سۋرەتتەردى تۇسىرگەن ەرلان ومار, «EQ»
اتاپ ايتقاندا, «قاراباق – ازەربايجاننىڭ جاۋھارى: تاريحى, مادەنيەتى, تابيعاتى», «جوعالتقان باقىتىم: قاراباقتىڭ شىنايى وقيعالارى» جانە «ازەربايجان حالىق رەسپۋبليكاسى» كىتاپتارى وقىرمانعا جول تارتتى.
ايتا كەتەرلىگى, ءۇش جيناق تا قازاق تىلىندە جارىق كوردى. ال قاراباق تۋرالى البوم-كىتاپ – حالىقارالىق ۇيىم تاراپىنان شىعارىلعان العاشقى كىتاپ.
تۇساۋكەسەر ءراسىمىنىڭ قۇرمەتتى قوناقتارى قاتارىندا ازەربايجاننىڭ قازاقستانداعى توتەنشە جانە وكىلەتتى ەلشىسى راشاد ماممادوۆ, قىرعىز رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى جەەنبەك كۋلۋباەۆ بولدى. سونىمەن قاتار ازەربايجان ميللي مەدجليسىنىڭ دەپۋتاتى, مادەنيەت كوميتەتىنىڭ ءتورايىمى گانيرا پاشاەۆا, قىرعىزستاننىڭ ەكس-مەملەكەتتىك حاتشىسى وسماناكۋن يبرايموۆ, ەۋرازيا جازۋشىلار وداعىنىڭ توراعاسى ياكۋپ ومەروعلى دا قاتىستى. سونداي-اق ازەربايجان پارلامەنتى دەپۋتاتتارى جيىنعا ارنايى كەلگەنىن ايتا كەتكەن ءجون. بۇدان بولەك, تۇركى ەلدەرىنىڭ جازۋشىلارى, مەملەكەت جانە قوعام قايراتكەرلەرى, ديپلوماتيالىق كورپۋس وكىلدەرى, تانىمال عالىمدار مەن زيالى قاۋىم ءىس-شارانىڭ باسى-قاسىندا ءجۇردى.
«حالىقارالىق تۇركى اكادەمياسى قاراباق ماسەلەسىندە ءاردايىم ازەربايجاننىڭ جانىندا بولدى, قولدادى. ءبىزدىڭ ەڭ ۇلكەن تارتۋىمىز – قاراباق تۋرالى البوم-كىتاپ, ازەربايجان رەسپۋبليكاسىنىڭ ءجۇز جىلدىعىنا ارنالعان كىتاپ جانە قاراباقتىڭ شىنايى وقيعالارى تۋرالى اڭگىمەلەر جيناعى جارىق كوردى. وعان وتكەن جىلدىڭ باسىنان بەرى دايىندىق جۇرگىزدىك. ساپالى سۋرەتتەر مەن ماتەريالداردى جيناستىردىق. ءبىزدىڭ بۇل كىتاپتى باسپاعا بەرۋىمىز ازەربايجاننىڭ شۋشانى الۋىمەن سايكەس كەلدى», دەدى حالىقارالىق تۇركى اكادەمياسىنىڭ پرەزيدەنتى دارحان قىدىرالى.
سونداي-اق جيىن بارىسىندا ازەربايجاننىڭ قازاقستانداعى توتەنشە جانە وكىلەتتى ەلشىسى راشاد ماممادوۆ حالىقارالىق تۇركى اكادەمياسىنىڭ ارنايى مەدالىمەن ماراپاتتالدى.
بۇدان كەيىن ءسوز العان راشاد ماممادوۆ ەلباسى باستاماسىمەن قۇرىلعان تۇركى اكادەمياسىنىڭ باۋىرلاس ەلدەرگە ورتاق يگىلىك سانالاتىنىن اتاپ ءوتتى. سونداي-اق حالىقارالىق تۇركى اكادەمياسى اتقارىپ جاتقان جۇمىستارعا توقتالىپ, تۇركى مەملەكەتتەرىن جاقىنداستىرۋعا زور ۇلەس قوسىپ وتىرعانىن جەتكىزدى. ەلشى ءوز سوزىندە قازاقستان حالقىنا قيىن كەزەڭدە قولداۋ كورسەتكەنى ءۇشىن راحمەت ايتتى.
«تۇركى اكادەمياسى ەكىنشى قاراباق سوعىسى باستالعاننان-اق ازەربايجان حالقىنىڭ جانىنان تابىلدى. سۇيەۋ بولدى, قولداۋ كورسەتتى. ءاردايىم ادىلەت ءسوزىن سويلەپ, جارقىن جەڭىسىمىزدى جاقىنداتۋعا ۇلەس قوستى. قاراباق تۋرالى قازاق تىلىندە العاش رەت كىتاپتىڭ جارىق كورۋى وتە ماڭىزدى. ويتكەنى بۇل جيناق تاۋەلسىز ۇيىم تاراپىنان جارىق كورىپ, الەمگە قاراباقتاعى وقيعالاردى شىنايى جەتكىزەدى.
اكادەميا جىلدار بويى تاريحي, گەوگرافيالىق, ادەبي جانە ودان دا باسقا كىتاپتاردى شىعارىپ, ازەربايجاندى باۋىرلاس حالىقتارعا, باۋىرلاس حالىقتاردى ازەربايجانعا تانىتا الدى. ورتاق تاريحىمىز بەن ورتاق گەوگرافيامىز جازىلدى. وسىلايشا, بۇكىل تۇركى الەمى عالىمدارىنىڭ باسىن قوسقان ۇلكەن الاڭعا اينالدى», دەدى ازەربايجان ەلشىسى.
قىرعىزستاننىڭ ەكس-مەملەكەتتىك حاتشىسى وسماناكۋن يبرايموۆ ءوز سوزىندە قاراباق تۋرالى كىتاپتىڭ قازاق تىلىندە جارىق كورۋىن جوعارى باعالادى.
«حالىقارالىق تۇركى اكادەمياسى قوعامعا قاجەتتى, ەلدەرىمىزدى جاقىنداستىراتىن ماڭىزدى شارالار ۇيىمداستىرىپ, قۇندى كىتاپتار جاريالاپ كەلەدى. تاياۋدا جارىق كورگەن «تۇركى الەمىنىڭ تاريحي-مادەني اتلاسى» سونىڭ ايعاعى», دەدى و.يبرايموۆ.
بۇدان كەيىن ازەربايجان ميللي مەدجليسىنىڭ دەپۋتاتى, مادەنيەت كوميتەتىنىڭ ءتورايىمى گانيرا پاشاەۆا ءسوز الىپ, قازاقستانعا جانە حالىقارالىق تۇركى اكادەمياسىنا قولداۋ بىلدىرگەنى ءۇشىن العىسىن جەتكىزدى.
«كەلىسىم ناتيجەسىندە, ازەربايجاننىڭ نەگىزگى تەرريتورياسى مەن ناحچيۆان اۆتونوميالىق رەسپۋبليكاسى اراسىندا ءدالىز اشىلدى. بۇل – تۇركى ەلدەرى ءۇشىن ۇلكەن جەتىستىك. ياعني تىكەلەي بايلانىس ورناتۋعا مۇمكىندىك تۋادى», دەدى گ.پاشاەۆا.
جيىنعا قاتىسۋشىلار تۇركى ەلدەرىنىڭ ىنتىماقتاستىعىن دامىتۋعا وسىنداي جيناقتاردىڭ جارىق كورۋى زور ۇلەس قوساتىنىن اتاپ ءوتتى.
