قوعام • 19 قاڭتار، 2021

اۋعانستان ازاماتى الماتىدا 11 جىل بويى زاڭسىز تۇرعان

15 رەت كورسەتىلدى

«كەلىمسەك» ءىس-شاراسى بارىسىندا الماتىدا 11 جىل بويى زاڭسىز تۇرعان اۋعانستان ازاماتى انىقتالدى، دەپ حابارلايدى Egemen.kz Polisia.kz سايتىنا سىلتەمە جاساپ.

بەلگىلى بولعانداي، 30 جاستاعى شەتەلدىك وسى ۋاقىتقا دەيىن مۇقيات جاسىرىنىپ جۇرگەن، ول جالعىز ءومىر ءسۇرىپ، ەشكىممەن بايلانىس جاساماعان، ەش جەردە جۇمىس ىستەمەگەن. ول قر اقبتك-ءنىڭ 517-بابى (شەتەلدiكتiڭ نەمەسە ازاماتتىعى جوق ادامنىڭ قازاقستان رەسپۋبليكاسىنىڭ حالىقتىڭ كوشى-قونى سالاسىنداعى زاڭناماسىن بۇزۋى) بويىنشا جاۋاپقا تارتىلدى. زاڭنامانى ورەسكەل بۇزۋشى الماتىدا 14 قاڭتاردا باستالعان “كەلىمسەك” الدىن-الۋ ءىس-شاراسى كەزىندە انىقتالدى.

ءىس-شارا قازاقستان رەسپۋبليكاسىنىڭ كوشى-قون زاڭناماسىن بۇزۋدى انىقتاۋعا باعىتتالعان. رەيدتەر كەزىندە شەتەلدىكتەردىڭ بولۋ وبەكتىلەرى، سونداي-اق ولاردىڭ ۋاقىتشا تۇرۋ ورىندارى تەكسەرىلەتىنىن اتاپ وتكەن ءجون. 4 كۇن ىشىندە كوشى-قون جانە جەرگىلىكتى پوليتسيا قىزمەتىنىڭ قىزمەتكەرلەرى باسقا ەلدەردىڭ 629 ازاماتىن تەكسەردى. ناتيجەسىندە قازاقستان رەسپۋبليكاسىندا بولۋ ەرەجەلەرىن بۇزعانى ءۇشىن 25 شەتەلدىك اكىمشىلىك جاۋاپكەرشىلىككە تارتىلدى. جەكە تۇلعاسىن انىقتاۋ ماقساتىندا پد-ءنىڭ قابىلداپ-تاراتۋىنا 35 شەتەلدىك ورنالاستىرىلدى. سونىمەن قاتار، ءبىزدىڭ وتانداستارىمىزدىڭ ىشىنەن ولاردى قابىلداۋشى 34 ادام اكىمشىلىك جاۋاپكەرشىلىككە تارتىلدى، – دەدى الماتى قالالىق پوليتسيا دەپارتامەنتى كوشى-قون قىزمەتى باسقارماسىنىڭ باستىعى اسحات بۋتۋنچينوۆ.

پوليتسيا مالىمەتتەرى بويىنشا، جەدەل-الدىن الۋ ءىس-شاراسى  بارىسىندا جەكە تۇلعاسىن راستايتىن قۇجاتتارى جوق رەسەي فەدەراتسياسىنىڭ 1978 جىلى تۋعان ازاماتى انىقتالدى جانە پد-ءنىڭ قابىلداپ-تاراتۋىنا ورناتىلدى.

– تەكسەرۋ ءىس-شارالارىنىڭ ناتيجەسىندە ونىڭ قازاقستان رەسپۋبليكاسىنىڭ اۋماعىنا 2010 جىلى كەلگەنى جانە ءوزىنىڭ زاڭدى مارتەبەسىن ءالى رەتتەمەگەنى انىقتالدى. سونىمەن قاتار، وسى كۇندەرى قازاقستان رەسپۋبليكاسىنىڭ اۋماعىندا ەكى جىلدان جانە بەس جىلدان بەرى قۇجاتسىز جۇرگەن وزبەكستان رەسپۋبليكاسىنىڭ ەكى ازاماتى انىقتالدى. بۇل فاكتىلەر بويىنشا قولدانىستاعى زاڭناماعا سايكەس شارالار قابىلدانۋدا، – دەدى اسحات بۋتۋنچينوۆ.

سوڭعى جاڭالىقتار

ۇقساس جاڭالىقتار