«وكم وپەراتورى» جشس تاراتقان رەسمي اقپاراتقا سۇيەنسەك, 2021 جىلى ىستەن شىققان اۋىل شارۋاشىلىعى تەحنيكاسىن ۋتيليزاتسياعا قابىلداۋ كۆوتاسىنىڭ مولشەرى ەكولوگيا, گەولوگيا جانە تابيعي رەسۋرستار مينيسترلىگىمەن كەلىسىلگەن. اتالعان باعدارلاما اياسىندا جىل سوڭىنا دەيىن قابىلداۋ بەكەتتەرى 1 900 تراكتور مەن 480 كومبايندى قابىلداۋدى جوسپارلاپ وتىر.
اۋىل شارۋاشىلىعى تەحنيكاسىن قابىلداۋ قازاقستاننىڭ 11 ايماعىندا ەكى كەزەڭ بويىنشا جۇزەگە اسىرىلادى. 18 قاڭتاردان باستاپ قوستاناي, پەتروپاۆل, كوكشەتاۋ, اقتوبە, قاراعاندى, قىزىلوردا, تالدىقورعان, شىمكەنت قالالارىندا 1 اقپاننان باستاپ پاۆلودار, الماتى جانە تاراز قالالارىندا قابىلداۋ جۇرگىزىلەدى.
«بيىل اگروتەحنيكانى وتكىزۋشىلەرگە ىڭعايلى بولۋ ءۇشىن recycle.kz سايتىندا الدىن الا ءوتىنىمدى قارايتىن جۇيە ەنگىزىلگەنىن اتاپ وتكەن ءجون. سول ارقىلى كولىك تاپسىرۋشى تەحنيكاسىن ەلەكتروندى تۇردە كەزەككە قويا الادى. ول ءۇشىن اۋىل شارۋاشىلىعى تەحنيكاسىنىڭ يەسى ارنايى ەلەكتروندى ۇلگىنى تولتىرۋى ءتيىس. وعان ەكى قۇجات قانا كەرەك: جەكە كۋالىك جانە تەحنيكانى تىركەۋدەن شىعارعاندىعى تۋرالى انىقتاما. بۇدان بولەك اۋىل شارۋاشىلىعى تەحنيكاسىنىڭ ءار قىرىنان تۇسىرىلگەن بىرنەشە سۋرەتى قاجەت. ءوتىنىم ماقۇلدانعان جاعدايدا, اۆتوماتتاندىرىلعان جۇيە ءوتىنىم بەرۋشىگە اگرارلىق تەحنيكانى كادەگە جاراتۋعا تاپسىرۋ كۇنى مەن ۋاقىتى تۋرالى اقپارات بەرەدى», دەپ حابارلادى «وكم وپەراتورى» جشس-نىڭ ءباسپاسوز قىزمەتى.
تەحنيكانى تاپسىرعاندارعا جەڭىلدىك سەرتيفيكاتى بەرىلەدى. ونىڭ قۇنى تەحنيكانىڭ ءتۇرى مەن جيىنتىعىنا بايلانىستى 560 مىڭ تەڭگەدەن 2 ملن تەڭگەگە دەيىن باعالانادى. جەڭىلدىك سەرتيفيكاتىن قازاقستاندا قۇراستىرىلعان كەز كەلگەن ساناتتاعى كولىكتى ساتىپ الۋ ءۇشىن قولدانۋعا بولادى. سونىمەن قاتار ەكى سەرتيفيكاتتى بىرىكتىرۋگە جانە ونى باسقا ادامنىڭ اتىنا تىركەۋگە (2 رەتتەن ارتىق ەمەس) مۇمكىندىك بار. سەرتيفيكات بەرىلگەن كۇننەن باستاپ 12 ايعا دەيىن جارامدى.
تاپسىرىلاتىن تەحنيكا زاۋىتتان شىققانداعى سالماعىنىڭ 50 پايىزىنان اساتىن بولسا تولىق جيىنتىققا جاتادى. بۇل رەتتە تولىق جيىنتىقتاعى كومباينعا 2 ملن تەڭگەلىك جەڭىلدىك سەرتيفيكاتى بەرىلەدى. ال تولىق ەمەس جيىنتىقتاعى كومباينعا قاراستىرىلعان سەرتيفيكات قۇنى – 1,5 ملن تەڭگە. سونداي-اق تولىق جيىنتىققا جاتاتىن تراكتورلار ءۇشىن جەڭىلدىك سەرتيفيكاتىنىڭ مولشەرى – 1 ملن تەڭگە. تولىق ەمەس جيىنتىقتاعى ماشينالارعا (شىنجىر تاباندى نەمەسە دوڭگەلەكتى) 560 مىڭ تەڭگەنىڭ سەرتيفيكاتى بەرىلەدى.
توزىعى جەتكەن اۋىلشارۋشىلىق تەحنيكاسىن ۋتيليزاتسياعا تاپسىرۋ ءۇشىن «وكم وپەراتورىنىڭ» رەسمي سايتىنا (www.recycle.kz) كىرىپ, كەزەكتى الدىن الا برونداۋعا ءوتىنىم بەرۋ قاجەت.
توزىعى جەتكەن اگرارلىق تەحنيكانى قايتا وڭدەۋگە قابىلداۋ باعدارلاماسى ەلىمىزدەگى ەسكىرگەن اۋىل شارۋاشىلىعى تەحنيكاسىن جاڭارتۋعا مۇمكىندىك بەرەدى. سونىمەن قاتار ەكولوگيالىق تازا كولىك قۇرالدارىن ءوندىرۋدى ىنتالاندىرۋعا جانە قايتا وڭدەۋ جۇيەسىن قۇرۋعا ىقپال ەتەدى.
