزمەتتىڭ نەگىزگى بولىگى مەديتسينالىق ساقتاندىرۋ ەسەبىنەن تولەنگەن. 2020 جىلى كۇندىزگى ستاتسيونارعا 1 ملن-نان اسا ادام جاتىپ ەمدەلدى, ونىڭ ىشىندە 508 مىڭى تمككك شەڭبەرىندە جانە 578 مىڭى ءمامس جۇيەسىندە ەمدەۋگە جاتقىزىلدى. 2,7 ملن-عا جۋىق پاتسيەنت تاۋلىك بويى جۇمىس ىستەيتىن ستاتسيونارلاردا ەم الدى. شۇعىل گوسپيتاليزاتسيا جاعدايلارى ايتارلىقتاي تومەندەگەن. جالپى قۇرىلىمدا شۇعىل كومەك 62%-دى قۇرايدى. شۇعىل اۋرۋحاناعا جاتقىزۋ ناۋقاستىڭ اسقىنۋلارمەن نەمەسە كەش انىقتالعان دياگنوزبەن تۇسكەنىن كورسەتەدى. سونىمەن قاتار جوسپارلى ەمگە قولجەتىمدىلىك تە ارتتى: پاتسيەنتتەردىڭ 86%-ى ءبىر كۇننەن ون كۇنگە دەيىنگى مەرزىمدە ستاتسيونارلارعا ورنالاستىرىلدى جانە تەك 5%-ى 30 كۇننەن استام ۋاقىت كۇتتى.
وتكەن جىلى كوروناۆيرۋس ينفەكتسياسىمەن كۇرەس شەڭبەرىندە ءىس-شارالاردى قارجىلاندىرۋ ءۇشىن 187,7 ملرد تەڭگە ءبولىندى. جەلتوقسانداعى بولجامدى سومانى قوسا ەسەپتەگەندە مەديتسينا قىزمەتكەرلەرىنە ۇستەمەاقىعا 110,9 ملرد تەڭگە جۇمسالدى. مەديتسينالىق كومەككە جانە كۆي تارالۋىن توقتاتۋعا 53,9 ملرد تەڭگە قاراستىرىلىپ, پروۆيزورلىق, كارانتيندىك جانە ينفەكتسيالىق ستاتسيونارلارعا 384 مىڭ ادام ەمدەۋگە جاتقىزىلدى. پتر دياگنوستيكا قىزمەتىنە 19,7 ملرد تەڭگە ءبولىنىپ, 1,9 ملن-نان اسا پتر-تەست وتكىزىلدى. سونداي-اق 3,2 ملرد تەڭگە ءموبيلدى توپتارعا ءبولىنىپ, ولار 550 مىڭعا جۋىق شاقىرۋعا قىزمەت كورسەتتى.
قور باسشىسىنىڭ ايتۋىنشا, جاقىندا ىنتالاندىرۋ ۇستەمەاقىسىن 2021 جىلدىڭ ءبىرىنشى جارتىجىلدىعىندا دا تولەۋ تۋرالى شەشىم قابىلداندى. كونتينگەنت پەن الۋشىلار توبى وزگەرۋى مۇمكىن, بارلىعى ەلدەگى ەپيدەميالىق جاعدايعا بايلانىستى. قازىر الەۋمەتتىك مەديتسينالىق ساقتاندىرۋ قورى جەلتوقسان ايىنداعى ۇستەمەاقى تولەۋدى اياقتاۋدا. جالپى العاندا مۇنى 52 مىڭنان اسا مەديتسينا قىزمەتكەرى الادى: 11 مىڭ ادام – ءبىرىنشى قاۋىپ توبىندا, 17 مىڭ ادام – ەكىنشى توپتا, 22 مىڭ ادام ءۇشىنشى توپتا ەڭبەك ەتتى.
جەلتوقسان ايىنىڭ باسىندا قور 2021 جىلعا ارنالعان تمككك جانە ءمامس پاكەتتەرى بويىنشا مەديتسينالىق قىزمەتتەردىڭ نەگىزگى كولەمىن ساتىپ الۋدى جاريالادى. نەگىزگى ساتىپ الۋ سوماسى شامامەن 1,5 ترلن تەڭگەنى قۇرادى. بۇل سوما جىل سوڭىنا دەيىن ورتا ەسەپپەن 20%-عا ارتادى دەپ بولجانۋدا.
– 2020 جىلى پاندەمياعا بايلانىستى حالىققا ارنالعان باستامالاردىڭ ءبىر بولىگىن جۇزەگە اسىرا المادىق. بىراق ءبىز العان بەتىمىزدەن قايتپاي, وسى جىلى بۇل جوسپاردى ىسكە اسىرۋدى جالعاستىرامىز. بۇل – ەڭ الدىمەن امبۋلاتورلىق-ەمحانالىق كومەك كورسەتۋ, مەكتەپ مەديتسيناسىن دامىتۋ, ستاتسيوناردى الماستىراتىن كومەك, وڭالتۋ. حالىقتىڭ قاجەتتىلىگىنىڭ ارتۋىن جانە ەلدەگى ەپيدەميالىق جاعدايدى ەسكەرە وتىرىپ, مەديتسينالىق كومەكتى ساتىپ الۋ كولەمى ۇلعايدى. ساقتاندىرىلعان حالىق ءۇشىن مامانداندىرىلعان مەديتسينالىق كومەكتىڭ, ونىڭ ىشىندە اۋىلدىق جەرلەردە قىمبات جوعارى تەحنولوگيالىق قىزمەتتەردىڭ كولەمى ارتتى. سونداي-اق دارىگەرلەردىڭ جالاقىسىن 30%-عا دەيىن جانە ورتا مەديتسينا قىزمەتكەرلەرىنىڭ جالاقىسىن 20%-عا دەيىن ارتتىرۋعا قاراجات جوسپارلانعان. اۋىلدىق جەرلەردە مەديتسينالىق قىزمەتتەردىڭ قولجەتىمدىلىگىن ارتتىرۋ دا نازاردان تىس قالعان جوق, وسى باعىت بويىنشا قارجىلاندىرۋ كولەمى
20%-عا وسەدى. پرەزيدەنت قاسىم-جومارت توقاەۆتىڭ تاپسىرماسى بويىنشا ەكو قىزمەتتەرىنىڭ سانى جەتى ەسەگە ارتقانىن اتاپ وتكەن ءجون. ەگەر 2020 جىلى 1000-نان اسا وتباسىعا اتا-انا بولۋ قۋانىشىن سەزىنۋ مۇمكىندىگى تۋسا, 2021 جىلى ولاردىڭ سانى 7 مىڭعا دەيىن ارتادى, – دەدى ب.توكەجانوۆ.
