الەۋمەتتىك جەلىلەردە جانە بىرقاتار بۇقارالىق اقپارات قۇرالدارىندا قازۇۋ باسشىلىعى تاراپىنان ۋنيۆەرسيتەتتىڭ جەر ۋچاسكەلەرى جەكە تۇلعاعا ساتىلعاندىعى جونىندە اقپارات جاريالاندى. بۇعان دەيىن ۋنيۆەرسيتەت وسى ماسەلە بويىنشا جۇرتشىلىققا ءوز ۇستانىمىن ۇسىندى جانە قانداي دا ءبىر زاڭسىز ارەكەتكە قاتىسى جوق ەكەندىگىن رەسمي تۇردە جوققا شىعاردى.
ۇلكەن قوعامدىق رەزونانستى ەسكەرە وتىرىپ, بۇل جاعداي ۋنيۆەرسيتەتتىڭ عىلىمي كەڭەسىنىڭ كەڭەيتىلگەن وتىرىسىندا قارالدى, وندا قازۇۋ مەن ونىڭ باسشىلىعىنىڭ بەدەلىن تۇسىرەتىن نەگىزسىز ايىپتاۋلارعا جول بەرمەۋ تۋرالى بىرىڭعاي ورتاق پىكىر ايتىلدى. سونىمەن قاتار بۇل ماسەلە ءال-فارابي اتىنداعى قازۇۋ ديرەكتورلار كەڭەسىنىڭ العاشقى وتىرىسىندا قارالدى.
اتاپ ءوتۋ قاجەت, الەۋمەتتىك جەلىلەردەگى جاريالانىمداردىڭ اۆتورلارى م.كوزاچكوۆ پەن ب.بازاربەك ۇسىنعان قۇجاتتاردىڭ كوشىرمەلەرىن تەكسەرۋ بارىسىندا انىقتالعانداي, جوبانى ازىرلەۋشى رەتىندە «Geo Audit Company» جشس كورسەتىلگەن 8.08.2017 ج. جەرگە ورنالاستىرۋ جوباسىنىڭ تيتۋلدىق پاراعىندا ۋنيۆەرسيتەت اتىنان قويىلعان قولدار جالعان, وندا قول قويۋشىنىڭ لاۋازىمى مەن اتى-ءجونى كورسەتىلمەگەن, سونداي-اق ءال-فارابي اتىنداعى قازۇۋ-دىڭ ەلتاڭبالى ءمورى جوق. «Geo Audit Company» جشس ديرەكتورى و.بازاربايدىڭ اتىنا جەرگە ورنالاستىرۋ جوباسىن ازىرلەۋگە 8.08.2017 جىلعى ءوتىنىش پەن الماتى قالاسى جەر قاتىناستارى باسقارماسىنىڭ باسشىسى ا.احمەتوۆتىڭ اكىمدىك قاۋلىسىنىڭ جوباسىن دايىنداۋ ءۇشىن جەرگە ورنالاستىرۋ جوباسىن بەكىتۋ تۋرالى 16.08.2017 جىلعى وتىنىشىندە دە ءدال وسىنداي جاعداي انىقتالدى.
ۋنيۆەرسيتەت پەن ونىڭ لاۋازىمدى تۇلعالارى جەر ۋچاسكەلەرىن يەلىكتەن شىعارۋعا قاتىستى ەشقانداي وتىنىشتەر مەن قۇجاتتار جولداماعانىن جانە قول قويماعانىن رەسمي تۇردە مالىمدەيمىز.
سونىمەن قاتار 2017 جىلى قازۇۋ 3.08.2017 ج. الماتى قالاسى جەر ۋچاسكەلەرىن بەرۋ جونىندەگى كوميسسيا وتىرىسىنىڭ №28 حاتتاماسىندا كورسەتىلگەندەي كوممۋنالدىق مەملەكەتتىك مەكەمە ەمەس, شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورىن بولدى, سوندىقتان ەلىمىزدىڭ قولدانىستاعى زاڭناماسىنا سايكەس بۇل ماسەلەنى كوميسسيانىڭ قاراۋىنا شىعارۋعا مۇلدەم قۇقىقتىق نەگىز بولماعان.
بۇعان قوسا ۋنيۆەرسيتەتكە قاتىستى جالعاسىپ كەلە جاتقان اقپاراتتىق شابۋىلدا جوعارىدا اتالعان اۆتورلار قازۇۋ-دىڭ ءبىرىنشى پرورەكتورى م.بۇركىتباەۆتىڭ قولى قويىلعان 1.08.2017 ج. №9-9-2362 حاتتى ۋنيۆەرسيتەتتىڭ ءوزى تاراپىنان جەر ۋچاسكەسىن يەلىكتەن شىعارۋىنا نەگىز رەتىندە ۇسىنۋعا تىرىسۋدا. بۇل ۋنيۆەرسيتەت باسشىلىعىن ءوزى جاساماعان ارەكەتتەرى ءۇشىن ايىپتاۋدىڭ تاعى ءبىر دايەكسىز ءارى «قيسىنسىز قۇراستىرىلعان» جالعان تالپىنىسى.
وسى رەتتە, جوعارىدا اتالعان حات 2017 جىلدىڭ جازىندا ورىن العان وقيعالار كونتەكسىندە جازىلعانىن رەسمي تۇردە حابارلايمىز. 2017 جىلدىڭ اقپان ايىندا الماتى قالاسىنىڭ اكىمدىگى «قورشاۋسىز قالا» باعدارلاماسىن قولعا العانى بەلگىلى. 2017 جىلعى 6 ماۋسىمدا قازۇۋ-دىڭ اتىنا الماتى قالاسى جەردىڭ پايدالانىلۋى مەن قورعالۋىن باقىلاۋ باسقارماسىنىڭ جەر زاڭناماسىنىڭ ساقتالۋىنا جوسپاردان تىس تەكسەرۋ جۇرگىزۋ تۋرالى حابارلاماسى كەلىپ ءتۇستى, ال 12 ماۋسىمدا تەكسەرۋ تاعايىنداۋ تۋرالى اكت الىندى. تەكسەرۋ بارىسىندا ءال-فارابي اتىنداعى قازۇۋ-دىڭ ناقتى يەلەنىپ وتىرعان اۋماعى سايكەستەندىرۋ قۇجاتىندا كورسەتىلگەن شەكارالارعا سايكەس كەلمەيتىندىگى انىقتالدى. جەردىڭ پايدالانۋى مەن قورعالۋىن مەملەكەتتىك باقىلاۋ ءبولىمىنىڭ مەملەكەتتىك ينسپەكتورى ا.بولعانباەۆتىڭ قولى قويىلعان 14.06.2017 ج. تەكسەرۋ ناتيجەلەرى تۋرالى اكتى مەن 14.06.2017 ج. №198 حاتتامادا قازۇۋ يەلەنگەن اۋماق 0,7 گا كولەمىندە اسىپ كەتكەندىگى تۋرالى ايتىلدى. سونىمەن بىرگە بۇعان قوسىمشا رەتىندە بۇزۋشىلىقتى 2017 جىلدىڭ 19 شىلدەسىنە دەيىن جويۋ قاجەتتىگى تۋرالى №370 ۇيعارىم شىعارىلدى.
ءبىرىنشى پرورەكتور م.بۇركىتباەۆتىڭ قولى قويىلعان 1.08.2017 جىلعى حات وسى جوعارىدا كورسەتىلگەن تەكسەرۋگە جانە ۇيعارىمدى ورىنداۋ قاجەتتىلىگىنە بايلانىستى جازىلعان, سول سەبەپتەن وندا ءال-فارابي اتىنداعى قازۇۋ-دىڭ جەر ۋچاسكەسىنىڭ شەكاراسىن تۇزەتۋ تۋرالى ءوتىنىش كورسەتىلگەن. جوعارىدا اتالعان فاكتىلەرگە بايلانىستى بۇل حاتتىڭ مازمۇنىندا بۇدان وزگە پيعىل, ونىڭ ىشىندە ۋنيۆەرسيتەتتىڭ جەر ۋچاسكەسىن ساتۋ, ءبولۋ نەمەسە يەلىكتەن شىعارۋ كوزدەلگەن ەمەس ءارى مۇنداي پيعىل مۇلدەم بولعان ەمەس.
تاعى دا رەسمي تۇردە مالىمدەيمىز, ءال-فارابي اتىنداعى قازۇۋ وكىلدەرى 2017 جىلى جەر ۋچاسكەلەرىن يەلىكتەن شىعارۋ بويىنشا قانداي دا ءبىر قۇجاتتاردى ازىرلەۋگە قاتىسقان جوق.
جوعارىدا باياندالعاننىڭ نەگىزىندە, الماتى قالاسىنىڭ پروكۋراتۋراسىنا جانە پوليتسيا دەپارتامەنتىنە بۇعان دەيىن جىبەرىلگەن وتىنىشتەرگە قوسىمشا, ۋنيۆەرسيتەت 2021 جىلعى 8 قاڭتاردا پوليتسيا دەپارتامەنتىنە «Geo Audit Company» جشس ديرەكتورى و.بازارباي مەن باسقا دا انىقتالماعان تۇلعالارعا قاتىستى الاياقتىق جانە وزگە دە قۇقىققا قارسى ارەكەتتەرى ءۇشىن ءتيىستى پروتسەستىك ارەكەتتەردى قابىلداۋ تۋرالى ءوتىنىش بەردى. بۇل ماسەلە ءوز شەشىمىن قۇقىقتىق ايادا تابۋى ءتيىس دەپ بىلەمىز.
