«ۇكىمەت قۇرىلىمىندا وزگەرىستەر بار. مۇحتار تىلەۋدەردى پرەمەر-ءمينيستردىڭ ورىباسارى – سىرتقى ىستەر ءمينيسترى بولىپ تاعايىندالدى. مەملەكەت باسشىسىنىڭ جارلىعىمەن ۇكىمەتتىڭ ەكى مۇشەسى جاڭادان تاعايىندالدى. ول ۇلتتىق ەكونوميكا ءمينيسترى اسەت ەرعاليەۆ, ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ. ولار وزدەرىنە جۇكتەلگەن ماڭىزدى مىندەتتى جاۋاپكەرشىلىكپەن اتقارادى دەپ سەنەمىز. جاڭادان تاعايىندالعان مينيسترلەردەن انت قابىلداۋىن سۇرايمىن», دەدى پرەمەر-مينيستر اسقار مامين.
ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ پەن ۇلتتىق ەكونوميكا ءمينيسترى اسەت ەرعاليەۆ انت بەردى.
«قازاقستان رەسپۋبليكاسىنىڭ حالقى مەن پرەزيدەنتى الدىندا ءوز وتانىم قازاقستان رەسپۋبليكاسىنىڭ ەكونوميكالىق جانە رۋحاني دامۋ ىسىنە بارلىق كۇش جىگەرىم مەن ءبىلىمىمدى جۇمساۋعا, مەملەكەتتىڭ كونستيتۋتسياسى مەن زاڭدارىن قاتاڭ ساقتاۋعا, ءوزىمنىڭ ءىس ارەكەتىمدە زاڭدىلىق پەن ادىلەتتىلىك, ازاماتتىق, ۇلتارالىق جانە كونفەسسياارالىق تاتۋلىق پرينتسيپتەرىن ۇستانۋعا, قازاقستان حالقىنا ادال قىزمەت ەتۋگە, ءوز ەلىمنىڭ مەملەكەتتىلىگى مەن دۇنيەجۇزىلىك قوعامداستىقتاعى بەدەلىن نىعايتا بەرۋگە سالتاناتتى تۇردە انت بەرەمىن!» دەدى مينيستر لاۋازىمىنا العاش كىرىسكەن ۆەدومستۆو باسشىلارى.
