قوعام • 19 قاڭتار، 2021

وزبەكستان پرەزيدەنتى: Nur Otan قازاقستان حالقىنىڭ جاپپاي قولداۋىنا يە

329 رەت كورسەتىلدى

نۇرسۇلتان نازارباەۆتىڭ اتىنا پارلامەنت ءماجىلىسى سايلاۋىنداعى «Nur Otan» پارتياسىنىڭ جەڭىسىنە وراي حاتتار مەن جەدەلحاتتار كەلىپ ءتۇستى، دەپ حابارلايدى Egemen.kz.

تۇركيا رەسپۋبليكاسىنىڭ پرەزيدەنتى رەجەپ ەردوعان ءوز جەدەلحاتىندا كۇللى تۇركيا حالقىنىڭ اتىنان ەلباسىنى پارلامەنت سايلاۋىنداعى «Nur Otan» پارتياسىنىڭ جەڭىسىمەن قۇتتىقتاپ، باۋىرلاس قازاقستان حالقىنىڭ ءوسىپ-وركەندەي بەرۋىنە تىلەكتەستىك ءبىلدىردى.

وزبەكستان رەسپۋبليكاسىنىڭ پرەزيدەنتى شاۆكات ميرزيوەۆ وتكەن سايلاۋدىڭ قورىتىندىسى «Nur Otan» پارتياسى قازاقستان حالقىنىڭ جاپپاي قولداۋىنا يە جانە ەلدەگى جەتەكشى ساياسي كۇش ەكەنىن تاعى ءبىر مارتە دالەلدەگەنىن اتاپ ءوتتى.

«جاڭا قۇرامداعى پارلامەنت دوستاس قازاقستان حالقىنىڭ ءال-اۋقاتىن ارتتىرۋعا، اۋقىمدى رەفورمالار مەن جاسامپاز جۇمىستى تۇراقتى تۇردە جالعاستىرۋعا، سونداي-اق حالىقارالىق ارەنادا ءسىزدىڭ ەلىڭىزدىڭ بەدەلى مەن ءيميدجىن نىعايتۋعا قىزمەت ەتەدى دەگەن سەنىمدەمىن»، دەلىنگەن ش. ميرزيوەۆتىڭ جەدەلحاتىندا.

ازەربايجان رەسپۋبليكاسىنىڭ پرەزيدەنتى يلحام اليەۆتىڭ جەدەلحاتىندا قازاقستاننىڭ دامۋى «Nur Otan» پارتياسىنىڭ قىزمەتىمەن تىعىز بايلانىستى ەكەنى ايتىلعان.

«پارتيا قۇرىلعان كۇننەن باستاپ قازاقستان مەملەكەتى مەن حالقىنا ابىرويمەن قىزمەت ەتىپ كەلدى. ءوزىڭىز باسقارىپ وتىرعان پارتيانىڭ جەڭىسى قازاقستاننىڭ وركەندەۋى جولىندا جۇرگىزىپ وتىرعان جالپىۇلتتىق ساياسات پەن كوپجوسپارلى قىزمەتكە بەرگەن جوعارى باعا جانە حالىقتىڭ سىزگە دەگەن سەنىمىن كورسەتىپ وتىر»، دەپ جازادى ي.اليەۆ.

سونداي-اق سەربيا پرەزيدەنتى الەكساندر ۆۋچيچتەن دە قۇتتىقتاۋ جەدەلحاتى كەلىپ ءتۇستى.

«پارلامەنت سايلاۋىندا ءسىزدىڭ پارتياڭىزدىڭ جەڭىسكە جەتۋىمەن شىن جۇرەكتەن قۇتتىقتايمىن. حالىقتىڭ ۇلكەن قولداۋى قازاقستاننىڭ دۇرىس باعىتتا – دامۋ مەن وركەندەۋ جولىندا كەلە جاتقانىنىڭ دالەلى ەكەنىنە سەنىمدىمىن»، دەلىنگەن جەدەلحاتتا.

سونىمەن بىرگە ماجارستانننىڭ پرەمەر-ءمينيسترى ۆيكتور وربان مەن حورۆاتيا رەسپۋبليكاسىنىڭ بۇرىنعى پرەزيدەنتى ستەپان مەسيچتىڭ ەلباسىعا جولداعان حاتتارىندا دا جىلى لەبىزدەر ايتىلعان.

سوڭعى جاڭالىقتار

اراق ساتىلمايتىن اۋدان

ايماقتار • كەشە

ۇقساس جاڭالىقتار