پرەزيدەنت قازاقستاننىڭ مەملەكەت بولىپ قالىپتاسۋىنداعى ەلباسىنىڭ دارا كوشباسشىلىعىنىڭ ماڭىزىنا ايىرىقشا توقتالدى.
سونىمەن قاتار مەملەكەت باسشىسى سوڭعى ۋاقىتتا اۋماقتىق تۇتاستىعىمىزعا كۇمان كەلتىرىپ, تاتۋ كورشىلىك قاتىناستارعا سىنا قاققىسى كەلەتىن كەيبىر شەتەل ازاماتتارىنىڭ ارانداتۋشىلىق ءىس-ارەكەتتەرىنە دە جاۋاپ بەرە وتىرىپ, ءبىزدىڭ ەكىجاقتى كەلىسىمدەرمەن بەكىتىلىپ, حالىقارالىق دەڭگەيدە تانىلعان شەكارامىزدىڭ بار ەكەنىن باسا ايتتى. 2018 جىلى كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا قول قويىلعاننان كەيىن قۇرلىقتاعى عانا ەمەس, تەڭىزدەگى شەكارامىز دا ءبىرجولا ايقىندالىپ, تۇپكىلىكتى شەشىلگەنى دە بەلگىلى.
سونداي-اق پرەزيدەنت ازاماتتارىمىزدى كوپتەن مازالاپ جۇرگەن جەر ماسەلەسى بويىنشا دا ءسوز قوزعاپ, قازاقتىڭ جەرى ەشبىر شەتەلدىكتىڭ مەنشىگىنە بەرىلمەيتىنىن تاعى دا راستادى.
بىرلىكتى ەل بۇزىلماس, سوندىقتان مەملەكەتىمىزدى ءبىرتۇتاس دەپ ءبىلۋىمىز جانە تانىتۋىمىز قاجەت. ول ءۇشىن ايماقتارىمىزدى سولتۇستىك, وڭتۇستىك, باتىس, شىعىس دەپ بولە بەرمەي, تاريحي, مادەني ماڭىزدى اتاۋلاردى ەنگىزۋ دە ماڭىزدى. ارينە, ونى مەملەكەت باسشىسى ايتقانداي, بايىپپەن, ويلانىپ جۇزەگە اسىرۋ كەرەك.
ءار قازاق ءۇشىن اتالارىمىزدىڭ قانى مەن تەرى تامعان ءبىر ۋىس توپىراقتىڭ ءوزى – ەسەبى جوق بايلىق. الايدا بۇل جەردى دۇرىس پايدالانۋ, قادىرىن ءبىلىپ قاستەرلەۋ, شىنايى وتانسۇيگىشتىكتى قالىپتاستىرۋ – كەزەك كۇتتىرمەيتىن ۇلكەن جۇمىس.
جاھاندانۋ مەن اقپاراتتىق دامۋ زامانىندا ەلدىڭ جات جۇرتتىڭ يدەولوگيالىق ىقپالىنا تەز ىلەسىپ كەتۋى بەلەڭ الۋدا. اسىرەسە جاستار بۇل قاۋىپتىڭ الدىندا تۇرعانى انىق. بۇعان توتەپ بەرۋدىڭ جولى – جاڭا زامانعا ساي ءبىلىم مەن باسەكەگە قابىلەتتىلىكتى, ارتىقشىلىقتاردى بويعا سىڭىرۋمەن قاتار, تامىرىمىزدى, ۇلتتىق بولمىسىمىزدى بەرىك ساقتاۋ.
الداعى ءتورتىنشى ونجىلدىقتىڭ بىزگە جۇكتەيتىن مىندەتى – قۋاتتى ەلدىڭ يەسى جانە كەمەل حالىق بولۋ. بۇل جولدا ساياسي-ەكونوميكالىق رەفورمالاردى جانە سانانى جاڭعىرتۋ ۇدەرىسىن جالعاستىرىپ, زامان تالابىنا بەيىمدەلگەن ۇلتتىڭ جاڭا بولمىسىن قالىپتاستىرۋىمىز قاجەت.
ۇلتتىڭ جاڭا بولمىسى وتكەندى بىلۋدەن, دارىپتەۋدەن باستالادى. تاۋەلسىزدىك قۇندىلىعى حالقىمىزدىڭ جادىندا ماڭگى ساقتالۋى ءۇشىن وسكەلەڭ ۇرپاق ونىڭ قادىرىن ءبىلۋى كەرەك. بۇل رەتتە, تاريحي جادىنىڭ ورنى ەرەكشە. تاۋەلسىزدىگىمىزدىڭ 30-جىلدىعىمەن قاتار, ەگەمەندىككە جەتكىزگەن قايعى-قاسىرەتكە تولى تاريحي وقيعالاردى ۇمىتپاعان ءجون. ميلليونداعان ادامدى قازاعا ۇشىراتىپ, ءتىرى قالعانىن جان ساۋعالاپ بوسىپ كەتۋگە ءماجبۇر ەتكەن الاپات اشارشىلىقتىڭ العاشقى كەزەڭى 1921-1922 جىلدارداعى ناۋبەتتەن بەرى 100 جىل ءوتتى. 1986 جىلى ۇل-قىزدارىمىزدى كەڭەس وداعىنىڭ قاھارىنان قايمىقپاي, ۇلت نامىسى ءۇشىن الاڭعا شىعارعان جەلتوقسان وقيعاسىنا دا 35 جىل تولادى. بۇنىڭ ءبارى – ءبىزدىڭ تاريح. مەملەكەتتىلىگىمىز تۋرالى بوتەن پىكىر ايتىپ جۇرگەندەردىڭ اۋزىنا قۇم قۇيۋ ءۇشىن مىڭداعان عاسىرلارعا سوزىلعان تاريحىمىزدىڭ, الەمنىڭ جارتىسىنا يە بولعان الىپ مەملەكەتتىك قۇرىلىستىڭ, ازاتتىق ءۇشىن سوعىستاردىڭ, باتىرلار جىرلارىن, الاش قوزعالىسىنىڭ باعدارلامالارىن, جالپى ۇلت شەجىرەسىن جاپپاي قايتا قاراپ, ونى ءوز ەلىمىزبەن قاتار بۇكىل الەمگە جاڭا اقپاراتتىق تەتىكتەر ارقىلى پاش ەتۋ – ماڭىزدى مىندەت.
ەل بىرلىگىنىڭ, ۇلت نامىسىنىڭ اجىراماس بولىگى – ول ءتىل. مەملەكەت باسشىسى قازاق ءتىلىنىڭ مارتەبەسىن ەرەكشە ايتىپ, مەملەكەتتىك ءتىلدى كوپشىلىكتىڭ ۇيرەنۋى جونىندەگى ءوز ۇندەۋىن ناقتى جەتكىزدى. مەملەكەتتىك ءتىلدى ءبىلۋ – ءار ازامات ءۇشىن پارىز. ول ءۇشىن ەلدە بارلىق جاعداي جاسالۋدا, قالعانى ءار ادامنىڭ ءوز نيەتىندە. نيەتتىڭ دۇرىس بولۋى قازاق ءتىلىن مەڭگەرگىسى كەلەتىن ادامدارعا دا, وسى ماقساتقا جەتۋگە جاعداي جاسايتىن ۇكىمەتكە دە بايلانىستى.
قازاقستاننىڭ اسقاق بولاشاعى ءۇشىن ەلدىك ساياسات, جاسامپاز پاتريوتيزم, مەملەكەتتىڭ يگىلىگى ءۇشىن كۇندەلىكتى ەڭبەك پەن ۇلت بىرلىگى وتە ماڭىزدى.
ءمادينا بەكتەنوۆا,
پرەزيدەنت جانىنداعى قسزي الەۋمەتتىك-ساياسي زەرتتەۋلەر ءبولىمىنىڭ جەتەكشى عىلىمي قىزمەتكەرى
