وتىرىسقا پارلامەنت ءماجىلىسىنىڭ سايلانعان دەپۋتاتتارى, وبلىستاردىڭ, نۇر-سۇلتان, الماتى جانە شىمكەنت قالالارىنىڭ اۋماقتىق سايلاۋ كوميسسيالارى قاتىستى. وسك توراعاسى بەرىك يماشەۆ «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» زاڭعا سايكەس پارلامەنت دەپۋتاتىنىڭ وكىلەتتىگى ورتالىق سايلاۋ كوميسسياسى پارلامەنت دەپۋتاتى رەتىندە تىركەگەن ساتتەن باستالاتىنىن اتاپ ءوتتى.
وتىرىستا قابىلدانعان قاۋلى بويىنشا پارلامەنت ماجىلىسىنە 107 دەپۋتات تىركەلدى. ونىڭ ىشىندە Nur Otan پارتياسىنىڭ پارتيالىق ءتىزىمى بويىنشا 76 دەپۋتات, «اق جول» دەموكراتيالىق پارتياسىنان – 12 دەپۋتات, قازاقستان حالىق پارتياسىنان – 10 دەپۋتات, قازاقستان حالقى اسسامبلەياسى سايلاعان 9 دەپۋتات بار.
وسك توراعاسى بەرىك يماشەۆ تىركەلگەن دەپۋتاتتارعا كۋالىكتەر مەن كەۋدەگە تاعاتىن بەلگىلەردى تابىس ەتىپ, ولارعا رەسپۋبليكانىڭ زاڭ شىعارۋ بيلىگىن جۇزەگە اسىراتىن جوعارى وكىلدى ورگانىندا تابىستى جۇمىس تىلەدى.
